ރަސްފަންނު ސަރަހައްދުގައި ތަރައްގީކުރުމަށް ނިންމި ކޮރަލް ބޮލެވާޑް މަޝްރޫއު ހުޅުމާލެއަށް ބަދަލުކުރުމަށް ނިންމާފައިވާތީ، އެ ޕްރޮޖެކްޓަށް މާލެއިން ދިން ބިމަށް ވުރެ ބޮޑު ބިމެއް ހުޅުމާލެއިން ދޭން ނިންމާފައިވާ ކަމަށް ހައުސިންގް މިނިސްޓަރު އައިމިނަތު އާތިފާ ޝަކޫރު ވިދާޅުވެއްޖެއެވެ.
މިނިސްޓަރު ވިދާޅުވީ ހުޅުމާލެއިން ކޮރަލް ބޮލެވާޑަށް ދޭން ނިންމާފައިވަނީ މާލެއިން ދިން ބިމަށް ވުރެ 54 ޕަސަންޓު ބޮޑު ބިމެއް ކަމަށެވެ.
ރަސްފަންނު ސަރަހައްދުން 28 ބުރީގެ ހަތަރު ޓަވަރު އެޅުމަށް 70،000 އަކަ ފޫޓަށް ދޫކުރިން މަޝްރޫއު ހުޅުމާލެއަށް ބަދަލުކުރުމަށް އެންގީ، ފުލެޓް އެޅުމުގެ މަޝްރޫއު މާލޭގައި އިތުރަށް ނުހިންގުމަށް މިސަރުކާރުން ސިޔާސަތައް ގެނައި ބަދަލާއެކުއެވެ.
މިއަދު ހައުސިން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އާތިފާ ވިދާޅުވީ، އަދި ހުޅުމާލެއިން އެ ކުންފުންޏަށް ދޭނެ ބިމެއް ކަނޑައަޅާފައި ނުވާ ކަމަށާއި ނަމަވެސް ރަސްފަންނުގެ ބިމުގެ ސަރަހައްދަށް ވުރެ 54 ޕަސަންޓް ބޮޑު ބިމެއް ދިނުމަށް ހުޅުމާލޭ ޑިވަލޮޕްމަންޓް ކޯޕަރޭޝަންއާއެކު މިނިސްޓްރީން ނިންމާފައިވާ ކަމަށެވެ.
"އެޗްޑީސީއާއެކު މިނިސްޓްރީން ކުރަމުންދާ މަޝްވަރާތަކުން ބިމަށް ވާވަރަށް 129،000 އަކަ ފޫޓުގެ ބިން [ދިނުމަށް ވަނީ ކަނޑައަޅާފައި] މާލޭގައި 25 ބުރި އިމާރާތް ވަކި ރޭންޖެއްގައި ހިފެހެއްޓިފައި މިވަނީ. އެޔަށް ވުރެ ތަންކޮޅެއް ބޮޑު ބިމެއް ދިނުމުގެ އުސޫލީ އެއްބަސްވުމެއް ވެފައި މިވަނީ." އާތިފާ ވިދާޅުވިއެވެ.
އާތިފާ ވިދާޅުވީ، މިހާރުވެސް އެކުންފުންޏާއެކު މިނިސްޓްރީން މަޝްވަރާ ކުރަމުންދާ ކަމަށާއި އެކުންފުނި އޮތީ މަޝްރޫއު ހުއްޓާލުމުގެ ވިސްނުމުގައި ނޫން ކަމަށެވެ.
މިނިސްޓަރު ވިދާޅުވީ އެއްޔެވެސް ކުންފުންޏާއެކު މިނިސްޓްރީން މަޝްވަރާ ކުރެއްވި ކަމަށާއި ކުންފުނިން އެދިވަޑައިގަތީ އެބޭފުޅުން ހުށަހަޅަން ޖެހޭ ހުށަހެޅުންތަކާއި ބަދެއް އޮތް ނަމަ އެ ބަދަލެއް ހޯދުމަށް އޮތް ހުށަހެޅުމެއް ހުށަހެޅުމަށް ދެފްތާއެއްހާ ދުވަސް ދިނުމަށް ކަމަށެވެ. އަދި އެ ހުށަހެޅުންތަށް ހުށަހެޅުމަށް ދެ ހަފްތާގެ މުއްދަތު ދީފައިވާ ކަމަށް މިނިސްޓަރު ވިދާޅުވިއެވެ.
