ބޮލީވުޑްގައި ފިޔަ ޖަހަމުން އަންނަ ތަރި އަޔޫޝްމަން ކުރާނާ އާ ފިލްމެއްގެ މަސައްކަތް ފަށައިފި އެވެ.
އޭނާގެ ކާމިޔާބު ފިލްމު "އާޓިކަލް 15" ގައި އެކުގައި މަސައްކަތް ކުރި އަނޫބަވް ސިންހާ އާ އެކުގައި މަސައްކަތް ކުރާ ދެވަނަ ޕްރޮޖެކްޓް އަނޭކް އަކީ ބުޝަން ކުމާރުގެ ޓީ ސީރީޒުން ޕްރޮޑިއުސްކުރާ ފިލްމެކެވެ. ފިލްމުގެ މަސައްކަތް ފެށުނުއިރު ފިލްމުގައި ދެން އިތުރަށް ފެނިގެންދާނީ ކޮން ކޮން ތަރިންނެއް ކަމެއް ހާމަކޮށްފައެއްނުވެ އެވެ.
މި ފިލްމަކީ ހަގީގީ ހާދިސާއަކަށް ބިނާކޮށް ގެނެސްދޭ ފިލްމެކެވެ. ކުޅަދާނަ އެކްޓަރުގެ އަތުގައި ގިނަ ފިލްމުތަކެއް މިވަގުތު އެބައޮތެވެ. އޭގެ ތެރޭގައި ރަކުލް ޕްރީތު އާއެކު ކުޅޭ "ޑޮކްޓަރު ޖީ" އާ ސާރާ އަލީ ޚާން އާއެކު ކުޅޭ ފިލްމެއް ވެސް އެބައޮތެވެ.
ދާދިފަހުން އަޔޫޝްމަން ވަނީ ވާނީ ކަޕޫރާއެކު ކުޅޭ ފުރަތަމަ ފިލްމު "ޗަންދީގަޅް ކަރޭ އާޝިގީ" ގެ ޝޫޓިން ނިންމާލާފަ އެވެ. އެކްޓަރު ބޮލީވުޑަށް ނުކުތީ 2012 ވަނަ އަހަރު ނެރުނު "ވިކޯ ޑޯނާ" އިންނެވެ.