ރަސްފަންނު ސަރަހައްދުގައި 28 ބުރީގެ ހަތަރު ޓަވަރު ހަދަން މިދިޔަ ސަރުކާރުން ހަވާލުކުރި ކޮރެލް ބޮލެވާޑް ކުންފުނި ނުފިލާ ކަމަށާއި އެމަޝްރޫއުގެ މަސައްކަތްތަކާ ގުޅޭ ގޮތުން މިނިސްޓްރީއާ މަޝްވަރާތައް ކުރަމުންދާ ކަމަށް ހައުސިން އެންޑް އާބަން ޑިވަލޮޕްމަންޓް މިނިސްޓަރު އާމިނަތު އާތިފާ ޝަކޫރު ވިދާޅުވެއްޖެ އެވެ.
ރައީސް ޔާމީންގެ ސަރުކާރުގައި 220 މިލިއަން ޑޮލަރުގެ ކޮރަލް ބޮލެވާޑްގެ މަޝްރޫއުގެ ބިންގާ އެޅީ މިދިޔަ އަހަރު ޖުލައި މަހުއެވެ. ނަމަވެސް ސަރުކާރު ބަދަލުވެ، މާލޭގައި ހައުސިންގެ އިތުރު މަޝްރޫއެއް ކުރިއަށް ނުގެންދިޔުމަށް ސިޔާސަތަށް ގެނައި ބަދަލާއެކު ސަރުކާރުން އެ މަޝްރޫއު ހުޅުމާލެއަަށް ބަދަލުކުރުމަށް ނިންމި އެވެ.
އެ ކުންފުނިން ވަނީ އޭރު ބައެއް ފަރާތްތަކަށް ފުލެޓް ވިއްކާ، މިލިއަނުން ޑައުންމޭޏްޓްގެ ގޮތުގައި ފައިސާވެސް ނަގާފައެވެ. އެ ފަރާތްތަކުން އެ ކުންފުންނާއެކު މުއާމަލާތް ނުކުރެވޭތީ އެ ފަރާތްތަކުން ވަނީ ކުންފުނިން ފައިސާ ނެގުމަށްފަހު "ފިލާފައިވާ" ކަމަށް ބުނެފައެވެ.
އެކަމާ ގުޅިގެން މިއަދު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު އާތިފާ ވިދާޅުވީ، ބޮލެވާޑާއެކު މިނިސްޓްރީއާ އޮތް ގުޅުން އެއްވެސް ވަރަކަށް ކުޑަވެފައިނުވާ ކަމަށެވެ. މިހާރުވެސް މިނިސްޓްރީއާއެކު މަޝްރޫއާ ގުޅޭގޮތުން މަޝްވަރާ ކުރަމުންދާ ކަމަށް މިނިސްޓަރު ވިދާޅުވިއެވެ.
"އެއްވެސް ގޮތަކަށް އެބޭފުޅުން ސީން އިން ގެއްލިފައެއްނެތް. އެމީހުންނާއެކީގައި ވަރަށް ހަރުދަނާ މަސައްކަތްތަކެއް ކުރެވި މިކަންތައްތައް ދެފަރާތަށްވެސް އެންމެ ރަނގަޅު ގޮތަކަށް ކުރެވޭތޯ ދަނީ މަސައްކަތް ކުރަމުން،" މިނިސްޓަރު ވިދާޅުވި އެވެ
ހައުސިންގް މިނިސްޓަރު އައިމިނަތު އާތިފާ ޝަކޫރު -- ސަން ފޮޓޯ/ ފަޔާޒު މޫސާ
މިނިސްޓަރު ވިދާޅުވީ، އިއްޔެވެސް އެ ކުންފުންޏާއެކު މަޝްވަރާތައް ކުރެވި، ހުށަހެޅުންތައް ބަދަލު ކުރެވިފައިވާ ކަމަށެވެ. އަދި އެ ކުންފުންޏަށް އިތުރު ހުށަހެޅުންތައް ހުށަހެޅުމަށް ދެހަފްތާގެ މުއްދަތު ދިނުމަށް ކުންފުނިން އެދިފައިވާތީވެ، އެ މުއްދަތު ކުންފުންޏަށް ދީފައިވާ ކަމަށް މިނިސްޓަރު ވިދާޅުވި އެވެ.
އެ މަޝްރޫއުން ފްލެޓް ގަތުމަށް ފައިސާ ދެއްކި މީހުންނަށް ކުންފުންނާ ނުގުޅޭ ކަމަށް ދެއްކެވޭ ވާހަކަތަކާ ގުޅިގެން، އާތިފާ ވިދާޅުވީ އެފަދަ ޝަކުވާއެއް އެމިނިސްޓްރީ އަށް ހުށަހެޅިފައި ނެތް ކަމަށެވެ. ނަމަވެސް އެއްވެސް ފަރާތެއްގެ ކަންބޮޑުވުމެއް ވާ ނަމަ އެ މިނިސްޓަރީގެ މެއިލް އަށް ހިއްސާ ކުރެއްވުމަށް މިނިސްޓަރު އެދިވަޑައިގެންވި އެވެ.
