ދިވެހި ރައްޔިތެއްކަން އަންގައިދޭ ކާޑުގެ މުއްދަތު ހަމަވެފައި އޮތްނަމަވެސް ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމެޓީގެ އިންތިހާބުގައި ވޯޓު ލެވޭނެ ކަމަށް ޑިޕާޓްމެންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) އިން ބުނެފި އެވެ.
ޑީއެންއާރުން ބުނީ މިވަގުތު މާލެ ސަރަހައްދުގައި ކޮވިޑުގެ ހާލަތު އޮތްގޮތުން ގިނަ ބަޔަކު އެއްތަނަށް އެއްވެ އުޅުމަކީ ރަނގަޅު ގޮތެއްކަމަށް ނުފެންނަ ކަމަށެވެ.
އެހެންކަމުން މުއްދތު ހަމަވެފައިވާ އައިޑީކާޑަށް ހިދުމަތް ދޭން އެ ޑިޕާޓްމެންޓުން ވަނީ ހިދުމަތް ފޯރުކޮށްދޭ އިދާރާތަކަށް އިލްތިމާސް ކޮށްފައެވެ. އެގޮތުން މުއްދަތު ހަމަވެފައިވާ އައިޑީ ކާޑަށް ޖޫން މަހުގެ ނިޔަލަށް ހިދުމަތް ދޭނެ ކަމަށް ޑީއެންއާރުން ބުނެއެވެ.
އަޑީކާޑު ހެއްދުމާއި އާ ކުރުމުގެ ހިދުމަތަށް އޮންލައިންކޮށް އެދެވޭނެއެވެ. އަދި ކާޑު ބަލައި ދިޔުމަށް ވަކިން އެޕޮއިންޓްމެންޓެއް ހަމަޖައްސައި، ކާޑުގެ ވެރިފަރާތަށް އެކަން އަންގާނެއެވެ. ކާޑުގެ ވެރިފަރާތަށް ބަލައި ނުދެވޭނަމަ، އެހެން މީހަކު ފޮނުވާއިރު ސަބަބު ބަޔާންކޮށް ސިޓީ އެއް ހުށަހަޅަން ޖެހެއެވެ.