މައި ކޮލެޖުގެ ފަރާތުން ސިފައިންގެ ހޮސްޕިޓަލް ސެނެހިޔާ އަށް ހޭންޑް ސެނިޓައިޒާ ހަދިޔާ ކޮށްފިއެވެ.
އެ ކޮލެޖުން ބުނީ މިއީ ކޮވިޑް19 އާއި ދެކޮޅަށް މުވައްސަސާތަކުން ކުރާ މަސައްކަތުގައި މައިކޮލެޖުގެ ފަރާތުން ބައިވެރިވުމަށް ދިން އެހީއެއް ކަމަށެވެ. މި މަސައްކަތުގައި އެންމެ އިސްކޮށް ހަރަކާތްތެރިވާ ފަރާތްތަކަށް އެ ކޮލެޖުގެ ފަރާތުން އެހީތެރިވުމަށް ނިންމާފައިވާ ކަމަށް މައި ކޮލެޖުން ބުންޏެވެ.
ސެނެހިޔާ އަށް ހޭންޑް ސެނިޓަައިޒާ ހަދިޔާ ކުރުމުގެ އިތުރުން ކުރިއަށް އޮތްތަނުގައި އެކި މުވައްސަސާތަކަށް އެހީތެރިކަން ފޯރުކޮށްދޭނެ ކަމަށް މައިކޮލެޖުން ބުންޏެވެ.
މި ހާލަތުގައި އެންމެ ކުރީ ސަފުގައި މަސައްކަތްކުރާ ޑޮކްޓަރުންނާއި ނަރުހުން އަދި ސިފައިންނާއި ފުލުހުން ކުރަމުންދާ މަސައްކަތް ފާހަގަކޮށް އެ ކޮލެޖުން ވަނީ ޝުކުރު އަދާކޮށްފައެވެ.
އެ ފަރާތްތަކުން ކުރާ މަސައްކަތަކީ ގައުމީ މަސައްކަތެއް ކަމަށާއި ކޮވިޑް19 އިން ގައުމު ސަލާމަތް ކުރުމަށް ފުރާނަ އަތްމައްޗަށް ލައިގެން އެ ފަރާތްތަކުން ވަމުންދާ ގުރުބާނީ އަކީ އެކަކަށް ކޮށްދޭ ކަމެއް ނޫންކަމަށްވެސް މައިކޮލެޖުން ބުންޏެވެ.
ރާއްޖެއިން 128 މީހަކު ކޮރޯނާ ވައިރަސް އަށް ޕޮޒިޓިވް ވެފައިވާއިރު އާންމު ސިއްހަތުގެ ކުއްލި ނުރައްކާ އިއުލާނުކޮށް ކޮލެޖު ތަކާއި ޔުނިވާސިޓީތަކުގެ ކިޔެވުން ބަންދުކޮށްފައި އޮންނަތާ މަހަކަށްވުރެ ގިނަ ދުވަސް ވެއްޖެއެވެ.