ކުރީގެ ނައިބު ރައީސް އަބްދުﷲ ޖިހާދު ބޭސްފަރުވާއަށް ދުބާއީއަށް ފުރުމުގެ ހުއްދަ ނުދޭން ކްރިމިނަލް ކޯޓުން ނިންމީ ގާނޫނާ ހިލާފަށް ކަމަށް ސުޕްރީމް ކޯޓުންވެސް މިއަދު ނިންމައިފި އެވެ.
ދައުލަތަށް ފައިދާއެއް ލިބެން އޮތް ކަމެއްގައި އެހެން ގޮތަކަށް އަމަލު ކުރުމުގެ ދައުވާ ޖިހާދުގެ މައްޗަށް ދައުލަތުން އުފުލާފައި ވަނިކޮށް ޖިހާދު ވަނީ ބޭސްފަރުވާއަށް ރާއްޖެއިން ބޭރަށް ފުރުމުގެ ހުއްދައަކަށް ކޯޓުގައި އެދިވަޑައިގެންފަ އެވެ.
ނަމަވެސް، އޭނާ ފިލައިގެން ދާން އުޅޭ ކަމަށް ބުނެ ދައުލަތުން އެކަމަށް ދެކޮޅު ހެދުމާ ވިދިގެން ކްރިމިނަލް ކޯޓުން ނިންމީ އޭނާގެ ޕާސްޕޯޓް ހިފަހައްޓައި ފުރުމުގެ ހުއްދަ ނުދޭށެވެ. ކްރިމިނަލް ކޯޓުގެ އަމުރު ޖިހާދު ހައިކޯޓުގައި އިސްތިއުނާފު ކުރެއްވުމުން އެ ކޯޓުން ނިންމީ އޭނާގެ ޕާސްޕޯޓު ހިފަހައްޓަން ނިންމީ ގޯސްކޮށް ކަމަށެވެ.
ހައިކޯޓުގެ ނިންމުން ދައުލަތުން ސުޕްރީމް ކޯޓުގައި އިސްތިއުނާފު ކުރުމުން މިއަދު އެ ކޯޓުން ވަނީ ހައިކޯޓުގެ ނިންމުމަށް ތާއީދުކޮށްފަ އެވެ.
އެ މައްސަލަ ބެއްލެވި ތިން ފަނޑިޔާރުން އިއްތިފާގުން ކުރެއްވި ހުކުމުގައި ވަނީ ޖިހާދު ފިއްލަވައިގެން ހިނގައިދާނެ ކަމަށް ބެލެވޭ ހެއްކެއް ދައުލަތަށް ހުށަހެޅިފައި ނުވާ ކަމަށެވެ. ޖިހާދަކީ ދައުލަތުގެ ގިނަ މަގާމުތަކެއް ފުރުއްވާފައިވާ ބޭފުޅަކަށް ވާތީ އޭނާއަށް ރާއްޖެއިން ބޭރުގައި ފިއްލަވައިގެން އުޅެވޭނެ ކަމަށް ދައުލަތުން ބުންޏަސް އެއީ އޭނާ ފިލާފާނެ ކަމަށް ބެލެވޭނެ ސަބަބެއް ނޫން ކަމަށް ހުކުމުގައިވެ އެވެ.
ޖިހާދު އަމިއްލަފުޅަށް ފުރާވަޑައިގަތުމުގެ ކުރިން، އޭނާ ފިއްލަވާފާނެ ކަމުގެ އިހުތިމާލު އޮވެގެން އޭނާގެ ޕާސްޕޯޓު ހިފެހެއްޓުމުގެ އަމުރަކަށްވެސް ދައުލަތުން އެދިފައި ނުވާކަން ވެސް ހުކުމުގައި ފާހަގަ ކުރި އެވެ.
އޭނާ ފުރުމުގެ ހުއްދައަށް އަމިއްލައަށް އެދުމުން ކޯޓުން ގޮތެއް ނިންމަން ޖެހޭނީ ފުރުމުގެ ހުއްދަ ދިނުމާއި ނުދިނުމާ މެދު ކަމަށާއި، އެ ހާލަތުގައި ޕާސްޕޯޓު ހިފަހައްޓަން އަމުރު ނުކުރެވޭނެ ކަމަށް ހުކުމުގައިވެ އެވެ.
އޭގެ އިތުރުން، ކޯޓުގައި އޮތް މައްސަލައެއްގައި މީހަކު ފުރުން މަނާކުރަން ޕާސްޕޯޓު ހިފަހައްޓަން ޕީޖީއަށް އަމުރަކަށް އެދެވޭނީ ގާނޫނޫ ތަންފީޒު ކުރާ އިދާރާ މެދުވުރިކޮށް ކަމަށްވެސް ހުކުމުގައިވެ އެވެ.
އެ މައްސަލަ ބެއްލެވީ ބެންޗުގެ ރިޔާސަތު ބެލެހެއްޓެވީ ފަނޑިޔާރު އައިޝާ ޝުޖޫން އެވެ. ދެން ތިއްބެވީ ފަނޑިޔާރު އަލީ ރަޝީދުގެ އިތުރުން ފަނޑިޔާރު ޑރ. މުހައްމަދު އިބްރާހިމެވެ.
ޖިހާދު ރާއްޖެއިން ބޭރަށް ފުރާވަޑައިގަތުމަށް އެދުނީ، ދުބާއީގައި ކިޔަވަން ގޮސް ތިބި އޭނާގެ ދަރިންނާއި ބައްދަލުކުރުމަށާއި، އޭނާގެ އަމިއްލަފުޅު ބޭސްފަރުވާއަށެވެ.
އޭނާގެ މައްޗަށް ދައުވާކޮށްފައި ވަނީ، ރައީސް މުހައްމަދު ވަހީދުގެ ވެރިކަމުގައި، ފުށިދިއްގަރުފަޅު ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްގީ ކުރުމަށް ސަރުކާރުގެ 50 ޕަސެންޓް ހިއްސާވާގޮތަށް ޖޮއިންޓް ވެންޗަ އެގްރިމެންޓެއް ހެދުމަށް ނިންމާފައި އޮއްވާ، 50 ޕަސެންޓުގެ ބަދަލުގައި ސަރުކާރުގެ 25 ޕަސެންޓް ހިއްސާ އޮންނަ ގޮތަށް ޖޮއިންޓް ވެންޗާ ކުންފުންޏެއް ހެދުމަށް ޕްރައިމް ކެޕިޓަލް މޯލްޑިވްސް ލިމިޓެޑާއެކު އެއްބަސްވުމުގައި ސޮއިކުރުމުން ދައުލަަތަށް ލިބެން އޮތް ފައިދާއެއް ގެއްލުނު ކަމަށް ބުނެ އެވެ.