ޑިޕާޓްމެންޓް އޮފް ނެޝަނަލް ރެޖިސްޓްރޭޝަން (ޑީއެންއާރު)ގެ މުވައްޒަފަކު ޕޮޒިޓިވްވެ އެތަނުން ދޭ ހިދުމަތްތައް ދިނުން ވަގުތީ ގޮތުން މެދުކަނޑާލައިފި އެވެ.
ޑީއެންއާރުގެ ޑިރެކްޓަރު ފަރީދާ ޔޫސުފް "ސަން" އަށް ވިދާޅުވީ އެތަނުގެ މުވައްޒަފަކު ޕޮޒިޓިވްވެ، ހިދުމަތް ދިނުން މެދުކަނޑާލީ އެޗްޕީއެގެ ލަފާގެ މަތިން ކަމަށެވެ.
"މިހާރު މުވައްޒަފުން ގެއަށް ފޮނުވާލާ، ކޮންޓެކްޓް ޓްރޭސިންގެ މަސައްކަތް ކުރަން ފަށާފައި ވަނީ،" ފަރީދާ ވިދާޅުވި އެވެ.
ފަރީދާ ވިދާޅުވީ އެޗްޕީއޭ އިން ވަކިގޮތެއް އަންގަންދެން ހިދމަތް ދިނުން މެދުކަނޑާލާފައިވާ ކަމަށެވެ. އަދި ހިދުމަތް އަލުން ފަށާނީ ހިދުމަތް ދޭނެ ގައިޑްލައިންއަކާއެކު އެޗްޕީއޭގެ ލަފާ ލިބުމުން ކަމަށް އޭނާ ވިދާޅުވި އެވެ.
އައިޑީކާޑުގެ ހިދުމަތް ފޯރުކޮށްދޭ ޑީއެންއާރުގެ ހިދުމަތްތައް މެދުކަނޑާލިއިރު ހިދުމަތް ހޯދަން ގިނަ ބަޔަކު ގޮސް ތިއްބެވެ.
ކޮވިޑް19ގެ ހާލަތުގައި އައިޑީކާޑު މުއްދަތު ހަމަވެފައިތިބި ގިނަ ބަޔަކު އާ އާންމު ހާލަތުގައި އެ ހިދުމަތް ހޯދަން ޑީއެންއާރަށް ދާއިރު ހިދުމަތް މެދުކަނޑާލުމުން އައިޑީކާޑު ހޯދުމުގައި ދަތިތައް ދިމާވާނެ އެވެ.
ރާއްޖެއިން ކޮވިޑް19ގެ ކޭސްތައް ފެންނަ މިންވަރު ވަރަށް ބޮޑަށް ދަށްވެފައި އޮތުމަށްފަހު އަލުން އަދަދުތައް މައްޗަށް ދާން ވަނީ ފަށައިފަ އެވެ. މިދިޔަ ތިން ދުވަހު ކޮވިޑް ޕޮޒިޓިވް ކޭސްތަކުގެ އަދަދު 100 އިން މަތިވެފައިވާއިރު، މާލެ ސަރަހައްދުން ޕޮޒިޓިވްވާ މީހުންގެ އަދަދު ވަނީ ވަރަށް ބޮޑުތަން އިތުރު ވެފަ އެވެ.
ކޮވިޑް ކޭސްތައް އިތުރުވާން ފެށުމާއެކު އެޗްޕީއޭ އިން ވަނީ މިރެއިން ފެށިގެން މާލެ ސަރަހައްދުގައި ކާފިއު ހިންގަން ނިންމައިފަ އެވެ. އަދި މާލެ ސަރަހައްދުގައި ޕާޓީތަކާއި ހަފްލާތައް ބޭއްވުން މަނާކޮށް ރާއްޖެ އަންނަ ފަތުރުވެރިން ފިޔަވާ ރާއްޖެއިން ބޭރުން އަންނަ ހުރިހާ މީހުން ކަރަންޓީނުވާންޖެހޭ ގޮތަށް އުސޫލު ވަނީ ބަދަލުކޮށްފަ އެވެ.