ކޮންމެ އަހަރަކުވެސް ބަންދާ ދިމާކޮށް ބާއްވަމުން ގެންދާ ހިތާނީ ފެސްޓިވަލް އަންނަ އާދިއްތަ ދުވަހު ފަށާގޮތަށް ނިންމައިފި އެވެ.
މިއަހަރު އެ ހިތާނީ ކޭމްޕް 10 ސިއްހީ ހިދުމަތް ދޭ ތަނެއްގައި ބޭއްވުމަށް ނިންމާފައިވާ ކަމަށް ހެލްތު މިނިސްޓްރީން ބުންޏެވެ. އަދި މިހާތަނަށް 600 އަށް ވުރެ ގިނަ ކުޑަކުދިން އެ ފެސްޓިވަލްގައި ވަނީ ބައިވެރިވެފައިވެ އެވެ. އަދި އެ ފުރުސަތު މިހާރުވެސް އޮތީ ހުޅުވާލައިފަ އެވެ.
އެ ކޭމްޕް މިއަހަރު ފަށަނީ ކުޅުދުއްފުށީ ރީޖަނަލް ހޮސްޕިޓަލްއިން އެވެ. އެ ކޭމްޕެ ފެށުމަށް ބާއްވާ ރަސްމިއްޔާތުގައި ނާއިބު ރައީސް ފައިސަލް ނަސީމްވެސް ބައިވެރިވެލައްވުމަށް ވަނީ ހަމަޖެހިފަ އެވެ.
އެ ކޭމްޕްގައި ބައިވެރިވާކުދިންގެ ހަރަދުތައް އާސަންދަ މެދުވެރިކޮށް ކަވަރުކުރުމަށް ހަމަޖެހިފައިވާ ކަމަށްވެސް ހެލްތު މިނިސްޓްރީން ބުންޏެވެ.
އެ ކޭމްޕް ފެށުމުގެ ކުރިން ކޭމްޕްގައި ބައިވެރިވާ ކުދިން ސްކްރީންކޮށް ބެލެނިވެރިންނަށް މައުލޫމާތުދީ އެ ކުދިންނަށް ވަކި ހާއްސަ ޑޮކްޓަރުންނާއި ނަރުހުންގެ ޓީމެއް އެ ކުދިން ގެއަށް ދޫކޮށްލަންދެން ތިބުމަށްވަނީ ހަމަޖެހިފައެވެ.
ކުޑަކުދިންނާ ގުޅޭ ގޮތަށް ޑިޒައިންކޮށްފައިވާ އެ ކޭމްޕްގައި އަތޮޅު ތެރޭގެ ސަގާފީ ކަންތައްތައްވެސް ހިތާނީ ކޭމްޕްގައި އިންތިޒާމް ހަމަޖައްސައިދޭނެކަމަށްވެސް ހެލްތު މިނިސްޓްރީން ބުންޏެވެ. އޭގެ އިތުރުން ހިތާނުކުރުމުގެ ތެރޭގައި ނުރައްކާތެރި ހާލަތެއް ކުރިމަތިވެއްޖެނަމް ވަކިން ސާޖަނުންނަށް ދެއްކުމުގެ ހިދުމަތްވެސް ދޭނެކަމަށް ހެލްތު މިނިސްޓްރީން ބުންޏެވެ.
އެ ކޭމްޕްގައި ބައިވެރިވާ ކޮންމެ ކުއްޖަކަށްވެސް ހާއސަ ހަދިޔާއެއް ދިނުމަށް ހަމަޖެހިފައިވާ ކަމަށް ހެލްތު މިނިސްޓްރީން ބުންޏެވެ.