ރާއްޖޭގައި ހިންގަ ބޭންކް އޮފް ސިލޯނުގެ ބްރާންޗުގައި ހުޅުވާފައިވާ އެކައުންޓުތަކުގެ ތެރެއިން ބޭނުން ނުކުރާތާ ފަސް އަހަރަށްވުރެ ގިނަ ދުވަސްވީ އެކައުންޓުތަކުގެ މައުލޫމާތު އާންމުކޮށްފިއެވެ.
އެ ބޭންކުން ކުރި އިއުލާނެއްގައި ބުނީ ޑޯމަންޓް އެކައުންޓުގެ ގޮތުގައި ކަނޑައަޅާފައިވާ އެކައުންޓުތަކުގެ ވެރިފަރާތްތަކުން އެކައުންޓް އެކްޓިވޭޓު ކުރަން އެދޭނަމަ އޭޕްރީލް 20 ވަނަ ދުވަހުގެ ކުރިން އެ ބޭންކަށް ހުށަހެޅުމަށް އެދޭ ކަމަށެވެ.
ޑޯމަންޓް އެކައުންޓްތަކުގެ ތަފްސީލުތައް ބޭންކް އޮފް ސިލޯނުން ވަނީ އާންމު ކޮށްފައެވެ.
ރާއްޖޭގެ ބޭންކިން ގާނޫނުގެ 35 ވަނަ މާއްދާގައި ބުނެފައިވަނީ ވިދިވިދިގެން ފަސް އަހަރުދުވަސް ވަންދެން، އެކައުންޓެއްގެ ވެރިފަރާތުން އެ އެކައުންޓަކުން އެއްވެސް މުއާމަލާތެއް ކޮށްފައި ނުވާނަމަ، ނުވަތަ ބޭންކަށް އެއްވެސް ލިޔުމެއް ފޮނުވާފައިނުވާނަމަ، އެ އެކައުންޓް ޑޯމަންޓް އެކައުންޓެއްގެ ގޮތުގައި ކަނޑައަޅައި، އެ އެކައުންޓްތައް ބަންދުކުރަން ޖެހޭނެ ކަމަށާއި އެކައުންޓުގައި ހުރި ފައިސާ މަރުކަޒީ ބޭންކް އެމްއެމްއޭ އަށް ހަވާލުކުރަން ޖެހޭނެ ކަމަށެވެ.