އަނެއްކާ ވެސް މިއޮތީ ސޯޝަލް މީޑިއާއިން ހޮވާލެވުނު ތަފާތު ރެސިޕީއެކެވެ. ޓްވިޓާ ހޭންޑަލް zuroo@ މިވަނީ އޭނާގެ ގޭގައި ރޮށި ފިހަން ބޭނުންވާ ވަރަށް ފުށް ނެތުމުން މާ މޮޅުގޮތަކަށް އެބައި ފޫބަށްދާލައިފަ އެވެ. އޭނާގެ މި ރެސިޕީވެގެންދަނީ އެހެންޏާ މިކައިއުޅޭ ރޮށްޓަށް ވުރެ ވެސް މާ މީރު އަދި ސިއްހަތަށް ވެސް ފައިދާހުރި ރޮށްޓަކަށެވެ.
ހޯމަ ދުވަހު އޭނާ ކޮށްފައިވާ ޓްވީޓުގައި ވަނީ ގެ ކައިރި ފިހާރަތަކުން ވެސް ރޮށިފިހަން ފުށް ނުލިބުނު ކަމަށާއި އެހެންކަމުން މިއީ ކޮވިޑް19ގެ މިހާލަތުގައި ކަންތައްތައް ކުރެވިދާނެ ތަފާތު ގޮތެއްކަމަށް ބުނެ، "ސްވީޓް ޕޮޓޭޓޯ ރޮށި" ތައްޔާރުކޮށް އޭގެ ފޮޓޯތައް ހިއްސާކޮށްފަ އެވެ.
ސްވީޓް ޕޮޓޭޓޯ ނުވަތަ 'ކަށްޓަލަ' އަކީ އާންމުކޮށް ރާއްޖޭގައި ހެއްދޭ ފަލަމަޑީގެ ބާވަތަކެވެ. އެހެންކަމުން ބައެއް ވައްތަރުތަކުގެ ކާނާ ލިބުން ދަތި މި ދަނޑިވަޅުގައި ތަޖުރިބާކޮށްލަން ރަނގަޅު ރަހައަކަށްވާނެ އެވެ. ގިނަ އަދަދެއްގެ ބަޔަކު މި ޓްވީޓްއަށް ލައިކްދީ ރީޓްވީޓް ކޮށްފައިވާ އިރު ރެސިޕީއަށް ވެސް އެދުނު ފަރާތްތައް ގިނަ އެވެ.
ޒުރޫ ވަނީ އެފަރާތްތަކަށް ރެސިޕީވެސް ކިޔާދީފަ އެވެ. މިގޮތުން އޭނާ ބޭނުންކޮށްފައި ވަނީ 1:1 ރޭޝިއޯއެއްގައި ކަށްޓަލަ އާއި ފުށާއި އެއްވަރަކަށެވެ. މިގޮތުން ކަށްޓަލަ ފެނުކައްކާ ހޫނުކޮށްހުއްޓާ ޗަސްކުރުމަށް ފަހު ފުށާއި އެއްކޮށް އާންމުކޮށް ރޮށިފިހާވަރުގެ ފުށްގަނޑެއް ހެދީ އެވެ.
ޒުރޫ ބުނެފައި ވަނީ މި ރެސިޕީހެދުމުގެ ހިޔާލު އޭނާއަށް ލިބިފައި ވަނީ ޔޫޓީއުބްއިން ކަމަށާއި އެހެން ނަމަވެސް މިހާރު ތަފާތު އެކިބާވަތްތައް ބޭނުންކޮށްގެން މިފަދައިން ރޮށްޓެއް ހެދިދާނެ ކަމަށެވެ.
"ހިޔާލު ލިބުނީ ޔޫޓިއުބް އިން. އެކަމަކު މިހާރު ލިމިޓްލެސް ދޯ. ކެރެޓް ރޮށި، އަލުވި ރޮށި، ހުރި އެއްޗެއް އަޅާ ގިނަކޮށްލަންވީ" މި ރެސިޕީގެ ކްރެޑިޓްސް ޔޫޓީއުބްއަށްދެމުން އޭނާ ބުނެފައިވެ އެވެ.
