ސުޕްރީމް ކޯޓުގެ ފަނޑިޔާރުންގެ ގޮތުގައި ޑރ އަޒްމިރަލްދާ ޒާހިރު އަދި އައިޝާ ޝުޖޫނު އައްޔަނުކޮށްދިނުމަށް އެދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރައްޔިތުންގެ މަޖިލީހަށް ފޮނުއްވައިފި އެވެ.
ސުޕްރީމް ކޯޓަށް ފަނޑިޔާރުން އައްޔަން ކުރެވޭނީ ރައްޔިތުންގެ މަޖިލީހުގެ ރުހުން ލިބިގެންނެވެ.
އެނގިފައިވާ ގޮތުން ސުޕްރީމް ކޯޓަށް އައްޔަން ކުރާ ދެ ފަނޑިޔާރުންނަށް ރުހުން ދިނުމުގެ މަސައްކަތް ރައްޔިތުންގެ މަޖިލީހުން މާދަމާ ނިންމާލާނެ އެވެ.
ސުޕްރީމް ކޯޓުގެ ފަނޑިޔާރުންގެ ގޮތުގައި އަޒްމިރަލްދާ އަދި ޝުޖޫން އައްޔަނު ކުރުމަށް ޖުޑިޝަލް ސާވިސް ކޮމިޝަނުގެ ލަފައަކަށް އެދި ރައީސް ހުށަހެޅުއްވުމުން ޖޭއެސްސީއިން ވަނީ އެ ދެ ބޭފުޅުން ސުޕްރީމް ކޯޓުގެ ފަނޑިޔާރުންނަށް އައްޔަން ކުރުމަށް ފެންނަ ކަމަށް ލަފާ ދެއްވާފަ އެވެ.
އަޒްމިރަލްދާ އަދި ޝުޖޫންގެ އިތުރުން ސުޕްރީމް ކޯޓުގެ ފަނޑިޔާރުންގެ މަގާމަށް ކުރިމަތިލީ ހަތަރު ބޭފުޅެއްގެ ނަންވެސް ރައީސް ވަނީ މަޖިލީހަށް ފޮނުއްވާފަ އެވެ.
ސުޕްރީމު ކޯޓުގެ ފަނޑިޔާރުކަމަށް ކުރިމަތިލެއްވި ބޭފުޅުންނަކީ ހައިކޯޓުގެ ފަނޑިޔާރު އަލީ ސަމީރާއި އަބްދުﷲ ހަމީދުގެ އިތުރުން ޝުއައިބު ހުސެން ޒަކަރިޔާ އަދި މުހައްމަދު ނިޔާޒެވެ.
އައިޝާ ޝުޖޫން މުހައްމަދަކީ ސިވިލް ކޯޓުގެ ގާޒީކަން ކުރައްވާފައިވާ ބޭފުޅެކެވެ. އަދި ޑރ. އަޒްމިރަލްދާ ޒާހިރަކީ ހައިކޯޓުގެ ފަނޑިޔާރުކަން ކުރައްވާފައިވާ ބޭފުޅެކެވެ.
ސުޕްރީމް ކޯޓުގެ ފަނޑިޔާރު ކަމަށް އަންހެން ބޭފުޅުން އައްޔަން ކުރާތީ ބައެއް ދީނީ އިލްމުވެރިން ވަނީ ކަންބޮޑުވުންފާޅު ކުރައްވާފައެވެ.