މިއަހަރަށް ލަފާކޮށް ރައްޔިތުންގެ މަޖިލީހުން ފާސްކުރި ދައުލަތުގެ ބަޖެޓު އަލުން ރިވައިޒްކޮށް މަޖިލީހަށް ހުށަހަޅަން ފިނޭންސް މިނިސްޓްރީއިން ނިންމައިފި އެވެ.
މީގެ ކުރިންވެސް ސަރުކާރުން ވަނީ ބަޖެޓު ރިވައިޒް ކުރާނެކަމަށް ބުނެފައެވެ.ފިނޭންސް މިނިސްޓްރީ އިން ބުނީ މަޖިލިސް ހުޅުވުމުން ރިވައިޒްޑް ބަޖެޓު ހުށަހަޅާނެ ކަމަށެވެ. ނަމަވެސް ބަޖެޓަށް ގެންނަ ބަދަލުތަކުގެ ތަފްސީލެއް ނުދެއެވެ.
މިއަހަރަށް ލަފާކޮށް ފާސްކޮށްފައިވަނީ 37 ބިލިއަން ރުފިޔާގެ ބަޖެޓެކެވެ. އާމްދަނީގެ ގޮތުގައި ދައުލަތަށް 29.9 ބިލިއަން ރުފިޔާ ލިބޭނެ ކަމަށް ލަފާކުރި ނަމަވެސް އިގްތިސޯދަށް އައިސްފައިވާ ހީނަރުކަމާއެކު މިހާރު ފިނޭންސް މިނިސްޓްރީން ލަފާކޮށްފައި ވަނީ އެންމެ ރަނގަޅު ހާލަތުގައި ވެސް އާމްދަނީގެ ގޮތުގައި ލިބޭނީ 15.2 ބިލިއަން ރުފިޔާ ކަމަށެވެ.
ހަރަދުތައް ކުރަން އަދި މިއަހަރު އިތުރަށް 12 ބިލިއަނެއްހާ ރުފިޔާ ބޭނުންވާނެކަން ސަރުކާރުން ވަނީ ހާމަކޮށްފަ އެވެ.
މިއަހަރުގެ ބަޖެޓު ރިޒައިޒް ކުރުމަށް ޖޫން މަހުގެ ތެރޭ ކެބިނެޓުގައި ވަނީ މަޝްވަރާ ކޮށްފައެވެ. ކޮވިޑް-19 އަށްފަހު ގެންނަ ބަދަލުތަކުގައި، ރައްޔިތުންނަށް އެންމެ ފައިދާހުރި ގޮތްތަކަށް އިސްކަންދީގެން ބަދަލުތައް ގެނައުމަށް ވަޒީރުންގެ ކިބައިން ރައީސް އެދިވަޑައިގެންނެވި ކަމަށް ރައީސް އޮފީހުން އޭރު ބުންޏެެވެ.
ކޮވިޑުގެ ސަބަބުން ފަތުރުވެރިކަން މަޑުޖެހި ޓޫރިސްޓުން އައުން މަދުވުމާއި ބޭރު ފައިސާގެ ދަތިކަން ކުރިމަތިވެ އިމްޕޯޓެޑް އިންފްލޭޝަންގެ މައްސަލަ ވަނީ ކުރިމަތިވެފައެވެ. އަދި ވިޔަފާރިތައް މަޑުޖެހި، ޓެކުހުން ލިބޭ އާމްދަނީ ވެސް ވަނީ ދަށްވާން ފަށައިފައެވެ.
ފިނޭންސް އިން ބުނީ 2021 އަހަރަށް ލަފާކުރާ ބަޖެޓު އޮކްޓޯބަރު ނިމުމުގެ ކުރިން މަޖިލީހަށް ހުށަހަޅާނެ ކަމަށެވެ.