މުއްދަތު ހަމަވެފައިވާ އައިޑީ ކާޑަށް ހިދުމަތް ދޭން ޑިޕާޓްމެންޓް އޮފް ނެޝަނަލް ރެޖިސްޓްރޭޝަން (ޑީއެންއާރު) އިން އެދެފި އެވެ.
ޑީއެންއާރުން ބުނީ މިހާރު މާލޭ ސަރަހައްދުގައި ކޮވިޑްގެ ހާލަތު ހުރި ގޮތުން ގިނަ ބަޔަކު އެއްތަނަކަށް އެއްވެ އުޅުން ރަނގަޅު ކަމެއްކަމުގައި ނުފެންނަ ކަމަށެވެ.
އަދި ގިނަ ބައެއްގެ ކާޑުގެ މުއްދަތު ހަމަވެފައިވުމުގެ ސަބަބުން ހިދުމަތް ހޯދުމުގައި ދަތި ކުރިމަތިވާނެ ކަމަށް ފެންނާތީ، މުއްދަތު ހަމަވެފައިވާ ކާޑުތައް 2021 ޖޫން 30 ވަނަ ދުވަހުގެ ނިޔަލަށް މުއްދަތު އިތުރު ކުރެވިފައިވާ ކަމަށް ޑީއެންއާރުން ބުންޏެވެ.
އައިޑީކާޑުގެ މުއްދަތު އިތުރުކުރި ނަމަވެސް ކުރިއެކޭ އެއްގޮތަށް ޑީއެންއާރުގެ ވެބްސައިޓު މެދުވެރިކޮށް ކާޑު ހެއްދުމަށް އޮންލައިންކޮށް ހުށަހެޅޭނެ ކަމަށް ވެސް އެ ޑިޕާޓްމެންޓުން ބުންޏެވެ.
ކާޑުގެ މުއްދަތު ހަމަވެފައި އޮތްނަމަވެސް ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމެޓީގެ އިންތިހާބުގައި ވޯޓު ލެވޭނެ ގޮތަށް ވެސް ޑީއެންއާރުން ވަނީ ހަމަޖައްސައިފަ އެވެ.