ކުރީގެ ނައިބު ރައީސް އަހުމަދު އަދީބާ ގުޅިގެން އެމްއެމްޕީއާރުސީގެ ބޮޑު ކޮރަޕްޝަންގެ ބައެއް ކަންކަން ފޮރުވަން ދައުލަތުގެ ޓެކްސް އިދާރާ، މީރާގެ ތެރެއިން މަސައްކަތް ކުރި ކަމުގެ ތުހުމަތު މާލިއްޔަތު ކޮމިޓީގެ ބައެއް މެންބަރުން މިއަދު ކުރައްވައިފި އެވެ.
އެމްއެމްޕީއާރުސީ ހިޔާނާތުގެ އޮޑިޓް ރިޕޯޓްގެ ދިރާސާއަށް، މީރާގެ ވެރިޔާ ކޮމިޝަނާ ޖެނެރަލް އޮފް ޓެކްޒޭޝަން ޔަޒީދު މުހައްމަދާއި އެ އިދާރާގެ އިސްވެރިން މިއަދު ވަނީ ކޮމިޓީއަށް ހާޒިރުކޮށްފަ އެވެ.
އެ ބައްދަލުވުމުގައި ކޮމިޓީ މެންބަރު ދާންދޫ ދާއިރާގެ މެންބަރު ޔައުގޫބް އަބްދުﷲ ޔަޒީދަށް އަމާޒުކުރެއްވި ސުވާލަކީ، އެމްއެމްޕިއާރުސީގެ ކޮރަޕްޝަނާ ގުޅޭ އޮޑިޓަށް މައުލޫމާތު ހޯދުމަށް އޮޑިޓް އޮފީހުން ތަކުރާރުކޮށް އެދުމުން ވެސް އެ މައުލޫމާތު ނުދީ ހިފެހެއްޓި ސަބަބާ ގުޅޭ ގޮތުން އެވެ. މީގެ އިތުރުން އޮޑިޓް އޮފީހުން ހޯދަން އެދުނު މައުލޫމާތުތަކުގެ ތަފްސީލް އޭރުގެ މިނިސްޓަރު އަދީބާ ހިއްސާކުރިންތޯ ވެސް ޔައުގޫބް ސުވާލު ކުރެއްވި އެވެ.
އެ ސުވާލުތަކާ ގުޅިގެން ޔަޒީދު ވިދާޅުވީ، އެމްއެމްޕީއާރުސީގެ ހިޔާނާތާ ގުޅިގެން އޮޑިޓް އޮފީހުން އެންމެ ފުރަތަމަ ހޯދަން ބޭނުންވީ މޮންޓިލިއަމްގެ ކުންފުނީގެ މައުލޫމާތު ކަމަށެވެ. -- މޮންޓިލިއަމް އަކީ ވެސް އެމްއެމްޕީއާރުސީގެ ހިޔާނާތުގެ ފައިސާ ވަތް ކަމަށް ތުހުމަތުވާ ކުންފުންޏެކެވެ. --
އެކަމާ ގުޅިގެން އޮޑިޓް އޮފީހާ މީރާއިން ބައްދަލުވުމެއް ބާއްވާ ދެވެން ހުރި މައުލޫމާތު ދީފައިވާ ކަމަށް ވެސް ޔަޒީދު ވިދާޅުވި އެވެ. އެހެން ނަމަވެސް އޭގެ ފަހުން، ދ. މާގައު ކިޔާ ރަށެއްގެ އެއްބަސްވުމެއް މީރާއަށް ލިބިފައިވޭތޯ އެ އޮފީހުން ސުވާލު ކުރި ކަމަށާއި އެކަމާ ގުޅިގެން އެއީ ލިބިފައި ނެތް އެއްބަސްވުމެއް ކަމަށް އޮޑިޓަށް ދަންނަވާފައިވާ ކަމަށް ވެސް ވިދާޅުވި އެވެ.
