ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރ. ރަސްމާދޫ ކައުންސިލާ ބައްދަލު ކުރައްވައިފިއެވެ.
އިއްޔެ މެންދުރުފަހު ބޭއްވި މި ބައްދަލު ކުރެއްވުމުގައި ރަސްމާދޫގެ މިހާރުގެ ހާލަތާއި އެރަށު ރައްޔިތުން އެންމެ ބޮޑަށް ބޭނުން ވެފައި ވާ ކަންކަމާ ބެހޭ މައުލޫމާތު ކައުންސިލުން ވަނީ ރައީސާ ހިއްސާ ކޮށްފައެވެ.
އެގޮތުން ރަސްމާދޫގައި ބައެއް އަސާސީ ހިދުމަތްތައް ފުރިހަމަ ވެފައި ނެތުމުން ދިމާ ވަމުން ދާ ދަތިތަކާއި، އުމްރާނީ ވަސީލަތްތައް މަދު ވުމުން ކުރިމަތި ވާ ގޮންޖެހުންތައް ރައީސްގެ ސަމާލުކަމަށް ވަނީ ގެނެސްފައެވެ.
ރަށުގެ ސިއްހީ މަރުކަޒުގައި ބައެއް ހިދުމަތްތައް ދެވޭނެ ވަސީލަތްތައް ނެތުމާއި، ބައެއް ކަހަލަ ބޭސް ރަށުން ލިބުން ދަތިކަން ރަސްމާދޫ ކައުންސިލުގެ މެންބަރުން ފާހަގަ ކުރެއްވިއެވެ.
މީގެ އިތުރުން، އެ ރަށުގެ ޒުވާނުންނަށް އާމްދަނީ ލިބޭނެ މަގު ތަނަވަސް ކޮށް ދިނުމުގެ ގޮތުން ރަށުގައި ވަޒީފާގެ ފުރުސަތުތައް އިތުރު ކުރުމުގެ މުހިންމުކަމާއި، ރަށުގެ ޒުވާނުންގެ މަރުކަޒުގެ ބޭނުން އެންމެ އެދެވޭ ގޮތެއްގައި ހިފޭނޭ ގޮތްތަކާ ބެހޭ ގޮތުން ވެސް އެ ބައްދަލުވުމުގައި މަޝްވަރާ ކޮށްފައި ވެއެވެ.
މި ބައްދަލުވުމުގައި ރައީސް ވިދާޅުވީ ރަސްމާދޫގެ ރައްޔިތުންނަށް ބޭނުން ވެފައި ހުރި ކަންކަން ފުރިހަމަ ކޮށް ދެއްވުމަށް ސަރުކާރުން އަބަދުވެސް މަސައްކަތް ކޮށް ދެއްވާނެ ކަމަށެވެ.