ރ. މާކުރަތު ކޯޓުގެ އިސް މެޖިސްޓްރޭޓް އަދުނާން ހުސެއިން އިސްތިއުފާ ދެއްވައިފި އެވެ.
ޖުޑީޝިއަލް ސާވިސް ކޮމިޝަންގެ މީޑިއާ އޮފިޝަލް މިއަދު "ސަން" އަށް ވިދާޅުވީ އަދުނާންގެ އިސްތިއުފާގެ ސިޓީ މިއަދު ހެނދުނު ލިބިފައިވާ ކަމަށެވެ. އަދި އެ ސިޓީ މިހާރު މަޖީލިހަށް ލިބިފަިއވާ ކަމަށް ވެސް އޭނާ ވިދާޅުވި އެވެ.
އަދުނާން އިސްތިއުފާ ހުށަހެޅުއްވި އިރު އޭނާ ވަކިކުރުމަށް ޖުޑިޝަލް ސާވިސް ކޮމިޝަން (ޖޭއެސްސީ)ން ނިންމި ނިންމުމަށް ތާއީދުކުރުމަށް އިއްޔެ ރައްޔިތުންގެ މަޖިލީހުގެ ޖުޑިޝަރީ ކޮމިޓީން ވެސް ވަނީ ނިންމައިފަ އެވެ.
އަދުނާންގެ މައްޗަށް ކުރެވިފައިވާ ތުހުމަތުތަކުގެ ތެރޭގައި ފަނޑިޔާރެއްގެ މަގާމުގައި ހުރެ އެމްޑީޕީގެ ސިޔާސީ ހަރަކާތްތަކުގައި ބައިވެރިވުމާއި އެމްޑީޕީގެ ކެންޑިޑޭޓަށް ވޯޓުދިނުމަށް ސޯޝަލް މީޑިއާގައި އެދުން ހިމެނެ އެވެ. އޭގެ އިތުރުން އަދުނާން މަސައްކަތް ކުރާ ކޯޓުގެ މުވައްޒަފުންނަށް ޖިންސީ ގޯނާ ކުރާ މައްސަލަތަކެއް ވެސް ތުހުމަތުތަކުގެ ތެރޭގައި ހިމެނެ އެވެ. އެގޮތަށް ޖިންސީ ފުރައްސާރަކުރާތާ އަށް އަހަރު ވެދާނެކަމަށް ވަނީ ތުހުމަތުކުރެވި އެވެ.
އަދުނާން ވަކިކުރުމުގެ ހުރިހާ ޖޭއެސްސީގެ ނިންމުމުގައި އިޖުރާއަތްތައް ޖޭއެސްސީ ފުރިހަމަކޮށްފައިވާ ކަމަށް ބުނެ އޭނާ މަގާމުން ވަކިކުރަން ނިންމީ އެމްޑީޕީގެ މެޖޯރިޓީ އޮންނަ ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ ހުރިހާ މެމްބަރުންގެ އިއްތިފާގުންނެވެ.
އަދުނާން ވަކިކުރަން ނިންމި އިރު ކ. ތުލުސްދޫ ކޯޓުގެ މެޖިސްޓްރޭޓް ޢައިނާނު އަލީ މުހައްމަދާއި ކްރިމިނަލް ކޯޓުގެ އިސް ފަނޑިޔާރު އަހްމަދު ހައިލަމް ވަކިކުރަން ވެސް އިއްޔެ ކޮމެޓީން ވަނީ ނިންމައިފަ އެވެ.