ޔަޒީދު ވިދާޅުވި ގޮތުގައި އޭގެ ފަހުން އޮޑިޓް އޮފީހުން އެދުނީ، ކުންފުންޏެއްގެ ޓެކްސް ރިޓާން ދިނުމަށް ކަމަށާއި ނަމަވެސް އެ މައުލޫމާތަކީ ޓެކްސް ޕޭޔަރެއްގެ ޒާތީ މައުލޫމާތު ކަމަށް ވާތީ އެކަން މީރާގެ ބޯޑްގައި އެޖެންޑާ ކުރި ކަމަށެވެ. އަދި އެގޮތަށް ޓެކްސް ޕޭޔަރުންގެ މައުލޫމާތު ދެވޭނެ ގޮތްތަކެއް ގާނޫނުގައި ބުނެފައި ވާތީ، އެ މައުލޫމާތު ނުދެވޭނެ ކަމަށް ނިންމީ ބޯޑުން ކަމަށް ވެސް ޔަޒީދު ވިދާޅުވި އެވެ.
"މީރާއިން ދޭން ޖެހޭ އެއްބާރުލުން އަބަދުވެސް އޮޑިޓަށް ދީފައި އޮންނާނީ. ތިޔަބޭފުޅުން އޭގެ ފަހުން އޮޑިޓްތައް ބައްލަވާލެއްވީމާ އެނގޭނެ. އަޅުގަނޑުމެން ކަމެއް ކުރި ކަމަކަށް އެޔަކު ނޯންނާނެ،" ޔަޒީދު ވިދާޅުވި އެވެ. "ގާނޫނީ ލަފާވެސް ހޯދައިގެން ބޯޑުން އެގޮތަށް ނިންމާފައި އޮތީ. މީގެ ކުރިންވެސް އެފަދަ ކަންކަމުގައި އަމަލުކޮށްފައި އޮންނަ ގޮތަށް،"
މީގެ އިތުރުން ޔަޒީދު ވިދާޅުވީ މީރާގައި އޮންނަ އުސޫލުތަކުގެ ބޭރުން އޭރުގެ ޓޫރިޒަމް މިނިސްޓަރާ މުއާމަލާތްކޮށްފައި ނުވާނެ ކަމަށާއި މައުލޫމާތު ވެސް ހިއްސާކޮށްފައި ނުވާނެ ކަމަށެވެ. އަދި އޮޑިޓް އޮފީހުން ދޭން އެދުނު މައުލޫމާތު، އަދީބުގެ އަމިއްލަ އީމެއިލްއަށް ފޮނުވާފައި ނުވާނެ ކަމަށް ވެސް ޔަޒީދު ވިދާޅުވި އެވެ. އަދި އަދީބާ އެކު އަމިއްލަ ހައިސިއްޔަތަކުން މުއާމަލާތްތައް ހިންގާފައި ނުވާ ކަމަށް ވެސް އޭނާ ވިދާޅުވި އެވެ.
"އެއްވެސް މައުލޫމާތެއް މީރާއިން ގާނޫނާއި ގަވާއިދާ ހިލާފަށް އެއްވެސް ފަރާތަކަށް ދީ އެފަދަ ކަމެއް ކޮށްފައެއް ނޯންނާނެ،" ޔަޒީދު ވިދާޅުވި އެވެ. "މީރާއިން ހިއްސާކުރި މައުލޫމާތެއް ވެއްޖިއްޔާ ހުންނާނީ މީރާގެ ސާވާތްރޫކޮށް ގޮސްފައި،"
އެ ޖަވާބާ ގުޅިގެން ޔައުގޫބް ވިދާޅުވީ އޭނާ އެ ސުވާލުތައް ޔަޒީދަށް އަމާޒުކުރަނީ، އަދީބާއި ޔަޒީދާ ދެމެދު ކޮށްފައި ހުރި މުއާމަލާތްތަކުގެ ޗެޓް ލޮގް އޭނާއަށް ލިބިފައިވާތީ އެޔަށް ރިއާޔަތްކޮށް ކަމަށެވެ. އެހެން ނަމަވެސް ޔަޒީދު ވިދާޅުވީ؛ "ތިކަހަލަ ވާހަކައެއް އަދި އެއްވެސް މީހަކު މިހާތަނަށް އަޅުގަނޑާ ޝެއާ ނުކުރާ" ކަމަށެވެ.
