ކ. ހުރާގައި ބާރުމިނުގައި ކޮވިޑް19 ފެތުރެމުން އަންނަ އިރު، މިހާތަނަށް ނެގި ސާމްޕަލްތަކުގެ ތެރެއިން 20 ޕަސެންޓު ވައިރަހަށް ޕޮޒިޓިވްވެފައިވާ ކަމަށް އެރަށު ސިއްހީ މަރުކަޒުން މިއަދު ބުނެފި އެވެ.
މި މަހުގެ 23 ވަނަ ދުވަހުގެ ރޭ ހުރާ މޮނީޓަރިން ހާލަތަށް ގެންދިޔައީ އެރަށުން ބަލިވެގެން މާލެއަށް ގެންދިޔަ އުމުރުން ދުވަސްވީ މީހަކު ވައިރަހަށް ޕޮޒިޓިވްވެގެންނެވެ.
އެ ކޭސްއާ ގުޅުންހުރި ޑައިރެކްޓު ކޮންޓެކްޓްތަކުގެ އިތުރުން، ރަށު ތެރެއިން ރެންޑަމް ސާމްޕަލް ނަގައި ޓެސްޓުކުރުމުގެ މަސައްކަތް ވެސް އަންނަނީ ކުރަމުންނެވެ.
މިއަދު ހުރާ ހެލްތު ސެންޓަރުން ބުނީ މިއަދުގެ މިހާތަނަށް އިތުރު ހަތަރު ޕޮޒިޓިވް ކޭސް އެއް ދެނެގަނެވިފައިވާ ކަމަށެވެ. އެއާއެކު އެރަށުން ޕޮޒިޓިވްވީ މީހުންގެ އަދަދު ވަނީ 94 އަށް އަރައިފަ އެވެ.
އެރަށުން މިހާތަނަށް ޑައިރެކްޓު ކޮންޓެކްޓުންނާއި ރެންޑަމްކޮށް 449 ސާމްޕަލް ވަނީ ނަގައިފަ އެވެ. އޭގެ ތެރެއިން 20 ޕަސެންޓު ޕޮޒިޓިވްވެފައި ވާއިރު، 64 ޕަސެންޓު ވަނީ ނެގެޓިވްވެފަ އެވެ. މިހާތަނަށް 66 ސާމްޕަލްގެ ނަތީޖާ ލިބިފައި ނުވެ އެވެ.
ހުރާ ހެލްތު ސެންޓަރުގެ އޮފިޝަލް ވިދާޅުވީ މިހާރު އެރަށުގެ އާބާދީގެ ބޮޑު ބަޔަކަށް ބަލީގެ އަސަރުކޮށްފައިވާ ކަމަށެވެ. އެހެންކަމުން ރެންޑަމް ސާމްޕަލް ނެގުން އިތުރުކޮށްފައިވާ ކަމަށެވެ.
ބަލީގެ ހާލަތު އިތުރަށް ގޯސްވިޔަ ނުދިނުމަށް، ހުރިހާ ރައްޔިތުންގެ އެއްބާރުލުމަށް ހެލްތު ސެންޓަރުން ވަނީ އެދިފަ އެވެ. އެގޮތުން މާސްކް އެޅުމާއި، ކޮންޓެކްޓެއް ނަމަ އެކަން ނުފޮރުވައި އެކަހެރި ވުމަށާއި، އަދި ކޮންޓެކްޓް ޓްރޭސިން އަށް އެބާރުލުން ދިނުމަށް ހެލްތު ސެންޓަރުން ވަނީ އެދިފަ އެވެ.