މިހާރު ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން މޯލްޑިވްސް އެސޯސިއޭޝަން އޮފް އެޗްއާރު ޕްރޮފެޝަނަލްސް (މާޕް)އިން ބާއްވަން ނިންމާފައި އޮތް ދެވަނަ އެޗްއާރު ކޮންވެންޝަން އެންްޑް އެކްސްޕޯވެސް ފަސްކޮށްފިއެވެ.
އެ ކޮންވެންޝަން ބާއްވަން ނިންމާފައިވަނީ މިމަހު 14 އިން 15 އިންއެވެ.
މާޕްއިން ބުނީ ދެން އެ ކޮންވެންޝަން ބާއްވާނީ ޖުލައި ހައެއް އަދި ހަތެއްގައި ކަމަށެވެ
މައެ ކޮންވެންޝަން ފަސްކުރީ ގިނައިން އެއްވެއުޅުން މަދުކުރުށް ހެލްތު މިނިސްޓްރީއާއި ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބާރުއަޅަމުންދާ ދަނޑިވަޅެއްގައި ކޮންވެންޝަން ފަސްކުރުން އެއީ އެންމެ ރަނގަޅު ގޮތް ކަމުގައި ދެކޭތީ ކަމަށް މާޕްއިން ބުންނެވެ.
ދަރުބާރުގޭގައި ބާއްވާ އެ ކޮންވެންޝަންގައި މުވައްޒަފުންގެ ހުނަރާއި ޤާބިލްކަން އިތުރުކުރުމާއި، ވަޒީފާގެ މާހައުލަށް ޓެކްނޮލޮޖީ އިތުރުކުރުމާއި، ވަޒީފާގެ މާހައުލު މުވައްޒަފުންނަށް އެންމެ އެކަށީގެންވާ މާހައުލަކަށް ހެދޭނެ ގޮތްތަކާއި، ލީޑަރޝިޕް އަދި އިންސާނީ ވަސީލަތް ބިނާކުރާނެ ގޮތްތަކާއި ބެހޭގޮތުން މަޝްވަރާކުރެވިގެންދާނެކަމަށް މާޕްއިން ބުންޏެވެ.
މިފަހަރުގެ ކޮންވެންޝަންގައި ކީނޯޓް ސްޕީޗުތައް ދުނިޔޭގެ ފެންވަރުގެ މަޝްހޫރު 14 ފަރާތަކުން ދޭނެއެވެ.
އެ ކީނޯޓް ސްޕީކާސް ތެރޭގައި ގްލޯބަލް ކީނޯޓް ސްޕީކަރ އަދި އެގްޒެކެޓިވް ކޯޗް އޮން ލީޑަރޝިޕް އެންޑްރޫ ބްރެންޓް، ޓްރާންސްފޯމެޝަންލް ކީނޯޓް ސްޕީކަރ ކަރެން ލިއޮންގ، ލީޑަރޝިޕް ސްޕީކްރ އޯތަރ އެންޑް ހައި ޕާފޯމަންސް ސްޓްރެޓެޖިސްޓް ކެނެތް ކުއާން، މެނޭޖިން ޕާޓްނަރ އެޓް ކްރޫ ގްލޫ އެންޑް ދަ ޑެއިޒީ ގްރޭ ޕާޓްނަޝިޕް ސާރާ ބެލިންގަރ ހިމެނެއެވެ.
އޭގެ އިތުރުން ރާއްޖޭގެ 20 ފަރާތަކުން ތީމް އާއި ގުޅޭ ތަފާތު ސެޝަންތައް ނަންގަވައިދެއްވާނެނެކަަމަށް މާޕްއިން ބުންޏެވެ.
ނޭޝަނަލް އެޗްއާރު ކޮންވެންޝަން އެންޑް އެކްސްޕޯ 2020ގައި އިތުރަށް ރަޖިސްޓްރީވާން ބޭނުންވާ ފަރާތްތަކުން އޮންލައިންކޮށް ރެޖިސްޓްރީވުމުގެ ފުރުސަތު މާޕްގެ ވެބްސައިޓް އަދި ފޭސްބުކް ޕޭޖްއިން އަދިވެސް ލިބިގެންދާނެއެވެ. އިތުރު މައުލޫމާތު މާޕްގެ ހޮޓްލައިން ނަންބަރ 7778035 އަށް ގުޅުއްވުމުން ލިބަވަޑައިގަންނަވާނެ ކަމަށް މާޕްއިން މައުލޫމާތު ދެއެވެ.
ރާއްޖޭގެ ރިސޯޓެއް ކަަމަށްވާ ކުރެއްދީ ރިސޯޓުގެ ދެ މުވައްޒަފުން ވަނީ ކޮވިޑް-19 އަށް ޕޮޒިޓިވްވެފައެވެ. އެ ރިސޯޓް މިހާރު ވަނީ ލޮކްޑައުންވެސް ކޮށްފައެވެ. މުޅި ދުނިޔެއިން ލައްކައަކަށް ވުރެ ގިނަ މީހުންނަށް ކޮވިޑް -19 ޖެހިފައިވާއިރު 3000 އަށް ވުރެ ގިނަ މީހުން އެބަލީގައި ވަނީ މަރުވެސްވެފައެވެ.