މާލޭގައި މަޝްރޫއު ނުހިންގުމަށް ނިންމުމުން އެކުންފުންޏަށް ދޭން ޖެހޭ ބަދަލެއް ދޭނެ ކަމަށް މިނިސްޓަރު ވިދާޅުވިއެވެ. އަދި އެއީ ކިހާ ވަރެއްގެ ބަދަލެއް ކަމެއް އެނގޭނީ ކުންފުނިން ހުށަހަޅާ ހުށަހެޅުމަކުން ކަން މިނިސްޓަރު ވިދާޅުވިއެވެ.
"[ކުންފުންޏަށް ދޭންޖެހޭ] ބަދަލު ހުންނާނެ. ހަތަރު ޓަވަރު އެޅުމަށް ހަރަދުތަކެއް ހިނގައިފި.އިންވެސްޓްމަންޓް ކޮސްޓްތަކާއި އެހެނިހެން ކޮސްޓްތައްވެސް ހުންނާނެ. އަދި ނޭނގެ ކޮބާކަމެއް ބަދަލަކީ،" މިނިސްޓަރު ވިދާޅުވި އެވެ.
މަޝްރޫއުން ފްލެޓް ގަތުމަށް ފައިސާ ދެއްކި މީހުންނަށް ކުންފުންނާ ނުގުޅޭ ކަމަށް ދެއްކެވޭ ވާހަކަތަކާ ގުޅިގެން، އާތިފާ ވިދާޅުވީ އެފަދަ ޝަކުވާއެއް އެމިނިސްޓްރީ އަށް ހުށަހެޅިފައި ނެތް ކަމަށެވެ. ނަމަވެސް އެއްވެސް ފަރާތެއްގެ ކަންބޮޑުވުމެއް ވާ ނަމަ އެ މިނިސްޓްރީ އަށް ހުށަހެޅުމަށް މިނިސްޓަރީގެ މެއިލް އަށް ހިއްސާ ކުރެއްވުމަށް މިނިސްޓަރު އެދިވަޑައިގެންވި އެވެ.
"އިންވެސްޓާއަށް ދެއްކި ފައިސާ އެއީ. [ފައިސާ ދެއްކި ފަރާތްތަކުން އެދޭނަމަ] އަޅުގަނޑުމެން މެދުވެރިވެދޭނަން، އެ މައްސަލަ ހައްލު ކުރުމަށް. އެ ފަރަތްތަކާ މެދު ވީ އެންމެ ރަނގަޅު ގޮތަކީ ކޮބާތޯ ބަލަން،" މިނިސްޓަރު ވިދާޅުވިއެވެ.
ނުވަ ފަރާތަަކަށް އެޕާޓްމަންޓް ވިއްކާފައިވާ ކަމަށާއި އެ މުއާމަލާތްތަކުގެ އެވްރޭޖް އަގަކީ، 315،350 ޑޮލަރު ( 4.8 މިލިއަން ރުފިޔާ) ކަމަށް މިނިސްޓަރު ވިދާޅުވި އެވެ.
ހުޅުމާލެއަށް މަޝްރޫއު ބަދަލު ކުރުމަށް އެންގި އިރު، ބޮލެވާޑް ކުންފުނިން ވަނީ ރަސްފަންނު ސަރަހައްދުގައި، އަޅަން ނިންމި ހަތަރު ޓަވަރުގެ ތެރެއިން އެއް ޓަވަރުގެ ފައުންޑޭޝަންގެ މައިކްރޯޕައިލްސްގެ 13 ޕަސަންޓް މަސައްކަތް ނިމިފައިވާ ކަމަށް ހައުސިން މިނިސްޓްރީން މިއަދު ވަނީ ބުނެފައެވެ.
އެޕާޓްމަންޓް ގަތް ބައެއް ފަރާތްތަކުން ވަނީ ފައިސާ އަނބުރާ ހޯދުމަށް އެ މައްސަލަ ސިވިލް ކޯޓަށް ހުށަހަޅާފައިއެވެ. އެ ފަރާތްތަކުން ބުނި ގޮތުގައި، އެމީހުން އެގްރީމަންޓް ހެދީ މާލެއިން އެޕާޓްމަންޓް ގަތުމަށް ކަމަށާއި މާލޭގައި މަޝްރޫއު ކުރިއަށް ނުދާނަމަ ކުންފުނިން، އެ ފަރާތްތަކަށް ބަދަލު ދޭން ޖެހޭ ކަމަށެވެ.