ޔަޒީދު އިތުރަށް ވިދާޅުވީ، ރަށްތައް ކުއްޔަށް ދީގެން ލިބޭ ފައިސާ ދައުލަތަށް ހޯދުމުގެ މަސައްކަތަކީ ގާނޫނީ ގޮތުން މީރާގެ މެންޑޭޓްގައި އޮންނަ ކަމެއް ނޫން ކަމަށެވެ. އަދި ރަށްރަށް ކުއްޔަށް ދިނުމުގެ އެގްރިމަންޓްތައް ހުންނަނީ މީރާއަށް އެ ފައިސާ ދައްކާ ގޮތަށް ނޫން ކަމަށާއި ނަމަވެސް އެއީ ޓޫރިޒަމުން ބަލައިގަންނަން ޖެހޭ ފައިސާއެއްގެ ގޮތުގައި ކަމަށެވެ. ނަމަވެސް، ޓެކްސްގެ ގޮތުގައި ނުހިމެނޭ ފައިސާ ވެސް ކަމާ ގުޅޭ އިދާރާއަކުން ހަވާލުކޮށްފި ނަމަ އެތަކެތި ބަލައިގަތުމުގެ މަސައްކަތް މީރާއިން ކުރަމުން ގެންދާ ކަމަށެވެ. ނަމަވެސް އެ ފައިސާގެ ކަންކަމާ ގުޅޭ ސިޔާސަތުތަކާއި އެއްބަސްވުންތައް އެކުލަވާލުން އޮންނަނީ ކަމާ ގުޅޭ އިދާރާއެއްގެ ޒިންމާއެއްގެ ދަށުގައި ކަމަށް ވެސް ޔަޒީދު ވިދާޅުވި އެވެ.
"އަޅުގަނޑުމެންގެ މެންޑޭޓްގައި ނެތް ކަމެއް އަޅުގަނޑުމެންނަކަށް ނޭނގޭނެ. މީރާއަށް މި އޮންނަ މެންޑޭޓް އަކީ ހަމައެކަނި ޓެކްސްގެ ގާނޫނުގެ ދަށުން ހޯދަން ޖެހޭ ޓެކްސް ފައިސާ ހޯދުން. އެއީ އަޅުގަނޑުމެންގެ މެންޑޭޓް. ދެން މި ހުންނަނީ އެހެން ފަރާތްތަކުގެ ކަލެކްޓް ކުރަން އަޅުގަނޑުމެންނާ ހަވާލު ކުރާ ފައިސާ،" ޔަޒީދު ވިދާޅުވި އެވެ.
ރަށްތައް ކުއްޔަށް ދޭން އެކި ފަރާތްތަކާ އެކު ހަދާފައިވާ އެއްބަސްވުންތަކުގެ ތެރެއިން، އެމްއެމްޕީއާރުސީގެ މައްސަލަ ކުރިމަތިވީއިރު މީރާއަށް ލިބިފައި އޮތީ 11 އެއްބަސްވުމެއް ކަމަށް ވެސް ޔަޒީދު ވިދާޅުވި އެވެ. އެހެން ނަމަވެސް، ޓޫރިޒަމް މިނިސްޓްރީއިން މިހާރު ހުރިހާ އެއްބަސްވުންތައް މީރާއާ ހިއްސާކޮށްފައިވާ ކަމަށް ވެސް ޔަޒީދު ވިދާޅުވި އެވެ.
އޭނާ ވިދާޅުވީ، ފައިސާ ހޯދުމަށް މީރާއާ އެއްވެސް މުއައްސަސާއަކުން ހަވާލުކޮށްފި ނަމަ އެކަން ކުރަނީ ހަރުދަނާ އުސޫލުތަކެއްގެ ތެރެއިން ކަމަށެވެ. އަދި ދައުލަތަށް އެކި ފަރާތްތަކުން ދައްކަން ޖެހޭ ފައިސާގެ ކަންތައްތަކާ ގުޅިގެން ސިސްޓަމެއް އޮންނަ ކަމަށް ވެސް ޔަޒީދު ވިދާޅުވި އެވެ. އެ ސިސްޓަމްގެ ބޭރުން އެއްވެސް ކަމެއް ކުރުމުގެ ފުރުސަތު މީރާގެ ތެރެއިން ނުލިބޭނެ ކަމަށް ވެސް ވިދާޅުވި އެވެ.