ހިއުމަން ޓްރެފިކިން ނުވަތަ އިންސާނީ ވަގުފާރީގެ ޝިކާރައަށްވާ މީހުންނަށް ހިމާޔަތް ދޭނެ މަރުކަޒެއް ގައިމުކުރުމުގެ މަސައްކަތް ކުރަމުންދާ ކަމަށް ސަރުކާރުން ބުނެފިއެވެ.
މިއަދު ފާހަގަ ކުރަމުންދާ ހިއުމަން ޓްރެފިކިންއާ ދެކޮޅަށް މަސައްކަތް ކުރާ ދުވަހުގެ މުނާސަބަތުގައި ޑިފެންސް މިނިސްޓްރީން ނެރުނު ބަޔާނުގައި ވަނީ ހިއުމަން ޓްރެފިކިންގެ މައްސަލަތައްކަށް ހައްލު ހޯދުމަށް ސަރުކާރުން އިސްކަމެއް ދީގެން މަސައްކަތް ކުރަމުންދާ ކަމަށެވެ. އަދި ފުޅާ ދާއިރާއެއްގައި ހިންގާ މި ކުށަކީ، ބައިނަލްއަގުވާމީ ގޮތުން އެންމެން އެކުގައި މަސައްކަތްކޮށްގެން ހައްލު ކުރެވޭނެ މައްސަލައެއް ކަމަށް އެ ބަޔާނުގައި ވަނީ ފާހަގަ ކޮށްފައެވެ.
މި މައްސަލައަށް ހައްލު ހޯދުމަށްޓަކައި ރާއްޖޭގައި މަސައްކަތް ކުރާ ބިދޭސީ މަސައްކަތްތެރިންނަށް އަމާޒުކޮށް، އާ އޫސުލުތައް ހެދުމަށްޓަކައި ބައިނަލްއަގުވާމީ ޖަމްއިއްޔާ ޖަމާއަތްތަކާއެކު މަސައްކަތް ކުރަމުންދާ ކަމަށް އެ ބަޔާނުގައި ބުނެއެވެ. އެގޮތުން ހިއުމަން ޓްރެފިކިންގެ ޝިކާރައަށްވާ މީހުންނަށް ސޯޝަލް ސަޕޯޓު ދޭނެ ވިކްޓިމް އޮފް ޓްރެފިކިން (ވީއޯޓީ) މަރުކަޒެއް ގައިމު ކުރުމުގެ މަސައްކަތްވެސް ކުރިއަށްދާ ކަމަށް އެ ބަޔާނުގައި ބުންޏެވެ.
ގްރޭޓާ މާލެ ސަރަހައްދުގައި ގައިމުކުރާ އެ މަރުކަޒުގައި ކުޑަ ކުދިންނާއި އަންހެނުންނަށްވެސް ފަރުވާ ދެވޭނެ ކަމަށް ބަޔާނުގައި ވެއެވެ. ނަމަވެސް އެ މަރުކަޒު ގައިމުކުރާނެ އިރެއް އެ މިނިސްޓްރީން ހާމައެއްނުކުރެއެވެ.
މި މައްސަލައަށް ހައްލު ހޯދުމަށް މަސައްކަތް ކުރަމުން ދަނީ އެކަމަށްޓަައި އެކުލަވާލާފައިވާ ނޭޝަނަލް އެންޓި- ޓްރެފިކިން ސްޓީރިންގް ކޮމިޓީން ކަމަށް އެ ބަޔާނުގައި ވެއެވެ. އަދި އެ ކޮމިޓީގެ ބެލުމުގެ ދަށުން އިންސާނީ ވަގުފާރީގެ އެކްޝަން ޕްލޭން ތަންފީޒު ކުރުމަށް މަސައްކަތް ކުރަމުންދާނެ ކަމަށް އެ ބަޔާނުގައި ބުނެފައިވެއެވެ.
ރާއްޖޭގައި ހިއުމަން ޓްރެފިކިންގެ މައްސަލައަކީ ބޮޑު މައްސަލައެކެވެ. އެގޮތުން ބިދޭސީ މަސައްކަތްތެރިން ލައްވާ، މުސާރަ ނުދީ މަސައްކަތް ކުރުވުމާއި، އެމީހުން އިންސާނުން އުޅެން ހެޔޮނުވާވަރު ތަންތަނުގައި ގެންގުޅުމުގެ ކަންތައްތަކަކީ މިހާރު އާންމުވެފައި އޮތް ކަމެކެވެ.