ކޮރޯނާ ވައިރަސްއާ ގުޅިގެން އިންޑިއާ ފުރަބަންދުކޮށްފައި އޮތުމުން، މާހައުލަށް އައި ބަދަލުތަކާ އެކު އެގައުމުގެ މީހުން އުޅޭ ހިސާބަށް ހަރުފަތައް ޖަމާވާލެއް އިތުރުވެއްޖެ އެވެ.
ކޮރޯނާއާ ގުޅިގެން މިހާރު ވެސް އިންޑިއާގެ ބައެއް ސަރަހައްދުތައް އޮތީ ފުރަބަންދުގަ އެވެ. ބަލި ކޮންޓްރޯލްނުވެ މިހާރު ވެސް ބާރަށް ދަނީ ފެތުރެމުންނެެވެ.
ފުރަބަންދާ ގުޅިގެން މަގުތައް މިހާރު ވަނީ ހަމަހިމޭންވެފަ އެެވެ. އެ ހަމަހިމޭންކަމާ އެކު ޖަންގަލިތަކުގައި ދިރިއުޅެމުން ދިޔަ ހަރުފަތައް ވެސް މިހާރު ދަނީ އެތަންތަނުން ނުކުމެ މީހުން ދިރިއުޅޭ ސަރަހައްދުތަކަށް ޖަމާވާން ފަށައިފަ އެވެ.
އިންޑިއާގެ ހަރުފަ އެކްސްޕާޓް ވާވާ ސުރޭޝް ވިދާޅުވީ މަގުތައް ހަމަހިމޭންވެފައި އޮތުމުން ހަރުފަތައް ދަތުުރުކުރުމުގައި ކުރިން ނުލިބޭވަރަށް ފުރުސަތު ލިބެނީ ކަމަށެވެ. އަދި ފުރަބަންދާ ގުޅިގެން ގޭގޭގެ ކައިރި ސަރަހައްދުތަކުގައި ވިނައާ ގަސްތައް ހެދި ބޯވަމުންދާތީއާއި މާޗް ހިސާބު ގަނޑަކީ އާންމުކޮށް ހަރުފަ ބިސްއަޅާ ދުވަސްވަރަކަށް ވުމުން އޭގެ އަސަރު މިހާރު ފެންނަމުން ދަނީ ކަމަށެވެ.
ވާވާ ސުރޭޝް ވިދާޅުވީ ފުރަބަންދަށް ފަހު އޭނާ އެކަނިވެސް 1000 ކޯބްރާ މީހުން އުޅޭ އެކި ހިސާބުތަކުން ހިފާފައިވާ ކަމަށެވެ. އޭގެ ތެރޭގައި 27 ކިންގް ކޯބްރާ ވެސް ހިމެެނެ އެވެ. އާންމުކޮށް ކިންގް ކޯބްރާއަކީ މީހުން އުޅޭ ހިސާބާ ކައިރިވާ ހަރުފައެއް ނޫނެވެ.
މިދިޔަ މަހު އިންޑިއާގެ ކެރެއްލާގައި އެކަނިވެސް ހަރުފަ ވިހަލައިގެން 20 މީހަކު މަރުވެފަ އެވެ. އޭގެ އިތުރުން އެތައް ޖަނަވާރެއް ވެސް ވަނީ މަރުވެފަ އެވެ.
ހަރުފައިގެ އުނދަގޫ އެންމެ ފުރަތަމަ ފާހަގަވީ އިންޑިއާގެ ޓްރިވެންޑްރަމްގައި ޖަނަވާރުތަކަަށް ފަރުވާދޭ ވެޓެރިނާރިއަންއަށެވެ. އެގޮތުން "ޕެޓް އޯނަރުން" ވަނީ އެ މީހުން ގެންގުޅޭ ޖަނަވާރުތަކަށް ހަރުފަ ވިހަލައިގެން ވަރަށް ގިނައިން ވެޓުންނަށް ގުޅަމުންނެވެ. -- ނިއުއިންޑިއަން އެކްސްޕްރެސް