ޖަރުމަނު ޝެންގެން ވިސާއަށް ވަގުތީ ކްލިނިކެއް ހުޅުވައިފި

ޖަރމަނީ ޝެންގަން ވިސާ ދޫކުރަން ހުޅުވި ވަގުތީ ކްލިނިކުން ވިސާގެ ހިދުމަތް ދޭނީ މި މަހުގެ 6ވަނަ ދުވަހުގެ ނިޔަލަށް-- ފޮޓޯ/ފޮރިން މިނިސްޓްރީ

ޖަރުމަނީ ޝެންގެން ވިސާ ދޫކުރާ ވަގުތީ ކްލިނިކެއް ފޮރިން މިނިސްޓްރީގައި ހުޅުވައިފި އެވެ.

މި މަހުގެ ހަވަނަ ދުވަހުގެ ނިޔަލަށް ހުޅުވި އެ މޮބައިލް ބަޔޯމެޓްރިކް ކްލިނިކަކީ އެމްއެމްޕީއާރުސީއާއި ދިވެހި ސަރުކާރުގެ އެހީއާއެކު ރާއްޖޭގައި ހުންނަ ޖަރމަނީގެ އެމްބަސީއިން ހުޅުވި ކްލިނިކެކެވެ.

މިއީ ރާއްޖޭގައި ޝެންގެން ވިސާ އެޕްލިކޭޝަން ހިދުމަތް ދޭ ދެވަނަ ފަހަރެވެ. ފޮރިން މިނިސްޓްރީން ބުނީ މި ކްލިނިކުން ޝެންގެން ވިސާއަށް އެދި 162 މީހުން ހުށަހަޅާފައިވާ ކަމަށާއި އެ ކްލިނިކުގެ ހިދުމަތްތައް ފެބްރުއަރީ ހަވަނަ ދުވަހާ ހަމައަށް ދޭގޮތަށް އިތުރުކުރީ ވިސާއަށް އޮތް ޑިމާންޑް ބޮޑު ކަމުން ކަމަށެވެ.

މި ދުވަސްވަރަކީ އަންނަ މާޗް މަހު ޖަރުމަނުގެ ބާލިންގައި ބާއްވާ އައިޓީބީ ފެއާއަށް ދާ ފަރާތްތަކުންވެސް ވިސާއަށް އެދި ހުށަހަޅާ ދުވަސްވަރު ކަމަށްވުމާއެކު މި ކްލިނިކްގެ ސަބަބުން ވިސާ ހޯދުމުގައި ގިނަ ފަރާތްތަކަށް ލުޔެއް ލިބިގެންދާނެ ކަމަށް ފޮރިން މިނިސްޓްރީން ބުނެ އެވެ.

ޖަރުމަނަށް ދާން ޝެންގެން ވިސާ ކްލިނިކެއް ވަގުތީ ގޮތުން ހުޅުވިއިރު، އެފަދަ ދާއިމީ ވިސާ ސެންޓަރެއް ރާއްޖޭގައި ހުޅުވުމުގެ މަސައްކަތް ދެގައުމުގެ ސަރުކާރުން ދަނީ ކުރަމުންނެވެ.

އިއްޔެ ރައްޔިތުންގެ މަޖިލީހުގައި މިއަހަރުގެ ރިޔާސީ ބަޔާން އިއްވަވަމުން ރައީސް އިބްރާހިމް މުހައްމަދު ސޯލިހުވެސް ވަނީ އެކަން ފާހަގަކުރައްވާފައެވެ.

"ރާއްޖެއާއި ޖަރުމަނު ސަރުކާރު ގުޅިގެން ޝެންގަން ވިސާ ހޯދުމުގައި ދިވެހިންނަށް ލުއި ގޮތްތަކެއް ހޯދައިދިނުމަށް ރާއްޖޭގައި ވިސާ އެޕްލިކޭޝަން ސެންޓަރެއް އަންނަ މާރިޗް މަހުގައި ގާއިމުކުރުމުގެ މަސައްކަތް އަންނަނީ ކުރެވެމުން." ރައީސް ވިދާޅުވިއެވެ.

comment ކޮމެންޓް