ހިޔާ މަޝްރޫއުގެ ދަށުން ހުޅުމާލޭގައި އަޅާފައިވާ 7000 ފްލެޓް ފެށޭ މަހު ހަވާލުކުރާނެ ކަމަށް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކަ ކޮމިޓީގައި މިނިސްޓަރަށް ވިދާޅުވެވުނީ އޮޅުމަކުން ކަމަށް ހައުސިންގް މިނިސްޓްރީއިން ބުނެފި އެވެ.
އިއްޔެ ކޮމެޓީ ބައްދަލުވުމުގައި، ހިޔާ މަޝްރޫއުގެ ފްލެޓު ދޫކުރަން ފެށޭނެ މުއްދަތތަކީ ކޮބައިތޯ ކުރެންދޫ ދާއިރާގެ މެންބަރު އަބްދުލްޣަނީ އަބްދުލް ހަކީމް ސުވާލު ކުރެއްވުމުން މިނިސްޓަރު ވަނީ ހިޔާ މަޝްރޫއުގެ ފްލެޓުތައް ޖުލައި މަސް ނިމޭއިރު ހަވާލުކުރަން ފެށޭނެ ކަމަށް އުއްމީދު ކުރައްވާ ކަމަށް ވިދާޅުވެފަ އެވެ.
"އަޅުގަނޑު އެކްސްޕެކްޓު ކުރަން ހުޅުވިގެން މަސައްކަތް ފަށައިގަނެވިއްޖެެ ކަމަށްވަންޏާ ޖުލައި މަސް ނިމޭއިރު ހަވާލު ކުރެވެނެ ކަމަށް،" މެންބަރުން ތަކުރާރުކޮށް އެ ސުވާލު ކުރެއްވުމުންވެސް ސީދާ ޖަވާބެއް ނުދެއްވި ނަމަވެސް ފަހުން ކުރެންދޫ ދާއިރާގެ މެންބަރު ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވި އެވެ.
ހައުސިންގެ މިނިސްޓްރީއިން މިރޭ ނެރުނު ބަޔާނެއްގައި ބުނީ މިނިސްޓަރި އައިމިނަތު އާތިފާއަށް އެހެން ކޮމިޓީގައި ވިދާޅުވެވުނީ އޮޅުމަކުން ކަމަށެވެ.
"ހިޔާ މަޝްރޫއުގެ 7000 ފްލޓުތައް ހަވާލު ކުރުމުގެ މަސައްކަތާޢި ގުޅިގެން ކުރެވުނު ސުވާލުތަކުގެ ތެރެއިން ދެވަނަ ބުރުގައި ކުރެންދޫ ދާއިރާގެ މެންބަރު އަބްދުލްޣަނީ އަބްދުލްހަކީމް ކުރެއްވި ސުވާލުގެ ޖަވާބު ދެއްވަމުން ހައުސިން މިނިސްޓަރު އާމިނަތު އާތިފާ ފްލެޓުތައް ޖުލައިމަހަށް ހަވާލު ކުރެވޭނެ ކަމަށް ވިދާޅުވެވިފައިވަނީ އޮޅުމަކުންނެވެ" މިނިސްޓްރީއިން ނެރުނު ބަޔާނުގައި ބުނެފައިވެ އެވެ.
ހައުސިންގެ މިނިސްޓްރީއިން މިރޭ ބަޔާން ނެރިފައިވާއިރު އިއްޔެ ކޮމިޓީގައި މިނިސްޓަރު އާތިފާ ވިދާޅުވީ ކޮވިޑާ ގުޅިގެން ސަރުކާރު ބަންދުވުމުން ލިސްޓު ފައިނަލް ކުރުމާ ގޭގެއަށް ގޮސް ދިރިއުޅުމުގެ ހާލަތު ބެލުން މަޑުޖެހުނުކަމަށެވެ. އަދި ކޮވިޑާ ގުޅިގެން ސަރުކާރު ބަންދުވިއިރު، ދެ ހަފްތާ ތެރޭ ލިސްޓު ނިމޭނެ ކަމަށް ފްލެޓު ކޮމެޓީ އިން ބުނެފައިވާ ކަމަށް މިނިސްޓަރު އިއްޔެ ކޮމިޓީގައި ވިދާޅުވި އެވެ.
