ކ. ގުޅީފަޅުގައި ވިޔަފާރި ބަނދަރެއް ހަދަން އެ ފަޅުގެ ބޮޑު ބައެއް ހިއްކުމުގެ މަސައްކަތް ކުރަމުންދާތީ ވަށަައިގެންވާ ތިމާވެއްޓަށް ގެއްލުންވާ މައްސަލަ ބަލަން ރައްޔިތުންގެ މަޖިލީހުގެ އެންވަޔަރަމެންޓް އެންޑް ކައިލައިމެޓް ޗޭންޖް ކޮމެޓީއިން ބަލަން ނިންމައިފި އެެވެ.
ގުޅީފަޅުގައި ވިޔަފާރި ބަނދަރެއް ހެދުމަށް އެ ފަޅުން 192 ހެކްޓަރު ހިއްކުމުގެ ޕްރޮޖެކްޓެއް މިހާރު ވަނީ ފަށައިފައެވެ. މި މަޝްރޫއުގެ ސަބަބުން ކަނޑުގެ ވެއްޓަށް ނޭދެވޭ އަސަރު ކުރާނެ ކަމަށް މަޝްރޫއުގެ އީއައިއޭ ރިޕޯޓުގައިވެ އެވެ. އެގޮތުން، ކައިރި ފަރުތަކަށް ވެއްޔާއި ކިސަޑު އެޅި، ފެން ކިލަނބުވެ، ފަރުތަކާއި މުރަކަތައް މަރުވުން އެކަށީގެންވާ ކަމަށް އެ ރިޕޯޓުގައިވެއެވެ. މަޝްރޫއުގެ އަސަރު ވިލިމާލޭ ފަރު ހިމެނޭހެން ތިރީހަކަށް ޑައިވް ސްޕޮޓަށް ކުރާނެ ކަމަށް ތިމާވެށި ހިމާޔަތް ކުރަން ގޮވާލާ ފަރާތްތަކުން ބުނެއެވެ.
އެ މަޝްރޫއާ ގުޅިގެން ތިމާވެއްޓަށް ގެއްލުން ލިބޭތީ އާއި އެކަމުގައި އާންމުން ކަންބޮޑުވުން ފާޅުކުރަމުން ދާތީ، އެ މައްސަލަ ބަލަން މަޖިލީހުގެ ތިމާވެށި ކޮމިޓީއިން ނިންމާފައިވާ ކަމަށް މިރޭ މަޖިލީހުން ވަނީ ބުނެފައެވެެ.
ގުޅީފަޅު ހިއްކުމުގެ މަޝްރޫއު ކުރިއަށް ދަނީ: އީޕީއޭއިން ބުނަނީ އަދި ހިއްކުމުގެ އަސަރު ވިލިމާލޭ ފަރަށް އަދި ނުކުރާ ކަމަށް -- ފޮޓޯ/ އީޕީއޭ
ގުޅީފަޅު ހިއްކުމުގެ މަޝްރޫއާ ގުޅިގެން، އެ މަޝްރޫއުގެ އަސަރު އެންމެ ބޮޑަށް ކުރާނެ ކަމަށް ބެލެވޭ ވިލިމާލޭގެ މެމްބަރު އަހުމަދު އުޝާމް ވަނީ އެ މައްސަލަ މީގެ ކުރިން މަޖިލީހަށް ވައްދައިފައެވެ. ނަމަވެސް، ތިމާވެށި ކޮމިޓީއިން އެ މައްސަލަ ބަލަން ނިންމާފައި ވަނީ ކޮމިޓީގެ އިސްނެގުމުގެ މަތިން އެޖެންޑާ ކުރާ މައްސަލައެއްގެ ގޮތުގައެވެ. އެގޮތުން މި މަހުގެ އެއް ވަނަ ދުވަހު އެ މައްސަލަ ބަލަން ނިންމާފައި ވަނީ އެ ކޮމިޓީގެ މެމްބަރުންގެ އިއްތިފާގުން ކަމަށް މަޖިލީހުން މިއަދު ބުންޏެވެ.
އެ މައްސަލައާ ގުޅިގެން ހޯދަން ޖެހޭ ލިޔެކިޔުންތައް ހޯދުމުގެ މަސައްކަތް އިދާރީ މޭޒުން ކުރަމުންދާ ކަމަށް މަޖިލީހުން ބުންޏެވެ. އަދި މި މަހުގެ 10 ވަނަ ދުވަހު، އެންވަޔަރަމެންޓް މިނިސްޓްރީއާއި، ޕްލޭނިން މިނިސްޓްރީއާއި، އީޕީއޭއާއި، ގުޅީފަޅު މަޝްރޫއުގެ އީއައިއޭ ކޮންސަލްޓެންޓުން ކޮމެޓީއަށް ހާޒިރު ކުރަން ނިންމާފައިވާ ކަމަަށް މަޖިލީހުން ބުންޏެވެ.
ގުޅީފަޅު މަޝްރޫއާ ގުޅިގެން މުރަކަތަކަށް ގެއްލުންވާތީ މަޖިލީޙުގެ ރައީސް، ރައިސް މުހައްމަދު ނަޝީދު އުފެއްދެވި، މޯލްޑިވްސް ކޮރަލް އިންސްޓިޓިއުޓް ޖަމިއްޔާއިންވެސް ވަނީ ކަންބޮޑުވުން ފާޅުކޮށް މަޖިލީހަށް ސިޓީ ފޮނުވާފައެވެ. އެ ސިޓީގައި ވަނީ ގާނޫނުތަކާއި ގަވައިދުތަކަށް ގެންނަން ފެންނަ އިސްލާހުތައް ބަޔާންކޮށްފައެވެ.
މަޝްރޫ ކުރިއަށްދާއިރު، ހަދަން ޖެހޭ މޮނިޓަރިން ރިޕޯޓުތައް މިހާރު އީޕީއޭއިން ދަނީ އާންމު ކުރަމުންނެވެ. އަދި ކަނޑަށް ފޭދިގެންދާ ވެއްޔާއި ކިސަޑު ދާ ގޮތް ބަލައި، އެކަން މޮނިޓާކޮށް، މައުލޫމާތު މިހާރު އާންމު ކުރަމުން ދެއެވެ.
ހިއްކާ އިރު ވެއްޔާއި ކިސަޑު ފެތުރިޔަ ނުދިނުމަށް މަޝްރޫއުގެ ކޮންޓްރެކްޓަރު ބޮސްކާލިސްް ކުންފުނިން ދަނީ ބޮޑެތި ވެލި ބަސްތާ ޖަހަމުންނެވެ. ވެއްޔާއި ކިސަޑު ފެތުރިޔަ ނުދިނުމަށް އެންމެ ބޮޑަށް ބޭނުން ކުރާ ސިލްޓް ސްކްރީން ގުޅީފަޅާއި ވިލިނގިއްޔާ ދޭތެރޭ ނޭޅޭނެ ކަމަށް އެ ކުންފުނިން ވަނީ ބުނެފައެވެ. އެއީ އެ ސަރަހައްދުގެ ފުންމިނާއި އޮއި ހުރި ގޮތުން ސިލްޓް ސްކްރީން ނޭޅޭނެތީ ކަމަށް އެ ކުންފުނިން ބުނެއެވެ.