ހެލްތު ޕްރޮޓެކްޝަން އެޖެންސީގެ ވެބްސައިޓު ހެކްކޮށް ސަރުކާރަށް އިންޒާރުގެ މެސެޖެއް ދީފި އެވެ.
މިއަދު އެޗްޕީއޭގެ ވެބްސައިޓު ހެކްކޮށް އެ ވެބްސައިޓުގައި ވީޑިއޯއެއް ފެންނަ ގޮތް ވަނީ ހަދައިފައެވެ. ނަމަވެސް މިހާރު އެޗްޕީއޭގެ ވެބްސައިޓަކަށް ނުވަދެވެއެވެ.
އެ ވީޑިއޯގައި ކާކުކަން ނޭނގޭ ގޮތަށް މީހަކު ސަރުކާރަށް އިންޒާރުގެ މެސެޖެއް ދެއެވެ.
ސަރުކާރަށް ވަރަށް ބޮޑަށް ފާޑު ކިޔަައި އެ މެސެޖުން އިންޒާރު ދީފައި ވަނީ ސަރުކާރުގެ ނެޓްވޯކްތައް ހެކްކޮށް، މައުލޫމާތުތައް ލީކްކޮށްލާނެ ކަމަށް ބުނެއެވެ. އަދި ރައްޔިތުންނަށް ފައިދާވާ ގޮތްގޮތަށް ސިޔާސަތުތައް ބަދަލު ނުކުރާނަމަ ސަރުކާރުގެ ނެޓްވޯކުތަކާއި ފައިނޭޝަލް އިންފްރާސްޓްރަކްޗާ ހަލާކޮށްލާނެ ކަމަށްވެސް އެ އިންޒާރުގައި ބުނެފައިވެއެވެ.
އެ މެސެޖުގައި ބުނެފައި ވަނީ ރައީސް އިބްރާހިމް މުހައްމަދު ސޯލިހުގެ ސަރުކާރުން ރައްޔިތުންނަށް އެންމެ ފައިދާވާ ގޮތަށް ކަންކަން ނުކުރާ ކަމަށެވެ. އަދި އިންޑިއާގެ "ފޭޝިސްޓު ސަރުކާރުން" މި ގައުމުގެ މައްޗަށް ވެރިވެގެންފައިވާ ކަމަށްވެސް ބުނެފައިވެއެވެ. އަދި މަޖިލީހުގެ މެމްބަރުންނަށްވެސް އެ ގައުމުން ފައިސާ ދީފައިވާ ކަމަށް ދޭހަވާ ގޮތަކަށް އެ މެސެޖުގައި ވާހަކަ ދައްކާފައިވެއެވެ.
ރާއްޖޭގެ 99 ޕަސެންޓުގެ ވަޒީފާ ގެއްލިފައިވާ ކަމަށާއި ވަރަށް އަވަހަށް މީހުންނަށް ކާނާގެ ދަތިކަން ކުރިމަތިވެ މަގުމަތިވާން ފަށާނެ ކަމަށްވެސް މެސެޖުގައި ބުނެފައިވެއެވެ. އަދި ސަރުކާރުގެ ވުޒާރާތަކުން ރައްޔިތުންނަށް އޮޅުވާލައި ދޮގު މައުލޫމާތު ދެމުންދާ ކަމުގެ ތުހުމަތުވެސް ކޮށްފައިވެއެވެ.
މިކަމާ ގުޅިގެން ފުލުހުން ބުނީ އެޗްޕީއޭގެ ވެބްސައިޓު ހެކް ކުރި މައްސަލައިގައި ބަލަން ޖެހޭ ކަންކަން ބަލަމުންދާ ކަމަށެވެ.