ބާ ކައުންސިލުގެ އެގްޒެކެޓިވް ކޮމެޓީ އިން އާއިޝާ ޝުޖޫން މުހައްމަދު އިސްތިއުފާ ދެއްވައިފިއެވެ.
ޝުޖޫން އިސްތިއުފާ ދެއްވީ ސުޕްރީމު ކޯޓްގެ ފަނިޔާރުކަމުގެ މަގާމަށް އޭނާ އައްޔަނު ކުރުމަށް ރައްޔިތުންގެ މަޖިލީހުން މިއަދު ރުހުން ދީފައިވަނިކޮށެވެ.
ރާއްޖޭގައި އުފެއްދި ފުރަތަމަ ބާ ކައުންސިލްގެ އެގްޒެކެޓިވް ކޮމެޓީގައި ހިމެނިވަޑައިގެންނެވި ޝުޖޫން އިސްތިއުފާ ދެއްވިކަން ހާމަކުރައްވާ ބާ ކައުންސިލުން ކުރި ޓްވީޓެއްގައި ބުނީ ބާ ކައުންސިލްގެ އެގްޒެކެޓިވް ކޮމެޓީ އިން ޝުޖޫން އިސްތިއުފާ ދެއްވާފައިވާ ކަމަށާއި ބާ ކައުންސިލްގެ އެގްޒެކެޓިވް ކޮމެޓީގައި އިންނަވާ ޝުޖޫން ކޮށްދެއްވި މަސައްކަތްތައް ފާހަގަކޮށް ޝުކުރު އަދާކުރާ ކަމަށެވެ.
ޝުޖޫން ސުޕްރީމު ކޯޓުގެ ފަނޑިޔާރުކަމުގެ މަގާމަށް އައްޔަނު ކުރުމަށް މިއަދުގެ ޖަލްސާގައި ނެގި ވޯޓުގައިި، ފެންނަ ކަމަށް 62 މެންބަރުން ވޯޓު ދެއްވިއެވެ. ޝުޖޫން އަކީ މީގެ ކުރިން ސިވިލް ކޯޓުގެ ފަނިޔާރުކަންވެސް ކުރައްވާފައިވާ ބޭކަނބަލެކެވެ.
ޝުޖޫންއާއެކު އަޒްމިރަލްދާ ޒާހިރުވެސް ސުޕްރީމު ކޯޓުގެ ބެންޗަށް އައްޔަނު ކުރުމަށް މިއަދު ވަނީ މަޖިލީހުން ރުހުންދީފައެވެ. އަޒްމިރަލްދާ އަކީ ހައިކޯޓުގެ ފަނޑިޔާރުކަން ކުރައްވާފައިވާ ބޭކަނބަލެކެވެ.