ސްރީލަންކަން އެއާލައިންސްއިން އަންނަ މަހު ރާއްޖެއަށް ދަތުރުތައް ފަށަން ތައްޔާރުވެއްޖެ އެވެ.
ސްރީލަންކަން އެއާލައިންސްގެ ރާއްޖޭގެ ޖެނެރަލް ސޭލްސް އޭޖެންޓް އޭސް އޭވިއޭޝަންގެ މެނޭޖިން ޑިރެކްޓަރު މުހައްމަދު ފިރާގު "ސަން"އަށް ވިދާޅުވީ އަންނަ މަހުގެ 15ވަނަ ދުވަހު ރާއްޖޭގެ ބޯޑަރު ހުޅުވާލުމާއެކު ސްރީލަންކަން އެއާލައިންސްގެ ދަތުރުތައް ރާއްޖެއަށް ފަށާނެ ކަމަށެވެ.
"ސްރީލަންކަން އެއާލައިންސްއިން ހަފުތާއަކު ތިން ދުވަހު [ބުދަ، ބުރާސްފަތި، އާދީއްތަ] ރާއްޖެއަށް ދަތުރުކުރާނެ. އަދި ހަމަޖެހިފައި އޮތީ ކޮލޮމްބޯއިން ހަމައެކަނި މާލެއަށް ދަތުރުކުރާ ގޮތަށް." ފިރާގު ވިދާޅުވި އެވެ.
އޭނާ ވިދާޅުވީ އެހެން ގައުމުތަކުގެ ބޯޑަރުތައް ހުޅުވާ ވަރަކުން ސްރީލަންކަން އެއާލައިންސްގެ ދަތުރުތައް އިތުރު ކުރެވޭނެ ކަމަށް އެ އެއާލައިންސްއިން ބުނެފައިވާ ކަމަށެވެ.
އެގޮތުން މިއަދުގެ ވަގުތެއްގައި އެމިރޭޓްސްއަށް ލަންޑަނާއި ކޮލޮމްބޯއާ ދެމެދު ދަތުރުތައް ކުރަން ހުއްދަ ދޫކޮށްފައިވާ ކަމަށާއި ރާއްޖޭގެ ބޯޑަރު ހުޅުވާލުމުން އެމިރޭޓްސްއިން ކޮލޮމްބޯއަށް ޓްރާންސިޓްވުމަށްފަހު ރާއްޖެއަށް އާދެވޭނެ ކަމަށް އޭނާ ވިދާޅުވި އެވެ.
މިވަގުތު އެމިރޭޓްސްއިން ކޮލޮމްބޯއަށް ޝެޑިއުލްކޮށްފައިވަނީ ހަފުތާއަކު ދެ ފްލައިޓެވެ.
އޭސް އޭވިއޭޝަންއަކީ ސްރީލަންކަން އެއާލައިންސްގެ އިތުރުން ކެތޭ ޕެސިފިކްގެ ވެސް ރާއްޖޭގެ ޖެނެރަލް ސޭލްސް އޭޖެންޓެވެ.