ގަތަރު އެއާވޭސް އިން ރާއްޖެއަށް ހާއްސަ "ޓްރެވަލް ބަބްލް ހޮލިޑޭޒް" ޕެކޭޖެއް ތައާރަފްކޮށް، ދެ ގައުމުގެ ދެމެދު ޓްރެވަލް ބަބްލްއެއް ގާއިމުކޮށްފި އެވެ.
މިއީ އެ ގައުމުން ޓްރެވަލް ބަބްލް ޕެކޭޖެއް ތައާރަފްކުރި ފުރަތަމަ ފަހަރެވެ. އެ ޕެކޭޖު ހާއްސަކޮށްފައި ވަނީ ގަތަރުގެ ރައްޔިތުންނާއި އެގައުމުގައި ދިރިއުޅެމުންދާ މީހުންނަށެވެ.
ގަތަރު އެއާވޭޒް އިން ބުނީ، ގަތަރު އެއާވޭޒް ހޮލިޑޭޒް މެދުވެރިކޮށް ފްލައިޓް އަދި ހޮޓެލް ބުކް ކުރާ ފަރާތްތަކަށް، ރާއްޖޭގައި ޗުއްޓީ ހޭދަކޮށް ނިމިގެން އަނބުރާ ދޯހާއަށް ދިއުމަށްފަހު އައިސޮލޭޓް/ކަރަންޓީން ވާން ނުޖެހޭނެ ކަމަށެވެ.
ގަތަރު އެއާވޭޒް އިން ބުނީ، އެ ޕެކޭޖުގެ ދަށުން ރާއްޖެ ދަތުރު ކުރެވޭނީ ޑިސެމްބަރު މަހުގެ ފުރަތަމަ ދުވަހުން ފެށިގެން ޖެނުއަރީ މަހުގެ ހަތް ވަނަ ދުވަހާ ދެމެދު ކަމަށެވެ.
އެ ޕެކޭޖުގެ ދަށުން ރާއްޖެ އަންނަ ގަތަރު ފަތުރުވެރިން މަޑުކުރާނީ ސޭންޑީސް ބަތަލާ އަދި ޑައިމަންޑް ތުނޑުފުށި ރިސޯޓުގަ އެވެ.
ރާއްޖެ އާދެވޭނީ، 72 ގަޑިއިރު ކުރިން ހަދާފައިވާ ކޮވިޑް ނެގެޓިވް ޕީސީއާރް ރިޒަލްޓަކާއެކު އެވެ. އަދި ގަތަރުން އަންނަ މީހުން ފްލައިޓަށް އެރުމުގެ ކުރިން ދޯހާ އެއާޕޯޓުން ރެޕިޑް ޓެސްޓު ވެސް ކުރާނެ އެވެ.
ގަތަރު އެއާވޭސްއިން ބުނީ މި ޓްރެވަލް ބަބުލްގެ ދަށުން ދަތުރު ނިމިގެން ދޯހާއަށް އަނބުރާ ގޮސް އިތުރު ރެޕިޑް ޓެސްޓެއް ވެސް ގަތަރު އެއާޕޯޓުން ކުރާނެ އެވެ. އެ ޓެސްޓުގެ ނަތީޖާ ނެގެޓިވް ނަމަ ކަރަންޓީނު ވާން ނުޖެހޭނެ އެވެ.
ރާއްޖޭގެ ބޯޑަރު އަލުން ހުޅުވާލައި ދަތުރުތައް ފެށުމާއެކު އެންމެ ފުރަތަމަ ވެލާނާ އިންޓަނޭޝަނަލް އެއާޕޯޓަށް ޖައްސާފައި ވަނީ ވެސް ގަތަރު އެއާވޭޒްގެ ފްލައިޓެކެވެ. އަދި ގަތަރަކީ ރާއްޖެއަށް އެންމެ ގިނަ ޓޫރިސްޓުން މިހާރު އުފުލާ އެއް އެއާލައިނެވެ.