ގޭމު ކުޅޭ މީހުންނާއި ޕްލޭސްޓޭޝަން (ޕީއެސް)އަށް ލޯބިކުރާ މީހުން ސޮނީގެ އެންމެ ފަހުގެ ޕީއެސްއަށް އިންތިޒާރުކުރާތާ ލައްކަ ޒަމާން ވެއްޖެ އެވެ. އެ އިންތިޒާރުތަކަށް ނިމުމެއް ގެނެސް، ސޮނީއިން ވަނީ އެކުންފުނީގެ އެންމެ ފަހުގެ ޕީއެސް، ޕްލޭސްޓޭޝަން 5 ރޭ ދުނިޔެއަށް ދައްކާލާފަ އެވެ.
ޕީއެސް5ގެ ދައްކާލުމުގެ ކުރިން ވެސް ބައެއް މައުލޫމާތުތައް ވަނީ ލީކުވެފަ އެވެ. ނުވަތަ ސޮނީއިން ވަނީ އާންމުން "ދަހި"ކޮށްލުމަށްޓަކައި މަދުމަދުން ޕީއެސް5 އާ ގުޅޭ އިޝާރާތްތަކެއް ދީފަ އެވެ.
ޕީއެސްގެ އެންމެ ފަހުގެ ކޮންސޯލްއަށް ސޯޝަލް މީޑިއާގައި ގިނަ ބައެއްގެ ތަރުހީބު ދަނީ ލިބެމުންނެވެ. ފާޑުކިޔާ މީހުން ވެސް މަދެއް ނޫނެވެ. ޕީއެސް5 އާ ގުޅުން ހުރި ޕޯސްޓުތަކަށް ކޮމެންޓު ކުރުމުގައި ދިވެހިން ވެސް އުޅެނީ ވަރަށް ކުރީގަ އެވެ.
ބައެއް މީހުން އެމީހުންގެ ރައްޓެހިންނަށް ގޮވައި، އުފަންދުވަސް ހަނދާންކޮށްދީ، ހަދިޔާއަކަށް ބޭނުމީ ޕީއެސް5އެއް ކަމަށް ބުނެ އެވެ. އަދި ޕީއެސް5ގެ ފޮޓޯތަކުގައި ރައްޓެހިން ޓެގު ކުރުމަށްފަހު އެކައުންޓް ނަންބަރު ހިއްސާކުރާ މީހުން ވެސް މަދެއް ނޫނެވެ.
ޕީއެސް5 ދައްކާލި ނަމަވެސް އޭގެ ސީދާ އަގު ސޮނީއިން އަދި ހާމައެއް ނުކުރެ އެވެ. އެހެން ނަމަވެސް އޭގައި ހިމެނޭ ޒަމާނީ ފީޗާތަކުގެ މައުލޫމާތު ރޭ ސޮނީއިން ވަނީ އާންމުކޮށްފަ އެވެ.
ޕީއެސް5 (ވ) އަދި ޕީއެސް5 ޑިޖިޓަލް އެޑިޝަން (ކ)--
ޕީއެސް5ގެ ދެ މޮޑެލްއެއް ސޮނީއިން ނެރެ އެވެ. އެއީ ޕީއެސް5 އަދި ޕީއެސް5 ޑިޖިޓަލް އެޑިޝަން އެވެ. ޑިޖިޓަލް އެޑިޝަންގައި ތަފާތު ކަމަކީ 4ކޭ ބްލޫރޭ ޑްރައިވް ނުހުންނަ ކަމާއި ޕީއެސް5 އަށް ވުރެ ސައިޒުގެ ގޮތުން ބަލާއިރު ފަތިކަމެވެ.
ޕީއެސް5އަށް ހާއްސަ އިތުރު ގެޖެޓްތައް ވެސް ސޮނީއިން ވަނީ އުފައްދާފަ އެވެ. އޭގެ ތެރޭގައި ޑުއަލްސެންސް ޗާޖިން ސްޓޭޝަން، އެޗްޑީ ކެމެރާ، ޕަލްސް 3ޑީ ވަޔަލެސް ހެޑްސެޓް އަދި މީޑިއާ ރިމޯޓު ހިމެނެ އެވެ.
ޕީއެސް5އާއި ޕީއެސް5އަށް ހާއްސަ އެކްސަސަރީޒް--
މީގެ އިތުރުން ޕީއެސް4 އަށް ނެރުނު 4،000އަށްވުރެ ގިނަ ގޭމު އެންމެ ފަހުގެ ޕީއެސް5އިން ކުޅެވޭނެ ކަމަށް ވެސް ސޮނީއިން ބުނެ އެވެ.
ޕީއެސް5އަށް މައިގަނޑު ގޮތެއްގައި ފާޑުކިޔުންތަކައް އަމާޒުވީ އޭގެ ޑިޒައިންއަށެވެ. ގިނަ މީހުން ބުނާ ގޮތުގައި ޕީއެސް5ގެ ސައިޒު މާ ބޮޑެވެ. އަދި ޕީއެސްއާ ވާދަވެރި މައިކްރޮސޮފްޓްގެ ޑިޒައިންތައް ކޮޕީކޮށްފައިވާ ކަމަށް ވެސް ބައެއް މީހުން ބުނެ އެވެ.
ޕީއެސް5 ގެ ޖޮއިސްޓިކް. ބައެއް މީހުން ބުނަނީ ސޮނީއިން އެކްސްބޮކްސްގެ ޖޮއިސްޓިކް ކޮޕީކޮށްފައިވާ ކަމަށް--
ޕީއެސް5އަށް ގިނަ ބަޔަކު ކުރަމުންދިޔަ ދިގު އިންތިޒާރަށް ކޮންމެވެސް ވަރެއްގެ ހިތްހަމަޖެހުމެއް ރޭ ސޮނީއިން ވަނީ ގެނެސްދީފަ އެވެ. ޕީއެސް5 ދުނިޔެއަށް ދައްކާލި ނަމަވެސް އާންމުކޮށް މާކެޓަށް ޕީއެސް5 ނެރޭނީ މިއަހަރުގެ ފަހުކޮޅުގަ އެވެ.