މަރިޔަމް އުނޫޝާ (ކިޑީ) އާއި މިއުޒީޝަން ބާޗީގެ "އުދުހިލާ" އަލްބަމް އަންނަ މަހު 17ގައި ރިލީޒުކުރުމަށް ތައްޔާރުވެއްޖެ އެވެ.
ކިޑީ އާއި ބާޗީގެ އުދުހިލާއަކީ ދެމީހުންގެ ގުޅިގެން އުފައްދާ ކުޑަކުދިންގެ ނާނާ ލަވަތަކުގެ އަލްބަމްއެކެވެ.
ދަ ކިޗަން ރެސްޓޯރަންޓްގައި ބޭއްވި ރަސްމިއްޔާތެއްގައި ކިޑީގެ ފިރިމީހާ އަދި މެނޭޖަރު އިބްރާހީމް ހަމިޝް ބުނެފައި ވަނީ އެ އަލްބަމް ޖެނުއަރީ މަހުގެ 17ގައި ރިލީޒުކުރުމަށް މަސައްކަތް ކުރަމުންދާ ކަމަށެވެ.
މިއަދު ބޭއްވި ރަސްމިއްޔާތުގައި އުދުހިލާގެ ސްޕޮންސަރުންނާއެކު ވަނީ އެއްބަސްވުމެއްގައި ސޮއިކޮށްފަ އެވެ. އެގޮތުން އެ އަލްބަމްގެ މެއިން ސްޕޮންސަރަކީ އެސްޓީއޯ އެވެ.
އުދުހިލާ އަލްބަމްގެ އިތުރު ސްޕޮންސަރުންގެ ތެރޭގައި ވާދީ ޓްރޭޑާސް އާއި ޔޫތު މިނިސްޓްރީ އާއި ދިރާގު ފަދަ ކުންފުނިތައް ހިމެނެ އެވެ.
އެ ރަސްމިއްޔާތުގައި ވާހަކަދައްކަމުން ހަމީޝް ބުނީ މި އަލްބަމްގައި ހިމެނޭނީ ހުސްވެސް އަމިއްލަ ރާގުގެ ނާނާތަކެއް ކަމަށާއި އަލްބަމަކީ 100 ޕަސެންޓް ދިވެހި އުފެއްދުމެއް ކަމަށެވެ.
މިޒަމާނާއި ގުޅޭނެހެން އަޑުއިވިގެންދާނެ ހަތް ނާނާގެ އުދުހިލާ އަލްބަމަކީ ސައުންޑް ސްކުއޮޑް އަދި ލޫޕްކްރާފްޓްގެ ޕްރޮޑަކްޝަނެކެވެ. އުދުހުލާގެ ކަވާ އަކީ އުނޫޝާ އާއި ލޫޕްކްރާފްޓްގެ ހިޔާލެކެވެ. ކަވާ ތައްޔާކޮށްފައި ވަނީ ވެސް ކުޑަކުދިންނަށް އެންމެ އެކަށޭނެ ކޮށެވެ. ކަވާ ތައްޔާރުކުރީ ލޫޕްކްރާފްގެ ޓީމެވެ.
އެ އަލްބަމްގެ ހުރިހާ ލަވައެއްގައި ވެސް މެސެޖެއް ހިމެނޭނެ ކަމަށް ހަމީޝް ބުންޏެވެ. އެގޮތުން އާއިލާއެއް އަލަށް ފެށުމާއި ދަރިފުޅު ބެލުމުގައި މަންމަ އަދާކުރާ އިސް ރޯލުގެ ވާހަކަތައް އެ ނާނާ ލަވަތަކުން ކިޔައިދޭނެ އެވެ.