އެޗްޕީއޭގެ ވެބްސައިޓު ހެކުކުރި މައްސަލަ ކުށްވެރި ކުރައްވައި، އެ މައްސަލައިގެ ތަހުގީގު ފަށާފައިވާ ކަމަށް ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެ އެވެ.
މިނިސްޓަރު މަލީހު ކުރެއްވި ޓުވީޓުގައި އެޗްޕީއޭގެ ވެބްސައިޓު ހެކުކުރި މައްސަލަ ހަރުކަށި އިބާރާތުން ވަނީ ކުށްވެރި ކުރައްވާފަ އެވެ.
"މި ނާޒުކު ދަނޑިވަޅުގައި އެޗްޕީއޭގެ ވެބްސައިޓު ހެކު ކުރުމަކީ ނާތަހުޒީބު ފިނޑި އަމަލެއް. މިކަން އެންމެ ހަރުކަށި އިބާރާތުން ކުށްވެރި ކުރަން. ތަހުގީގީ އިދާރާތަކާ ގުޅިގެން މިކަން ތަހުގީގު ކުރާނަން، އެކަން ފެށިގެން މިހާރު ކުރިއަށް އެބަދޭ،" މަލީހު ވިދާޅުވި އެވެ.
ވީޑިއޯއަކުން ސަރުކާރަށް އިންޒާރު ދޭ މެސެޖަކާއެކު އެޗްޕީއޭގެ ވެބްސައިޓު ހެކުކޮށްފައިވަނީ މިއަދުގެ ވަގުތެއްގަ އެވެ.
ކާކުކަން ނޭނގޭ ގޮތަށް މާސްކެއް އަޅައިގެންހުރި މީހަކު ސަރުކާރަށް ވަރަށް ބޮޑަށް ފާޑު ކިޔަައި އެ މެސެޖުން އިންޒާރު ދީފައި ވަނީ ސަރުކާރުގެ ނެޓްވޯކްތައް ހެކްކޮށް، މައުލޫމާތުތައް ލީކްކޮށްލާނެ ކަމަށް ބުނެއެވެ.
އެޗްޕީއޭގެ ވެބްސައިޓު ހެކް ކުރި މައްސަލައިގައި ބަލަން ޖެހޭ ކަންކަން ބަލަމުންދާ ކަމަށް ފުލުހުން މިއަދު ވަނީ ބުނެފަ އެވެ.