ހިޔާ މަޝްރޫއުގެ ފްލެޓުތަކަށް ފޯމު ލާފައިވާ މީހުންގެ ދިރިއުޅުމުގެ ހާލަތު ބެލުން މެދުކެނޑިފައިވަނީ ކޮވިޑާއެކު އައިސްފައިވާ ލޮކްޑައުންގެ ސަބަބުން ކަމަށާއި ލޮކްޑައުން ނިމުނުހާ އަވަހަކަށް ގޭގެއަށް ޒިޔާރަތްކޮށް ހަދަންޖެހޭ އެސެސްމެންޓުތައް ހަދާ ނިންމާލެވޭނެ ކަމަށް މިނިސްޓްރީގެ ބަޔާނުގައި ވަނީ ބުނެފަ އެވެ.
"އަޅުގަނޑުމެން ދެންނެވިން ދެން އަޅުގަނޑުމެންނަށް ދޭންވީނުންތޯއޭ ކްލެރިފައި ކުރެވިފައި ހުރި އެއްޗެއް. އެ ހަފްތާ ތެރޭ އަޅުގަނޑުމެންނަށް ފޮނުވައިދިން ހުރިހާ އެޕްލިކޭޝަންތަކުގެ ނަންތައް. އެބައުޓް 25،000 ކަންނެނގެ އައީ. އެ ހަފްތާގެ ތެރޭގައި އޮފީހުގެ ތެރެއިން، ޑޭޓާ ބޭސްގެ ލިސްޓް ކްރޮސްޗެކް ކޮށް، ހުޅުވޭދުވަހު ފޮނުވުމަށް މަސައްކަތް ކުރަމުން މިދަނީ،" މިނިސްޓަރު ވިދާޅުވި އެވެ.
"ގޭގޭގެ ހާލަތު ބެލުމުގެ ތެރޭގައި އޭތި ލަސްވެފައިއޮތީ،" މިނިސްޓަރު ވިދާޅުވި އެވެ.
ކުރީ ސަރުކާރުން ހުޅުމާލޭ ދެވަނަ ފިޔަވަހީގައި ތަރައްގީ ކުރަންފެށި ހިޔާ މަޝްރޫއުގެ ދަށުން 7،000 ހައުސިން ޔުނިޓުގެ މަސައްކަތް ކޮށްފައިވަނީ ޗައިނާގެ ޗައިނާ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަން (ސީއެސްސީއީ) އިންނެވެ. މި މަޝްރޫއުގެ ދަށުން 25 ބުރީގެ 16 ޓަވަރު އަޅާފައިވެ އެވެ.
ހިޔާ މަޝްރޫއުގެ ފްލެޓު ހޯދުމަށް 22،000 މީހަކު ހުށަހަޅާފައިވާއިރު ކުރީ ސަރުކާރު ނިމުމުގެ ކުރިން ފްލެޓު ލިބޭ މީހުންގެ ލިސްޓު ވަނީ އާންމުކޮށްފަ އެވެ. ނަމަވެސް ފްލެޓު ދިނުމުގައި ކޮރަޕްޝަން އެކުލެވޭކަމަށް ތުހުމަތުކޮށް ހިޔާ ފްލެޓުތައް ދީފައިވާގޮތް ބެލުމަށް ވަނީ ކޮމެޓީ އެއް އެކުލަވާލައިފަ އެވެ.
މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވީ ހިޔާ މަޝްރޫއުގެ ފްލެޓުތައް އޭގެ ހައްގުވެރިންނާ މިއަހަރު ހަވާލު ކުރައްވާނެ ކަމަށެވެ. އަދި ފްލެޓު ދޭނީ ކުރީ ސަރުކާރުގެ ލިސްޓަށް ކަމަށްވެސް ރައީސް ވަނީ ފަހުން ވިދާޅުވެފަ އެވެ.