ބޭންކުތަކުން ވިޔަފާރިތަކަށް ފައިސާ ނުލިބޭ މައްސަލައަށް އޮތް ހައްލަކީ ކެޕިޓަލް މާކެޓް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ބަނޑޮސް އައިލެންޑް ރިސޯޓްގައި މިއަދު ފެށި ކެޕިޓަލް މާކެޓް ފޯރަމް 2019 ފެށުމުގެ ރަސްމިއްޔާތުގައި ވާހަކަ ދައްކަވަމުން ރައީސް ސޯލިހު ވިދާޅުވީ، ރާއްޖޭގެ އިގްތިސާދީ ވަށްބުރުގެ ބޮޑު އިންސައްތައެއް ހިއްސާ ކުރަނީ ކުދި އަދި މެދު ފަންތީގެ ވިޔަފާރިތަކުން ކަމަށެވެ. އަދި ރާއްޖޭގައި ކޮންވެންޝަނަލް އަދި އިސްލާމިކް ބޭންކިންގް ނިޒާމު އޮތް ނަމަވެސް ވިޔަފާރިތަކަށް ކުރިއެރުމުގައި ގޮންޖެހުންތަކެއް އެބަހުރި ކަމަށް ރައީސް ސޯލިހު ވިދާޅުވި އެވެ.
އެންމެ ބޮޑު ގޮންޖެހުމަކީ ވިޔަފާރި ފުޅާކުުރުމަށް ބޭނުންވާނެ ފައިސާ ބޭންކުންތަކުން ނުލިބުކަމަށް ރައީސް ވިދާޅުވި އެވެ.
"އެންމެ ބޮޑު ގޮންޖެހުމަކީ ވިޔަފާރިތަކަށް އެކަށޭނެ މިންވަރަށް ރާއްޖޭގެ މާލީ އިދާރާތަކުން ފަންޑު ލިބޭނެ ގޮތްތައް ނެތުން. ހަމައެކަނި ބޭންކިންގް ނިޒާމުގެ ތެރެއިން ކުންފުނިތަކަށް ބޭނުންވާ މިންވަރަށް މާލީ އެހީތެރިކަން ލިބޭކަށް ނެތް." ރައީސް ވިދާޅުވި އެވެ.
ދުނިޔޭގެ އެހެން ގައުމުތަކުގައި ވެސް އަމަލުކުރާ ފަދައިން ރާއްޖޭގައި ވެސް މި މައްސަލައަށް އޮތް އެންމެ ރަނގަޅު ހައްލަކީ ކެޕިޓަލް މާކެޓް ކަމަށް ރައީސް ވިދާޅުވި އެވެ.
އެގޮތުން ކުރެވިދާނެ ބައެއް ކަންތައްތައް ފާހަގަ ކުރައްވަމުން ރައީސް ސޯލިހު ވިދާޅުވީ ކެޕިޓަލް މާކެޓަކީ ރާއްޖޭގައި ވިޔަފާރިތައް ފެށުމާއި ވިޔަފާރިތައް ކުރިއެރުވުމަށް ބޭނުންވާ ފައިސާގެ އެހީތެރިކަން ފޯރުކޮށްދޭ އިތުރު ވަސީލަތަކަށް ހެދިދާނެ ކަމަށެވެ.
މީގެ އިތުރުން ކުދި އަދި މެދު ފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށް ސަރުކާރުން މިހާރު ފަށާފައިވާ ސްކީމްތައް، ގިނަ އިންވެސްޓަރުންގެ އެހީތެރިކަމާއެކު ކެޕިޓަލް މާކެޓް ނިޒާމުގެ ތެރެއިން ފުޅާ ކުރުމަކީ މުހިންމު ކަމެއް ކަމަށް ރައީސް ވިދާޅުވި އެވެ.
މިއަދު ބަނޑޮސް މޯލްޑިވްސްގައި ބޭއްވި ކެޕިޓަލް މާކެޓް ފޯރަމަކީ އެ ދާއިރާއަށް އަމާޒުކޮށްގެން ކެޕިޓަލް މާކެޓް ޑިވެލޮޕްމަންޓް އޮތޯރިޓީން ބޭއްވި ފުރަތަމަ ފޯރަމް އެވެ. މޯލްޑިވްސް ސްޓޮކް އެކްސްޗޭންޖާ ގުޅިގެން ބޭއްވި އެ ފޯރަމްގެ ޕާޓްނަރުންނަކީ އެމްއެމްއޭ، ބީއެމްއެލް، ޕެންޝަން އޮފީސް އަދި ދިރާގުގެ އިތުރުން ކޯޕަރޭޓް މޯލްޑިވްސް އެވެ.