މި ރެސިޕީއަށް ކޮމެންޓްކުރި ފިޓްނަސް ދާއިރާގެ މަޝްހޫރު، އާއިޝަތު ޝިފާނާ ވަނީ މި ހިޔާލަށް ޝުކުރުއަދާކޮށް މިއީ އާންމު ތެޔޮރޮށްޓަށް ވުރެ ސިއްހަތަށް ފައިދާހުރި ރޮށްޓެއް ކަމަށް ބުނެފަ އެވެ.
މީގެ އިތުރުން ވެސް ސޯޝަލްމީޑިއާޔާއި އެކި ދާއިރާތަކުން ފާހަގަކޮށްލެވޭ ފަރާތްތަކާއި، މަޝްހޫރު ފުޑް ބްލޮގަރުން ވެސް ވަނީ މިރެސިޕީ ކަމުގޮސްގެން ކޮމެންޓްކޮށް ޔަގީނުންވެސް "ޓްރައި" ކުރާނެ ކަމަށް ބުނެފަ އެވެ.
މި ރޮށީގެ އެންމެ ހާއްސަ އަނެއްކަމަކީ މިއީ ތަރުކާރީއާ ދުރު ކުޑަކުދިންނަށް ދޭން ވެސް އެންމެ ރަހަ މީރު ރެސިޕީއަކަށްވުމެވެ.
ފުޑް ބްލޮގާ އަދި "ފޮނިތޮށިއެމްވީ" ހިންގާ ތޫތަ މި ޓްވީޓަށް ރިޕްލައިކުރަމުން ބުނެފައި ވަނީ މިއީ "ކޫލް އައިޑިއާ" އެއްކަމަށާއި، ތަރުކާރީފަދަ ތަކެއްޗާ ދުރު އޭނާގެ ދަރިފުޅަށް ޔަގީނުން ވެސް މީގެ ރަހަ ދައްކާނެ ކަމަށެވެ. އެއާއެކު ޒުރޫ ވަނީ އޭނާގެ ކުދިންނަށް ވެސް މި ރެސިޕީ ކަމުދިޔަ ކަމަށް ބުނެފަ އެވެ.
"ކަށްޓަލަ ކާން ބުނެފިނަމަ އަހަރެންގެ ދަރިން ވެސް ގެއިން ނުކުމެގެން ދިޔައީށް. އެކަމަކު މިގޮތަށް (ކަށްޓަލަ ރޮށި) ޗީޒްކޮޅެއް ހާކައިގެން އެމީހުންނަށް ކަމުދިޔަ" ޒުރޫ ބުންޏެވެ.
މީގެއިތުރުން ޒުރޫ ބުނެފައިވާ ގޮތުން ކަށްޓަލަރޮށި ފިހެނިމުނުއިރު، ހުރީ މަޑުކޮށް އަދި "ޗިއުވީ" ކޮށެވެ. އެ ރެސިޕީއަށް ކުޑަ ބަޓަރުކޮޅެއް އެޅިނަމަ ރޮށި އެއަށްވުރެ މަޑުވެ، ރަހަވެސް މީރުވާނެ ކަމަށް އޭނާ ބުންޏެވެ.
އެއާއެކު، ބާކީވާ ރޮށިން މުރަނަކޮށްފައި، ނާޗޯސް ހެދޭނެކަމަށް ވެސް ޒުރޫ ބުންޏެވެ. އޭގެ މައްޗަށް ޗީޒް އާއި އެމީހަކަށް ކަމުދާ ސްޕައިސަސްގެ ބާވަތްތައް ވެސް އެޅިދާނެ އެވެ.
މިވަގުތަކީ އެންމެންވެސް ލިބޭ އެއްޗަކުން ފުއްދާލައިގެން އުޅެންވީ ވަގުތެވެ. ކާއެއްޗެހި އިސްރާފުކުރުމުގެ ބަދަލުގައި އުފެއްދުންތެރި މޮޅު ހިޔާލުތަކެއް މިފަދައިން ގެންގުޅެންވީ ވަގުތެވެ.