ބުލީ ކުރުމާ ދެކޮޅަށް ހޭލުންތެރިކުރުމުގެ ގޮތުން އެޑިއުކޭޝަން މިނިސްޓްރީން ހަމަޖެއްސި އެންޓި ބުލީ އެމްބެސެޑަރު އާލިފް ނަސީރު (އާލް ނަސީރު)، އަށް ކުރެވިފައިވާ ތުހުމަތުތަކުގައި އެއްވެސް ހަގީގަތެއް ނެތް ކަމަށް އޭނާ ބުނެފިއެވެ.
އާލްގެ މައްސަލަ އެންމެ ފުރަތަމަ ފެންމަތިވީ މިދިޔަ ފެބްރުއަރީ މަހުއެވެ. ޓުވިޓާގައި ބައެއް އަންހެންކުދިން ބުނީ އާލް އެކުދިން ބްލެކްމެއިލްކޮށް ފުރައްސާރަކޮށްފައިވާ ކަމަށެވެ.
އެ މައްސަލަ ހޫނުވެ، އެކަން އެޑިއުކޭޝަން މިނިސްޓަރު ޑރ. އައިޝަތު އަލީގެ ސަމާލު ކަމަށް އައުމުން، މިނިސްޓަރު ވެސް ވަނީ އާލްއާ ދެކޮޅަށް ވާހަކަ ދައްކަވައިފަ އެވެ.
އާލްއާ ދެކޮޅަށް ކުރެވިފައިވާ ތުހުމަތުތަކުގެ ތެރޭގައި މީހުންނަށް ބިރު ދެއްކުމާއި، އޮރިޔާން މަންޒަރު ދައްކުވައިދޭ ފޮޓޯ ފަދަ ތަކެއްޗާ ބެހޭ ތުހުމަތުތަކާއި އަދި އެނޫންވެސް ޖިނާއީ އަދި ޖިނާއީ ނޫން ކަންތައްތައް ހިމެނެއެވެ.
ނަމަވެސް އާލްގެ ފަރާތުން މިއަދު ނެރުނު ބަޔާނުގައި ބުނީ އޭނާއަކީ ދުވަހަކުވެސް އެފަދަ ކަމެއް ކޮށް އަދި އެފަދަ ކަމެއްގައި ބައިވެރިވެފައިވާ މީހެއްވެސް ނޫން ކަމަށެވެ. އަދި އެފަދަ ރެކޯޑެއް މޯލްޑިވްސް ޕޮލިސް ސާވިސް ނުވަތަ އެނޫންވެސް އެއްވެސް މުވައްސަސާއެއްގައި ނޯންނާނެ ކަމަށް އޭނާ ބުންޏެވެ
އަދި އެންޓިބުލީއިން އެމްބެސެޑާކަމުގެ މަގާމަށް ހަމަޖެއްސިއިރު އޭނާގެ ބެކްގްރައުންޑް ޗެކް ކުރިއިރުވެސް އެފަދަ ކަމެއް ފެނިފައި ނެތީ ހަގީގަތުގައިވެސް އެފަދަ ކަމެއް ނެތުމުން ކަމަށް އާލް ބުންޏެވެ.
" އަޅުގަނޑު އެދެނީ އަޅުގަނޑާމެދު އިސްވެ ދެންނެވި ބާވަތުގެ ޝަކުވާއެއް އޮތް ނަމަ އެމީހާއާ އަޅުގަނޑާ ދެމީހުންގެ މަސްލަހަތަށްވެސް އެންމެ ރަނގަޅު ގޮތުގައި ރައްކާތެރިވެވޭނެ ގޮތަކަށް، އެ މައްސަލަ ދައުލަތުގެ ކަމާބެހޭ މުވައްސަސާއަކަށް ހުށަހަޅުއްވައިގެން ކުރިއަށް ގެންގޮސްދެއްވުމެވެ. " އާލް ނެރުނު ބަޔާނުގައި ވެއެވެ.
ބުލީ ކުރުމުގެ ތުހުމަތުތަކާ ގުޅިގެން އެޑިއުކޭޝަން މިނިސްޓަރު ވިދާޅުވީ ޖިންސީ ފުރައްސާރަ ފަދަ މައްސަލަތަކަކީ ވަރަށް ސީރިއަސް މައްސަލައެއް ކަމަށާއި އެފަދަ މައްސަލަތަކަށް ދޭނީ "ޒީރޯ ޓޮލަރަންސް" ކަަމަށެވެ. އަދި އެ މައްސަލައިގައި ފިޔަވަޅު އަޅުއްވާނެކަމަށްވެސް މިނިސްޓަރު ވިދާޅުވިއެވެ.
ނަމަވެސް އެ މައްސަލައިގައި ފިޔަވަޅު އެޅުމުގެ ކުރިން އާލް ވަނީ މަގާމުން އިސްތިއުފާދީފައެވެ.
"އެންޓި ބުލީ އެމްބެސެޑަރު ކަމުން އިސްތިއުފާ ދިނީ އަޅުގަނޑާމެދު ސޯޝަލް މީޑީއާގައި ކުރިމަތިކޮށްފައިވާ ތުހުމަތުތަކުން ބަރީއަވުމުގެ ފުރުސަތު ފަހިކުރުމަށް ޓަކައެވެ. އަޅުގަނޑަށް މީހުން ބުލީ ކުރުމުން، އެކަމުގެ އަސަރު އެންޓި ބުލީ ކެމްޕޭންއަށް ފޯރުވިޔަނުދިނުމަށްޓަކައެވެ. އެންޓި ބުލިން ކެމްޕޭންގެ މުހިންމުކަން އަޅުގަނޑަށް އަބަދުވެސް އިހްސާސްވެއެވެ." އޭނާގެ ބަޔާނުގައި ވެއެވެ.
އާލް ބުނީ ކުރިއަށް އޮތް ތަނުގައިވެސް ބުލީ ކުރުމާއި އަދި އަސްލެއް ނެެތް ތުހުމަތު މީހުންގެ މައްޗަށް ކުރިމަތިކުރުމާ ބެހޭގޮތުން ހޭލުންތެރިކުރުމުގައި ދެމިހުންނާނެ ކަމަށް އޭނާ ބުންޏެވެ.
އާލްއަކީ ޔޫޓިއުބްގައި ވަރަށް ގިނަ އިން ވްލޮގްކޮށް ތަފާތު ވީޑިއޯތައް ގެނެސްދޭ ތަރިއެކެވެ. އަދި އޭނާ ވަނީ ދިރާގާއި އަދި އުރީދޫގެ އިޝްތިހާރުތަކުން ފެނިގެން ގޮސްފަ އެވެ.
އާލްގެ މައްސަލަ ފެންމަތިވުމުން ދިރާގާއި، ލޮޓަސް އަދި ބައިސްކޯފުން މިހާރު ވަނީ އޭނާއާ އެކު މަސައްކަތް ކުރުން ހުއްޓާލައިފަ އެވެ. އާލް ބުނީ އެ މައްސަލަ ފެންމަތިވިޔަސް އޭނާއާއެކު މަސައްކަތް ކުރަން ބޭނުންވާ ބްރޭންޑްތަކާއެކު މިހާރުވެސް މަސައްކަތް ކުރަމުންދާ ކަމަށެވެ.
" އަދި ވަރަށް ކައިރި މުސްތަގުބަލެއްގައި ތަފާތު އިތުރު ޝޯ ތަކާއެކު ބެލުންތެރިންނާއެކު ބައްދަލުކުރާނަމެެވެ." އާލްގެ ބަޔާނުގައި ވެއެވެ.