ދީނީ އިލްމުވެރިޔާ އަދި ރައްޔިތުންގެ މަޖިލީހުގެ އުނގޫފާރު ދާއިރާ ކުރީގެ މެމްބަރު ޑރ. އަފްރާޝިމް އަލީ އަވަހާރިކޮށްލި މައްސަލައިގައި މަރުގެ މައްސަލަތައް ބަލާ ކޮމިޝަނުން ތައްޔާރުކުރި ސިއްރު ރިޕޯޓު ލީކުވި މައްސަލަ އެ ކޮމިޝަނުން ބަލަން ފަށައިފިއެވެ.
ދެހާސް ބާރަވަނަ އަހަރުގެ އޮކްޓޫބަރު މަހުގެ ދެވަނަ ދުވަހުގެ ދަންވަރު އަފްރާޝީމް މަރާލި ހާދިސާ، ގޮތްނޭނގޭ މަރުގެ މައްސަލަތައް ބަލާ ރިޔާސީ ކޮމިޝަނުން ތަހުގީގުކޮށް ނިންމައި، ރައީސް އޮފީހަށާއި ކަމާ ބެހޭ އިދާރާތަކަށް މިހާރު ވަނީ ހިއްސާކޮށްފައެވެ. އެ ރިޕޯޓުގައި ހުރި ބައެއް މައުލޫމާތުތައް މިހާރު ވަނީ މީޑިއާއަށް ލީކުވެފައެވެ.
ރިޕޯޓު ލީކުވި މައްސަލައިގައި، މިރޭ ކޮމިޝަނުން ވަނީ އަހުމަދު އަޝްރަފު (ޝުމްބާ) ކޮމިޝަނަށް ހާޒިރުކޮށްފައެވެ. ޝުމްބާ ބުނި ގޮތުގައި އޭނާ ކޮމިޝަނަށް ހާޒިރު ކުރީ އަފްރާޝީމްގެ ރިޕޯޓުގައި ހިމެނޭ ބައެއް މައުލޫމާތުތައް ބައެއް ނޫސްވެރިންނާ ހިއްސާކުރިކަމުގެ ތުހުމަތުކޮށް ކަމަށެވެ.
އެ ތުހުމަތުތައް އޭނާ ވަނީ ދޮގުކޮށްފައެވެ. އޭނާ ބުނި ގޮތުގައި އޭނާއަށް އެ ރިޕޯޓު ލިބިފައިވެސް ނުވެއެވެ.
އެކަމާ ގުޅޭ ގޮތުން މަރު ކޮމިޝަނުގެ ރައީސް ހުސްނުއްސުއޫދަށް ގުޅޭ ގޮތް ވަނީ ނުވެފައެވެ. އޭނާ މިވަގުތު ހުންނެވީ ރާއްޖެއިން ބޭރުގައެވެ.
"ސަން"އަށް އެނގިފައިވާ ގޮތުގައި މަރު ކޮމިޝަނުގެ ރިޕޯޓުގައި ނިންމާފައި ވަނީ އަފްރާޝީމް މަރާލުމުގެ އަޑީގައި ތިބީ ރާއްޖޭގައި ހަރަކާތްތެރިވާ ދީނީ ހައްދުފަހަނައަޅާފައިވާ ގްރޫޕަކުން ކަމަށެވެ.
އަފްރާޝީމްގެ މަރާ ގުޅޭ ރިޕޯޓުގެ ހޯދުންތައް އަދި އާންމުކޮށްފައި ނުވާ ނަމަވެސް، އެނގިފައިވާ ގޮތުގައި މާދަމާ އެކަމުގެ މައުލޫމާތު ސަރުކާރުން މާދަމާ ހާމަ ކުރާނެއެވެ. މާދަމާއަކީ ސަރުކާރަށް އެއް އަހަރު ފުރޭ ދުވަހެވެ.