ސޯޝަލް މީޑިއާ އެކްޓިވިސްޓް އަހްމަދު އަޝްރަފް (ޝުމްބާ ގޮންގް) ސްރީލަންކާގައި ހުއްޓާ، ހައްޔަރުކޮށްގެން މާލެ ގެނައި މައްސަލައިގައި ކުރީގެ ހޯމް މިނިސްޓަރު އުމަރު ނަސީރާއި ފޮރިން މިނިސްޓަރު ދުންޔާ މައުމޫންއާ އެހެން ބައެއް ފަރާތްތަކާ ދެކޮޅަށް ޖިނާއީ ތަހުގީގެއް ހިންގައި ދައުވާ ކޮށްދިނުމަށް އޭނާ އެދިއްޖެ އެވެ.
ޝުމްބާ މިއަދު ކުރި ޓުވީޓެއްގައި އެ މައްސަލައިގައި ހިމެނޭ ފަރާތްތަކާ ދެކޮޅަށް ތަހުގީގެއް ހިންގައި ދައުވާ ކޮށްދިނުމަށް އެދި ޕޮލިސް ކޮމިޝަނަރު މުހައްމަދު ހަމީދަށް އޭނާ ވަނީ ސިޓީއެއް ފޮނުވައިފަ އެވެ.
ޝުމްބާ ދައުވާކޮށްދޭން އެދިފައި ވަނީ އުމަރާއި، ދުންޔާގެ އިތުރުން ސްރީލަންކާއަށް އޭރު ކަނޑައަޅުއްވާފައި ހުންނެވި ރާއްޖޭގެ ސަފީރު ޒާހިޔާ ޒަރީރު އާއި، އޭރުގެ ޕޮލިސް ކޮމިޝަނަރު އަހްމަދު އަރީފް، އޭރުގެ އޭސީޕީ އާދަމް ނަވާޒް އާއި ފަސްޓް ސެކްރެޓަރީ ހަސަން އާދަމް އަދި ކާނަލް އަހްމަދު ގިޔާސް އާ ދެކޮޅަށެވެ.
ޝުމްބާ މިއަދު ފުލުހުންނަށް ހުށަހެޅި ސިޓީގައި ބުނެފައި ވަނީ އޭނާ "ރަހީނު" ކޮށްފައި ވަނީ 2015 ވަނަ އަހަރުގެ ނޮވެމްބަރު މަހުގެ ފުރަތަމަ ދުވަހު، ކޮން ބައެއް ކަން ނޭނގޭ ބަޔަކާއެކު ދިވެހި ފުލުހުން ލަންކާގެ ބޮރަލެސްގަމުވާގެ ގެއެއްގައި އޭނާ ހުއްޓައި ކަމަށެވެ.
ޖެހިގެން އައި ދުވަހު އޭނާ ލަންކާ އިން ރާއްޖެ ގެނައީ ބަޑި ޖައްސައިގެން އޭނާގެ ނުރުހުމުގައި ކަމަށް ވެސް ޝުމްބާ އޭނާގެ ސިޓީގައި ބުނެފައިވެ އެވެ.
އެހެންކަމުން އެ މައްސަލައިގައި ހިމެނޭ ފަރާތްތަކާ ދެކޮޅަށް ޖިނާއީ ތަހުގީގެއް ހިންގައި ދައުވާ ކޮށްދިނުމަށް ޝުމްބާ ވަނީ އެދިފަ އެވެ.
ޝުމްބާ ހައްޔަރުކޮށްގެން ގެނެސް އޭނާގެ މައްޗަށް ބިރުދެއްކުމުގެ ދައުވާ އުފުލައި ޝަރީއަތް ނިމެންދެން ބަންދުކުރި އެވެ. އޭނާ ގޭބަންދަށް ބަދަލުކުރީ އަހަރަކަށް ވުރެ ގިނަ ދުވަސް ޖަލުގައި ބެހެއްޓުމަށްފަހު 2017 ވަނަ އަހަރުގެ މާޗް އެއް ވަނަ ދުވަހު އެވެ.
ޝުމްބާ ގޭބަންދުން ދޫކޮށްލުމަށް އަމުރުކޮށްފައި ވަނީ މިދިޔަ އަހަރުގެ ޑިސެމްބަރު މަހުގެ ފަހުކޮޅު އެވެ.
ޝުމްބާ ހައްޔަރުކޮށްގެން މާލެ ގެނައި މައްސަލައިގައި ދައުވާކޮށްދިނުމަށް އެދިފައިވާއިރު، ރައީސް އިބްރާހިމް މުހައްމަދު ސޯލިހު ވެސް ވަނީ ޝުމްބާ ލަންކާ އިން ހައްޔަރުކޮށްގެން ގެނައީ ލަންކާގެ ގާނޫނުތަކާ ހިލާފަށް ކަމަށް ވިދާޅުވެފަ އެވެ.