މޯލްޑިވްސް ރިފޯމް މޫވްމަންޓް (އެމްއާރުއެމް)ގެ އިންތިގާލީ ނައިބު ރައީސުންނަށް މިނިސްޓަރ އޮފް އާޓްސް ކަލްޗާ އެންޑް ހެރިޓޭޖް ޔުމްނާ މައުމޫނާއި ޖެންޑާ މިނިސްޓްރީގެ ކުރީގެ ކޯޑިނޭޓަރ އައިމިނަތު ނާދިރާ އިންތިހާބުކޮށްފިއެވެ.
އެމްއާރުއެމްގެ ނައިބު ރައީސުންގެ މަގާމަށް ޔުމްނާއާއި ނާދިރާ އިންތިހާބުކުރީ ރޭ ބޭއްވި މޯލްޑިވްސް ރިފޯމް މޫވްމަންޓްގެ އެގްޒެކެޓިވް ކޮމިޓީގެ ފުރަތަމަ ބައްދަލުވުމުގައި ނެގި ސިއްރު ވޯޓަކުންނެވެ.
އެމްއާރުއެމްގެ ލީޑަޝިޕްގައި ދެ ނައިބު ރައީސުން ތިބޭ އިރު، އޭގެ ތެރެއިން އެއް މަގާމަކީ ޕާޓީގެ އަންހެން މެމްބަރުންނަށް ހާއްސަ މަގާމެކެވެ. އެ މަގާމަށް ކުރިމަތިލެއްވީ މިނިސްޓަރު ޔުމްނާ މައުމޫން އެކަންޏެވެ.
އަދި ދެވަނަ މަގާމަށް އައިމިނަތު ނާދިރާއާއި ހަސަން ސަމީހު ވާދަކުރި އިރު، ނާދިރާއަށް ލިބިވަޑައިގަތީ 27 ވޯޓެވެ. ސަމީހަށް ލިބިލެއްވީ ނުވަ ވޯޓެވެ.
އެހެންކަމުން އެ ޕާޓީގެ ލީޑަޝިޕްގައި މިވަގުތު ހިމެނެނީ އިންތިގާލީ ރައީސްކަމުގައި ކުރީގެ ރައީސް މައުމޫން އަބްދުލްގައްޔޫމުގެ އިތުރުން އިންތިގާލީ ދެ ނައިބު ރައީސުން ޔުމްނާ މައުމޫނާއި އައިމިނަތު ނާދިރާއެވެ. އަދި މިއީ ރާއްޖޭގެ ސިޔާސީ ޕާޓީއެއްގެ ލީޑަޝިޕުގައި އަންހެނުންގެ މެޖޯރިޓީއެއް އޮތުމަށް މެދުވެރިވި ފުރަތަމަ ފަހަރެވެ.
މީގެ އިތުރުން އެ ޕަޓީގެ ސެކްރެޓަރީ ޖެނެރަލްގެ މަގާމަށް، އެގްޒެކެޓިވް ކޮމިޓީގެ އިއްތިފާގުން ހޮވުނީ ކުރީގެ ރައީސް މައުމޫން ޕީޕީއެމް ހިންގެވި އިރު އެ ޕާޓީގެ ސެކްރެޓަރީ ޖެނެރަލްގެ މަގާމު ފުރުއްވި އަބްދުލްއަލީމް އާދަމެވެ.
އެމްއާރުއެމްގެ އަސާސީ ގަވައިދުގައި ވާ ގޮތުން، އެ ޕާޓީގެ މަގާމުތައް ހަމަޖައްސާފައިވަނީ އަންހެނުންނަށް 50 ޕަސަންޓު ހާއްސަކޮށްގެންނެވެ.
އަންހެނުންނަށް ކުރާ އަނިޔާ ހުއްޓުވުމުގެ ކެމްޕޭނުގައި ބައިވެރިވުމުގެ ގޮތުން، ރޭ އޮތް ކޮމިޓީ ބައްދަލުވުމުގެ ހުރިހާ މެމްބަރުންވެސް ތިއްބެވީ އޮރެންޖުކުލައިގެ ހެދުން ތުރުކުރައްވައިގެންނެވެ.
ކުރީގެ ރައީސް މައުމޫން އިސްވެ ހުންނަވާ އުފެއްދެވި ތިންވަނަ ޕާޓީ، މޯލްޑިވްސް ރިފޯމް މޫވްމަންޓް އިލެކްޝަންސް ކޮމިޝަނުން ރަޖިސްޓްރީކޮށްދިނީ މިދިޔަ ހޯމަ ދުވަހެއެވެ.