ދިރިއުޅުމުގައި ދިމާވާ ކުއްލި ކަންކަމުން ތަހައްމަލު ކުރަންޖެހޭ ދަތިތަކަށް ލުޔެއް ހޯދައިދިނުމަށްޓަކައި މޯލްޑިވްސް އިސްލާމިކް ބޭންކް (އެމްއައިބީ) އާއި އަމާނާ ތަކާފުލްއިން "ފެމިލީ ސަޕޯޓް ކަވާ"ގެ ގެ ނަމުގައި ތަކާފުލް ސްކީމެއް ތައާރަފްކޮށްފި އެވެ.
އެމްއައިބީން ބުނީ އަހަރަކު 265 ރުފިޔާ ދައްކައިގެން އެ ބޭންކުގެ ހުރިހާ ކަސްޓަމަރުންނަށް ވެސް އެ ސްކީމުގައި ބައިވެރިވުމުގެ ފުރުސަތު ހުޅުވާލާފައިވާ ކަމަށެވެ.
ފެމިލީ ސަޕޯޓް ކަވާ ސްކީމް ފަރުމާކޮށްފައިވަނީ ދިރިއުޅުމުގައި ދިމާވެދާނެ އެއްކްސިޑެންޓްއެއްގެ ސަބަބުން ފުރާނަޔަށް ލިބޭ ގެއްލުންތަކާއި ނުކުޅެދުންތެރިކަމެއް ދިމާވުން ނުވަތަ ހޮސްޕިޓަލްގައި އެޑްމިޓްކުރަން ޖެހުން ފަދަ ކަންކަމުން ދިމާވާ މާލީ ދަތިތަކަށް ލުޔެއް ލިބޭ ގޮތަށެވެ.
އެކްސިޑެންޓްތަކުގެ އިތުރުން އެ ސްކީމުން ބަދަލު ހޯދައިދޭ ކަންކަމުގެ ތެރޭގައި އަލިފާނުގެ ހާދިސާ، ޑެންގީ ނުވަތަ ޗިކަން ގުންޔާ ޖެހިގެން ހޮސްޕިޓަލްގައި ބޭއްވުން އަދި ހައްޖު ނުވަތަ ޢުމްރާގެ އަޅުކަމުގައި ހޮސްޕިޓަލްގައި އެޑްމިޓް ކުރުން ހިމެނެ އެވެ.
ފެމިލީ ސަޕޯޓް ކަވަރ އިން ލިބޭ ފައިދާތަކުގެ ތެރޭގައި ދިމާވާ އެކްސިޑެންޓެއްގެ ސަބަބުން ނިޔާވެއްޖެނަމަ ނުވަތަ ދާއިމީ ނުކުޅެދުންތެރިކަމެއް ކުރިމަތިވެއްޖެނަމަ ބަދަލުގެ ގޮތުގައި 100،000 ލިބޭނެ އެވެ.
އަދި އެކްސިޑެންޓެއްގެ ސަބަބުން އެނދުމަތި ކުރަން ޖެހިއްޖެނަމަ 6 މަހުގެ މުއްދަތަކަށް ފައިސާގެ އެހީގެ ގޮތުގައި މަހަކު 5،000 ރުފިޔާ ބިލްތައް ދެއްކުމަށް މަހަކު 1،000 ރުފިޔާ އަދި ސްކޫލް ފީ ދެއްކުމަށް މަހަކު 1،500 ރުފިޔާ ލިބޭނެ އެވެ.
މީގެ އިތުރުން އަލިފާނުގެ ސަބަބުން ދިރިއުޅޭތަނުގައި ދިރިނޫޅެވޭ ހާލަތްތަކާއި އެފަދަ ހާލަތްތަކުގައި ގޭގެ ވެރި ފަރާތަށް ދިނުމަށްޓަކައ،ި ކޮންމެ ހާލަތެއްގައި 10،000 ލިބޭނެ އެވެ.
ޑެންގޫ ނުވަތަ ޗިކުންގުންޔާ ޖެހިގެން އެޑްމިޓްކޮށްފިނަމަ 7،500 ރުފިޔާ ލިބޭއިރު، ހައްޖު ނުވަތަ އުމްރާއަށް ގޮސް ސައުދީ އަރަބިއްޔާގައި އެއްވެސް ބައްޔެއްގެ ސަބަބުން އެޑްމިޓްކޮށްފިނަމަ 10،000 ރުފިޔާ ލިބޭނެ އެވެ.
އެމްއައިބީން ބުނީ އެ ސްކީމްގައި ބައިވެރިވެފައިވާ ފަރާތެއް އެޑްމިޓްވާ ހާލަތްތަކުގައި އެ ފަރާތަކަށް ކޮންމެ މަހަކު ލިބޭ އާމްދަނީ ފޫބެއްދުމަށްޓަކައި ވެސް އެ ސްކީމުން ފައިސާ ލިބޭނެ ކަމަށެވެ.
އޭގެ ތެރޭގައި ގޭގެ ފެނާއި ކަރަންޓުގެ ހަރަދަށް ދޭ ފައިސާއާއި އަދި ކުދިންގެ ކިޔެވުމުގެ ކަންކަމަށް ދޭ ފައިސާ ހިމެނެ އެވެ.