ކުރީގެ ރައީސް މުހައްމަދު ނަޝީދަށް 2013 ވަނަ އަހަރުގެ ރިޔާސީ އިންތިހާބުގައި ވާދަ ނުކުރެވޭ ގޮތް ހެދުމަށްޓަކައި ބޮމެއް ގޮއްވާލަން ކުރީގެ ނައިބު ރައިސް އަހްމަދު އަދީބު ރޭވިކަން ނަޝީދަށް އެންގީ ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު ކާނަލް (ރޓޑ) މުހައްމަދު ނާޒިމްކަން ރިޔާސީ ކޮމިޝަނުން އެކުލަވާލި ރިޕޯޓުން ހާމަވެއްޖެ އެވެ.
އުނގޫފާރު ދާއިރާގެ ކުރީގެ މެންބަރު އަފްރާޝީމް ގަތުލުކޮށްލި މައްސަލައިގައި މަރުތަކުގެ ކޮމިޝަނުން ހިންގި ތަހުގީގަށް ދިއްގަރު ދާއިރާގެ ކުރީގެ މެމްބަރު އަހްމަދު ނާޒިމް ދެއްވި ބަޔާނުގައި ވިދާޅުވެފައި ވަނީ، ރައްޔިތުންގެ މަޖިލީހުގެ ހުޅުހެންވޭރު ދާއިރާ ކުރީގެ މެމްބަރު މޫސާ މަނިކު (ރީކޯ މޫސަ)ގެ ދަނބިދަރި، އަބްދުﷲ ޖާވިދު (ޖާ) އާއި އަދީބާ ދެމެދު ގިނަ ކަންތައްކެއްގެ ހިނގި ކަމަށެވެ. އެގޮތުން އެކަމުގެ ތެރޭގައި ޖާ އާއި އަދީބާ ދެމެދު ރައީސް ނަޝީދު އިންތިހާބުގައި ވާދަ ނުކުރެވޭ ގޮތް ހެދުމަށް މަޝްވަރާ ކުރި ކަމަށް ނާޒިމްްގެ ބަޔާނުގައި ވިދާޅުވެފައިވެ އެވެ.
"މި ގޮތުން ރައީސް ނަޝީދުގެ ކެންޑީޑެސީ ބާތިލްކުރުމުގެ ވާހަކައަކީ އަދީބު އަބަދުވެސް ދައްކަމުން އަންނަ ވާހަކައެެވެ. މިކަމުގެ ތެރޭގައި އަދީބު ބޮން ހަދާ ހިސާބަށްވެސް ދިޔަ އެވެ. އެއީ ރައީސް ނަޝީދު އިންނަވާ އުޅަނދެއްގެ ތެރޭގައި ބޮމެއް ގޮއްވައިލައިގެނެވެ."ނާޒިމް ބަޔާނުގައި ވިދާޅުވެފައިވެ އެވެ.
ނާޒިމް ބަޔާނުގައި ބުނީ، އެ ރޭވުން ރައީސް ނަޝީދުގެ ސަމާލުކަމަށް ގެނައީ އޭރުގެ ޑީފެންސް މިނިސްޓަރު އަދި މިހާރުގެ ދަނގެތި ދާއިރާ މެމްބަރު މުހައްމަދު ނާޒިމް (ކާނަލް ނާޒިމް) ކަމަށެވެ.
"އެކަން އެނގިގެން ކާނަލް ނާޒިމް ސީދާ ފުލުހުންނަށް އެ މައުލޫމަތު ހިއްސާކުރިއެވެ. އަދި ރައީސް ނަޝީދަށް އެކަހަލަ ތްރެޓެއް އޮތްކަމަށް ކާނަލް ނާޒިމް ރައީސް ނަޝީދަށްވެސް އަންގާފައިވެ އެވެ." ކުރީގެ މެމްބަރު ނާޒިމްގެ ބަޔާނުގައި ވިދާޅުވެފައިވެ އެވެ.
އެކަން ހިނގާފައިވަނީ ޑރ. އަފްރާޝީމް އަވަހާރަކޮށްލުމަށްފަހު ކަމަށް ނާޒިމް ބަޔާނުގައި ފާހަގަކޮށްފައިވެ އެވެ.
"މިކަން ފާހަގަ މިކުރާ ސަބަބަކީ، އަދީބު އޭރު ހުރީ ކޮންމެ ފަދަ ކަމެއް ފަދަ ސަބަބެއް ކުރިމަތި ކުރުވައިގެން ނަމަވެސް، ރައީސް ނަޝީދަށް 2013ގެ އިންތިހާބު ބައިވެރި ނުވެވޭ ގޮތް ހެދުމަށެވެ." ނާޒިމް ވިދާޅުވި އެވެ.
ނާޒިމް ވިދާޅުވެފައި ވަނީ، ޑރ. އަފްރާޝީމްގެ މަރުގެ މައްސަލަ ރައީސް ނަޝީދުގެ ބޮލުގައި އަޅުވައިގެން އެމަނިކުފާނަށް އިންތިހާބުގައި ބައިވެރި ނުވެވޭ ގޮތް ހެދުމުގެ "މޯޓިވް" އެއް އޮތުމަކީވެސް އެކަށީގެންވާ ކަމެކެވެ. ނާޒިމް އެގޮތަށް ބަޔާން ދެއްވި ނަމަވެސް ކޮމީޝަނުން ހޯދުންތަކުން ނިންމާފައިވަނީ، އެފަދަ ކަމަށް ބާރު ލިބޭ ހެއްކެއް ނެތް ކަމަށެވެ.
ނަމަވެސް އަފްރާޝީމްގެ މަރު އެމްޑީޕީ ބޮލުގައި އެޅުވުމަށްޓަކައި އެޭރުގެ ސަރުކާރާއި އެ ސަރުކާރަށް ނިސްބަތްވާ ސިޔާސީ މީހުން ރައްޔިތުންނާއި ބައިނަލްއަގުވާމީ މުޖްތަމައުއަށް އެގޮތަސް ވިސްނާއި ދިނުމަށް މަސައްކަތްކޮށްފައިވާކަން އެނގޭ ކަމަށް ކޮމިޝަނުންގެ ތަހުގީގުން ވަނީ ނިންމާފަ އެވެ.
ރައީސް ނަޝީދަށް އަމާޒުކޮށް ބޮންގޮއްވަން އަދީބު ރޭވިކަން ކާނަލް ނާޒިމް ފަޅާއެރުވާލި އިރު، އެ ދުވަސް ވަރަކީީ، ރައީސް ނަޝީދާއި އެމަނިކުފާނު ނިސްބަތްވާ އެމްޑީޕީން ކާނަލް ނާޒިމަށް ބަޢާވާތުގެ ތުހުމަތު އަޅުވައި ފާޑު ކިޔަމުން ދިޔަ ދުވަސްވަރެކެވެ.