އިސްލާމްދީނަށް ފުރައްސާރަކޮށް ނެރުނު ރިޕޯޓު ތައްޔާރު ކުރުމަށް އިސްކޮށްއުޅުއްވި މޯލްޑިވިއަން ޑިމޮކްރެޓިކް ނެޓްވޯކް(އެމްޑީއެން)ގެ އެގްޒެކިއުޓިވް ޑިރެކްޓަރު ޝަހިންދާ އިސްމާއިލްއަށް މަރުގެ އިންޒާރުދީގެން ފުވައްމުލަކުން ހައްޔަރު ކުރި މީހާ ދޫކޮށްލައިފި އެވެ.
މިދިޔަ މަހުގެ 26 ވަނަ ދުވަހު ސޯޝަލް މީޑިއާގައި މީހުންނަށް އިންޒާރުދީ މުޖުތަމައުގައި މީހުންގެ މެދުގައި ބިރުވެރިކަން އުފެދޭ ގޮތަށް އަނިޔާވެރިވުމަށް ހިތްވަރުދިނުމަށް ހެދި މައްސަލާގައި ފުވައްމުލަކުން ހައްޔަރުކޮށްފައި ވަނީ 19 އަހަރުގެ ފިރިހެނެކެވެ.
ސޯޝަލް މީޑިއާގައި ދައުރުވި ޓުވީޓުތަކުން އެނގޭ ގޮތުގައި އެ ޒުވާނާ ހައްޔަރުކޮށްފައި ވަނީ ޝަހިންދާއާ ގުޅޭ ގޮތުން މީހަކު ކުރި ޓުވީޓެއް، "މަރާލަން ފަހެއް ނުޖެހޭނަން" ކަމަށް ބުނެ އެ ޓުވީޓު ރީޓުވީޓުކޮށްގެން އެވެ.
ދާދި ފަހުން ފާސްކުރި ޓެރަރިޒަމްގެ ގާނޫނުގެ ދަށުން ޝަހިންދާއަށް އިންޒާރުދީގެން އިތުރު މީހަކު ވެސް ހައްޔަރުކުރި އެވެ.
އެމްޑީއެން އިން ނެރުނު ރިޕޯޓެއްގައި އިސްލާމްދީނަށް ފުރައްސާރަކުރި މައްސަލާގައި އެ ޖަމްއިއްޔާ ސަސްޕެންޑްކޮށް، އެ މައްސަލަ ފުލުހުން އަންނަނީ ބަލަމުންނެވެ. އަދި އެ ރިޕޯޓުގައި ދީނާ ހިލާފު ވާހަކަ ހުރިކަމަށް ފުލުހުން ވަނީ ނިންމައިފަ އެވެ.