ވިލުފުށީ ދާއިރާގެ ކުރީގެ މެންބަރު ރިޔާޒު ރަޝީދުގެ މެރީޑިއަމްއިން ތެޔޮ ގަތުމަށް ފަހު އެސްޓީއޯއަށް ނުދައްކާ ހުރި، 19 މިލިއަން ރުފިޔާގެ މައްސަލަޔާ ގުޅޭ ލިޔެކިޔުންތައް ފެނިފައިވާ ކަމަށް އެސްޓީއޯއިން ބުނި ބުނުމަކީ ޝަރީއަތަށް ނުފޫޒު ފޯރުވުމުގެ ގޮތުން ކޮށްފައިވާ ކަމެއް ކަމަށް ދެކެމެވެ.
މެރީޑިއަމުން މިއަދު ނެރުނު ބަޔާނެއްގައި ބުނެފައި ވަނީ އެ ކުންފުންޏާ ގުޅޭ މައްސަލައެއްގެ ޝަރީއަތުގެ އަޑުއެހުންތައް ނިމި، ހައިކޯޓުގައި އެ މައްސަލަ ބަލަމުން ދަނިކޮށް ޝަރީއަތަށް ޖަވާބުދާރީވުމުގެ ބަދަލުގައި އާންމުކޮށް އިއުލާންކޮށްގެން އެސްޓީއޯ އިން ކުއްލިއަކަށް އިތުރު ލިޔުންތަކެއް ފެނިއްޖެ ކަމަށް ބުނުމަކީ ހިނގަމުންދާ ޝަރީއަތަށް ބާރު ފޯރުވައި ނުފޫޒު ފޯރުވުމަށްޓަކައި ކުރާ ކަމެއް ކަމުގައި ނޫނީ ނުވާނެ ކަމަށް އެ ކުންފުނިން ދެކޭ ކަމަށެވެ.
އެ ކުންފުނީގެ ފަރާތުން އަބަދުވެސް މަސައްކަތްކޮށްފައިވާނީ ގާނޫނާއި ގަވާއިދުގެ ތެރެއިން ހުރިހާ މުއާމަލާތްތަކެއް ހިންގުމަށް ކަމަށް ވެސް އެ ބަޔާނުގައިވެއެވެ.
މިހާރު ހައިކޯޓުގައި ބަލަމުންދާ މައްސަލަ އަކީ ކުރީގެ ރައީސް މުހައްމަދު ނަޝީދުގެ ސަރުކާރުގައި ވެސް ބަލައި ހޯދާފައިވާ މައްސަލައެއް ކަމަށާއި އެ ކުންފުނިން މަސައްކަތްކޮށްފައި ވަނީ ގާނޫނުގެ ތެރެއިންކަން އޭރުވެސް ހާމެވެފައިވާ ކަމަށް އެ ބަޔާނުގައިވެއެވެ.
މެރީޑިއަމުން ބުނީ މިއަދު އެސްޓީއޯ އިން ކުރަމުންދާ މަސައްކަތަކީ ހަގީގަތެއް ނެތި ޝަރީއަތަށް ނުފޫޒު ފޯރުވުމަށްޓަކައި ކަންކަތައްތަކެއް އުފަންކުރުމަށް ކުރަމުންދާ މަސައްކަތްތަކެއް ކަމަށެވެ.
ރައްޔިތުން މަޖިލީހުގެ ސްޓޭޓް އޯން އެންޓަޕްރައިސަސް ކޮމިޓީގައި ވާހަކަ ދައްކަވަމުން އެސްޓީއޯގެ މެނޭޖިން ޑިރެކްޓަރު ހުސެއިން އަމުރު މުހައްމަދު ރަޝާދު ވިދާޅުވީ، މެރީޑިއަމްއިން ދައްކަން ޖެހޭ 19 މިލިއަން ރުފިޔާއާ ގުޅޭ ޕްރިންޓެޑް ލިޔެކިޔުންތައް ގެއްލިފައިވީ ނަމަވެސް، އެ ލިޔުންތަކުގެ އަސްލު ކޮމްޕިޔުޓަރު ސިސްޓަމްތަކަކުން ފެނިފައިވާ ކަމަށެވެ. އަދި އެތަކެތި މިހާރު ހައިކޯޓާ ހަވާލުކޮށް މައްސަލަ ނިންމައި ދިނުމަށް އެދިފައިވާނެ ކަމަށް ވެސް އޭނާ ވިދާޅުވި އެވެ.
"ފުނަދޫގައި ހުއްޓާ ޑޮކިއުމަންޓްތައް ގެއްލިފައި ވަނީ. އޭރު އެތާ ސީސީޓީވީއެއް ނުހުރޭ. އެކަމަކު އަޅުގަނޑުމެން ސިސްޓަމްތަކުން އެ ޑޮކިއުމަންޓްތައް ހޯދައިގެން އެ ޑޮކިއުމަންޓްތައް އެނަލައިޒް ކުރަން ވާނީ ފުލުހުންނަށް ވެސް ހުށަހަޅާފައި،" އަމުރު ވިދާޅުވި އެވެ.
އޭނާ ވިދާޅުވީ އެ މައްސަލަ ހައިކޯޓްގައި ނުނިމި ގިނަ ދުވަސްވަމުން އަންނާތީ ކުންފުންޏަށް ބޮޑެތި ގެއްލުންތަކާ ކުރިމަތިވާ ކަމަށެވެ. އެހެންވެ، އެ މައްސަލަ އަވަހަށް ނިންމައި ދިނުމަށް އެދެމުން އަންނަ ކަމަށް ވެސް ވިދާޅުވި އެވެ.
ފަހުން ފައިސާ ދައްކާ ގޮތަށް އެސްޓީއޯއިން މެރީޑިއަމްއަށް ދޫކުރި ތެލަށް 19.3 މިލިއަން ރުފިޔާ ހޯދުމަށް އެސްޓީއޯއިން އެންމެ ފުރަތަމަ ސިވިލް ކޯޓްގައި ދައުވާ ކުރީ، 2016 ވަނަ އަހަރުގެ ތެރޭގަ އެވެ. އެހެން ނަމަވެސް، ލިޔެކިޔުންތައް ނުދެވިގެން ސިވިލް ކޯޓުން އޭރު ހުކުމް ކުރީ އެސްޓީއޯއިން މެރީޑިއަމްއަށް ތެޔޮ ދިންކަން ސާބިތު ނުވާތީ އެ ފައިސާ ދައްކަން އަމުރު ކުރާނެ ތަނެއް ނެތް ކަމަށެވެ.