ކޮވިޑް19 އަކީ މުޅި ދުނިޔެ ސުންނާފަތި ކުރަމުން އަންނަ، ލޮލަށް ނުފެންނަ ބޮޑު ސުނާމީއެއްގެ ގޮތުގައި ފޮރިން މިނިސްޓަރު އަބްދުﷲ ޝާހިދު މިއަދު ސިފަކުރައްވައިފިއެވެ.
ގައުމީ އެއްބައިވަންތަކަމުގެ ދުވަހުގެ މުނާސަބަތުގައި ފޮރިން މިނިސްޓްރީން މިއަދު ހެނދުނު ބޭއްވި ރައްމިއްޔާތުގައި މިނިސްޓަރު ވިދާޅުވީ 2004 ވަނަ އަހަރުގެ ސުނާމީގައި ރާއްޖެއަށް ލިބުނު ގެއްލުން ވަރަށް ގާތުން ފެނިވަޑައިގެން ކަމަށެވެ.
އެދުވަހު ރާއްޖެއަށް ލިބުނު ގެއްލުންތައް މިނިސްޓަރު ސިފަކުރެއްވީ ހަނގުރާމައިގެ މައިދާނެއްގައި ލިބުނު ގެއްލުންތަކެއް ފަދައިންނެވެ.
"އަޅުގަނޑުމެންގެ ގެދޮރާއި އަޅުގަނޑުމެން ބިނާތައް ފުނޑުފުނޑުވެ ރަށްތައް ގޮވާފައި ހުއްޓާ އަޅުގަނޑު ދުށިން. ރާއްޖޭގެ ލޮލުން އެދުވަހު އަންނަމުން ދިޔަ ކަރުނަ އަޅުގަނޑު ވަރަށް ގާތުން ދުށިން،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ސުނާމީގައި ލިބުނު ގެއްލުމާއި، ހިތްދަތިކަމާއި ބިރުވެރިކަމުން އަރައިގަތުމުގައި ރާއްޖެ ހޯދި ކާމިޔާބީގެ ހަގީގީ މަސްދަަކީ ރައްޔިތުންގެ އެއްބައިވަންތަކަމާއި އެއްބައެއް ވަންތަކަން ކަމަށެވެ.
"އެދުވަހު ދިވެހި ރައްޔިތުން ދިމާކުރި ވަރުގަދަ ރާޅާއެކު، އެއްބައިވެގެން އެކުވެރި ވެގެން ދިޔަ ދިއުމަށް ވުރެ ގަދަޔަށް ދިވެހިން އެއްބައިވި ދުވަހެއް ދިވެހިރާއްޖޭގެ ތާރީހުގައި ނެތޭ ދެންނެވުމަކީ ދޮގަކަށް ނުވާނެ،" މިނިސްޓަރު ވިދާޅުވިއެވެ.
ޝާހިދު ވިދާޅުވީ އޭގެ 16 އަހަރު ފަހުން މިއަދު ވެސް ރާއްޖެއަށް ކުރިމަތިލާން ޖެހިފައި މިވަނީ، ސުނާމީއަށް ވުރެ ކުޑަ ނުރައްކަލާ ނޫން ކަމަށެވެ.
މުޅި ދުނިޔެއަށް ކުރިމަތިވެފައިވާ ކޮވިޑް19 ޕެންޑެމިކް އަށް އިޝާރާތް ކުރައްވާ މިނިސްޓަރު ވިދާޅުވީ، 2004 ވަނަ އަހަރު ފަދައިން މިއަދުވެސް ރައްޔިތުންގެ ކުރިމަތީގައި އޮތީ ބޮޑު ބިޔަ ރާޅެއްގެ ސިފައިގައި އައިސް ޖައްސާފައި އޮތް ސުނާމީއެއް ކަމަށެވެ.
"ތަފާތަކީ އެ ސުނާމީއަކީ ލޮލަށް ފެންނަ ސުނާމީ އަކަށް ނުވުން. އަޅުގަނޑުމެންގެ ކުރިމަތީގައި މިއަދު އަޅުގަނޑުމެންނަށް ހަމަލާދެމުން އަންނަ ސުނާމީއަކީ ކުދި ކުދި ވައިރަސްތަކެއްގެ ސިފައިގައި އަޅުގަނޑުމެންގެ މުޅި މުޖުތަމައުއަށް ހަމަލާދެމުންދާ ސުނާމީއެއް. މުޅި ދުނިޔެ ފަނާކުރަމުންދާ ސުނާމީއެއް،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މި ނުރައްކާތެރި ދަނޑިވަޅުގައި ދިވެހިން ދައްކަމުން އަންނަ އެއްބައިވަންތަކާމެދު ފަހުރުވެރިވެވަޑައިގެންނަވާ ކަމަށެވެ.
އަދި ފްރަންޓްލައިނަށް ނުކުމެ މަސައްކަތްކުރަމުން އަންނަ ހުރިހާ ފަރާތްތަކުން ކުރަމުން އަންނަނީ ވަރުގަދަ ޖިހާދެއް ކަމަށް ވިދާޅުވިއެވެ.
"އެ އެންމެ ބޭފުޅުންނަށް އަޅުގަނޑުމެން މިއަދު ސެލިއުޓް ކުރަން،" މިނިސްޓަރު ވިދާޅުވިއެވެ.