އަރަބި މީޑީއަމަށް ކިޔަވައިދޭ، އަރަބިއްޔާ ސްކޫލްގައި ކިޔަވައިދިނުމަށް މިސްރުގެ އަޒްހަރު ޔުނިވާސިޓީން 11 ޓީޗަރުން މިއަދު މާލެ އަތުވެއްޖެ އެވެ.
އެ ޓީޗަރުން މާލެއައިސްފައި ވަނީ މިއަދު މެންދުރު އެވެ. މިއީ އަރަބިއްޔާ ސްކޫލަށް އަޒްހަރު ޔުނިވާސިޓީން ހަމަޖައްސައިދިން 17 ޓިޗަރުންގެ ތެރެއިން ރާއްޖެއައި ޓީޗަރުންތަކެކެވެ. އަދި އެ 17 ޓީޗަރުންގެ ތެރެއިން ހަތަރު ޓީޗަރުން މާދަމާ މާލެ އަންނަން ހަމަޖެހިފައިވާކަމަށް އަރަބިއްޔާ ސްކޫލުގެ ޕްރިންސިޕަލް މުހައްމަދު ޝުޖާއު އަބްދުއް ރަހީމް ވިދާޅުވި އެވެ.
ބާކީ ތިބި ދެ ޓީޗަރުންގެ ވިސާ ހަމަޖެހިފަިއވާ ކަމަށާއި އެހެންނަމަވެސް އަދި އެ ދެ ޓީޗަރުން ރާއްޖެ އަންނަ ތާރީހު ނޭނގޭކަމަށް ވެސް އޭނާ ވިދާޅުވި އެވެ.
މި އަހަރުގެ ދިރާސީ އަހަރު ފެށުނުއިރުވެސް އަރަބިއްޔާއަށް ޓީޗަރުން ހަމައެއް ނުވެ އެވެ. އަދި ޓީޗަރުން ހަމަ ނުވާތީ އެ ސްކޫލުގައި ކިޔަވައިދެމުން ދިޔައީ ޕާޓްޓައިމް ޓީޗަރުން ގެނެސްގެން އެވެ. ނަމަވެސް ސައިންސް ފަދަ މާއްދާތައް އަރަބި ބަހުން ކިޔަވައިދޭނެ ޓީޗަރުން ނުލިބޭތީ އެ މާއްދާތައް ކިޔަވައިދިނުމަށް އޮތީ ދަތިވެފަ އެވެ.
ޓީޗަރުން ހަމަނުވާ މައްސަލަ ހައްލުކުރުމަށް ސަރުކާރުގެ ވަފުދެއް ދާދި ފަހުން ވަނީ މިސްރަށް ވެސް ވަޑައިގެންފަ އެވެ. އެ ދަތުރުގައި ޗީފް އޮފް ސްޓާފް އަލީ ޒާހިރުގެ އިތުރުން އެޑިއުކޭޝަން މިނިސްޓަރު ޑރ. އައިޝަތު އަލީ އަދި އިސްލާމިކް މިނިސްޓަރު އަހުމަދު ޒާހިރު އަލީވެސް ބައިވެރިވެވަޑައިގެންނެވި އެވެ.
އަރަބިއްޔާގެ ދަރިވަރުން މި އަހަރު ފަހުކޮޅު ޝަހާދާ ސާނަވިއްޔާ އިމްތިހާންގައި ބައިވެރިވާން ޖެހޭތީ އެ ކުދިންގެ ކިޔެވުން އެންމެ ދުވަހެއް ވެސް ގެއްލުމަކީ ބެެލެނިވެރިން ވަރަށް ކަންބޮޑުވާ ކަމެކެވެ.
އަރަބިއްޔާ ސްކޫލަށް ޓީޗަރުންގެ މައްސަލަ ދިމާވީ އެ ސްކޫލަށް މިސްރުގެ އަޒްހަރު ޔުނިވަރސިޓީން ފޮނުވި ޓީޗަރުންތަކެއްގެ ވިސާ ނެތް ކަމަށް ބުނެ ރާއްޖޭގެ އެއާޕޯޓުން އެ ޓީޗަރުންތައް ޑީޕޯޓު ކޮށްލި މައްސަލައަކަށް ފަހު އެވެ.