"އިންވެސްޓާއަށް ދެއްކި ފައިސާ އެއީ. [ފައިސާ ދެއްކި ފަރާތްތަކުން އެދޭނަމަ] އަޅުގަނޑުމެން މެދުވެރިވެދޭނަން، އެ މައްސަލަ ހައްލު ކުރުމަށް. އެ ފަރަތްތަކާ މެދު ވީ އެންމރަނގަޅު ގޮތަކީ ކޮބާތޯ ބަލަން،" މިނިސްޓަރު ވިދާޅުވިއެވެ.
ނުވަ ފަރާތަަކަށް އެޕާޓްމަންޓް ވިއްކާފައިވާ ކަމަށާއި އެ މުއާމަލާތްތަކުގެ އެވްރޭޖް އަގަކީ، 315،350 ޑޮލަރު ( 4.8 މިލިއަން ރުފިޔާ) ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ހުޅުމާލެއިން ދޭނެ ބިމަކާ މެދު، ހައުސިން ޑީވަލޮމްޕަންޓް ކޯޕަރޭޝަން އިން އާ އެކު ކުރެވުނު މަޝްވަރާތަކުން މިހާރު ހުޅުމާލެއިން ކުންފުނިން ބޭނުންވާ ހިސާބަކުން ކުރިއަށްވުރެ ބޮޑު ބިމެއް ދިނުމަށް ނިންމާފައިވާ ކަމަށެވެ.
"އެޗްޑީސީއާއެކު މިނިސްޓްރީން ކުރަމުންދާ މަޝްވަރާތަކުން ބިމަށް ވާވަރަށް 129،000 އަކަ ފޫޓުގެ ބިން [ދިނުމަށް ވަނީ ކަނޑައަޅާފައި] މާލޭގައި 25 ބުރި އިމާރާތް ވަކި ރޭންޖެއްގައި ހިފެހެއްޓިފައި މިވަނީ. އެޔަށް ވުރެ ތަންކޮޅެއް ބޮޑު ބިމެއް ދިނުމުގެ އުސޫލީ އެއްބަސްވުމެއް ވެފައި މިވަނީ." އާތިފާ ވިދާޅުވިއެވެ.
މީގެ ކުރިން ރަސްފަންނު ސަރަހައްދުން އެކުންފުނިން ދިނީ، 70،000 އަކަ ފޫޓުގެ ބިމެކެވެ. އެގޮތުން މީހާރު މިނިސްޓްރީން ދޭން ނިންމާފައިވަނީ އެ ބިމަށްވުރެ 54 ޕަސަންޓް ބޮޑު ބިމެކެވެ.
މިނިސްތަރު ވިދާޅުވީ، އަދި އެ ކުންފުންޏަށް ދޭނެ ބިމެއް އަދި ކަނޑައަޅާފައި ނުވާ ކަމަށެވެ. އަދި މާލޭގައި މަޝްރޫއު ނުހިންގުމަށް ނިންމުމުން އެކުންފުންޏަށް ދޭން ޖެހޭ ބަދަލެއް ދޭނެ ކަމަށް މިނިސްޓަރު ވިދާޅުވިއެވެ. އަދި އެއީ ކިހާ ވަރެއްގެ ބަދަލެއް ކަމެއް ނޭނގޭ ކަމަށް މިނިސްޓަރު ވިދާޅުވިއެވެ.
އެކުންފުނިން މަޝްރޫއު ހުއްޓާލުމުގެ ވިސްނުންފުޅެއް ނުގެންގުޅުއްވާ ކަމަށާއި އެބޭފުޅުން ތިއްބެވީ މަސައްކަތް ކުރުމަށް ތައްޔާރަށް ކަމަށް މިނިސްޓަރު ވިދޅުވިއެވެ.
ހުޅުމާލެއަށް މަޝްރޫއު ބަދަލު ކުރުމަށް އެންގި އިރު، ބޮލެވާޑް ކުންފުނިން ވަނީ ރަސްފަންނު ސަރަހައްދުގައި، އަޅަން ނިންމި ހަތަރު ޓަވަރުގެ ތެރެއިން އެއް ޓަވަރުގެ ފައުންޑޭޝަންގެ މައިކްރޯޕައިލްސްގެ 13 ޕަސަންޓް މަސައްކަތް ނިމިފައިވާ ކަމަށް ހައުސިން މިނިސްޓްރީން މިއަދު ވަނީ ބުނެފައެވެ.
އެޕާޓްމަންޓް ގަތް ބައެއް ފަރާތްތަކުން ވަނީ ފައިސާ އަނބުރާ ހޯދުމަށް އެ މައްސަލަ ސިވިލް ކޯޓަށް ހުށަހަޅާފައިއެވެ. އެ ފަރާތްތަކުން ބުނި ގޮތުގައި، އެމީހުން އެގްރީމަންޓް ހެދީ މާލެއިން އެޕާޓްމަންޓް ގަތުމަށް ކަމަށާއި މާލޭގައި މަޝްރޫއު ކުރިއަށް ނުދާނަމަ ކުންފުނިން، އެ ފަރާތްތަކަށް ބަދަލު ދޭން ޖެހޭ ކަމަށެވެ.