ސްޓޮކްހޮމް (11ޑިސެމްބަރު 2018): އެމެރިކާއަށްފަހު ދުނިޔޭގައި ހަތިޔާރުގެ ވިޔަފާރީގައި އެންމެ ކުރީގައި އުޅެނީ ރަޝިޔާ ކަމަށް ބައިނަލްއަގްވާމީ ސުލްޙަ އާބެހޭ ދިރާސާތައްކުރާ އިދާރާއެއް ކަމަށްވާ "ސްޓޮކްހޮމް އިންޓަނޭޝަނަލް ޕީސް ރީސާޗް އިންސްޓިޓިއުޓް" އިން ބުނެފިއެވެ.
އެ އިންސްޓިޓިއުޓުން ނެރުނު ދިރާސާ ރިޕޯޓެއް ބުނާގޮތުން ފާއިތުވި ފަނަރަވަރަކަށް އަހަރުތެރޭގައި ރަޝިޔާ ވަނީ ހަތިޔާރުގެ ޓެކްނޮލޮޖީ ވަރަށް ބޮޑަށް ތަރައްގީ ކޮށްފައި ކަމަށާ މިދިޔައަހަރު އެމެރިކާއިން 200 ބިލިޔަން ޑޮލަރުގެ ހަތިޔާރު ވިއްކާފައިވާއިރު ރަޝިޔާއިން 50 ބިލިޔަން ޑޮލަރުގެ ހަތިޔާރު ވިއްކާފައިވާ ކަމުގައެވެ. މީގެކުރިން ރަޝިޔާ އަންނަނީ ހަތިޔާރު ވިއްކުމުގައި ދުނިޔޭގެ ތިންވަނައަށެވެ. ނަމަވެސް 2017 ވަނަ އަހަރު ރަޝިޔާވަނީ ކުރިން ހަތިޔާރުގެ ވިޔަފާރީގައި ދެވަނައަށް އޮތް އިނގިރޭސިވިލާތް ފަހަތަށް ޖައްސާލުމަށްފަހު ހަތިޔާރުގެ ވިޔަފާރީގައި ދެވަނަ ހޯދާފައެވެ.
މި ރިޕޯޓް ބުނާގޮތުން ދުނިޔޭގައި ހަތިޔާރުގެ ޓެކްނޮލޮޖީ އެންމެ ބޮޑަށް ތަރައްގީކޮށްފައިވާ 100 ކުންފުނީގެ ތެރެއިން 10 ކުންފުންޏަކީ ރަޝިޔާގެ ކުންފުނިތަކެވެ. "ސްޓޮކްހޮމް އިންޓަނޭޝަނަލް ޕީސް ރީސާޗް އިންސްޓިޓިއުޓް"ގެ ރިޕޯޓް ބުނާގޮތުން ދުނިޔޭގެ ބޮޑު ފަސްބާރާއި ޖަރުމަނު ފިޔަވައި ދެން ހަތިޔާރުގެ ޓެކްނޮލޮޖީ އެންމެ ބޮޑަށް ތަރައްގީ ކުރަމުން ގެންދާ ގައުމުތަކުގެ ތެރޭގައި ތުރުކީ، އިންޑިޔާ، ބްރަޒީލް އަދި އީރާން ހިމެނެއެވެ.
އެ އިންސްޓިޓިއުޓްގެ ރިޕޯޓްގައި ދުނިޔޭގައި ހަތިޔާރު އެންމެގިނައިން އުފައްދާ ސަތޭކަ ކުންފުނީގެ ލިސްޓުގައި ތުރުކީގެ ހަތިޔާރު ކުންފުނިތައް ހިމެނެއެވެ. އަދި ތުރުކީގެ އެންމެ ބޮޑު ހަތިޔާރުކުންފުނި ކަމަށްވާ "އިސިލްސާން" ކުންފުންޏަކީ ހަތިޔާރު އުފެއްދުމުގެ ރޭންކްގައި ދުނިޔޭގައި 66 ވަނައިގާ އުޅޭ ކުންފުނިކަންވެސް އެރިޕޯޓްގައި ފާހަގަކޮށްފައިވެއެވެ.
ތުރުކީން ހަތިޔާރުގެ ޓެކްނޮލޮޖީ ތަރައްގީ ކުރަން އިސްކަން ދީފައިވަނީ 2011 ވަނަ އަހަރުން ފެށިގެންނެވެ. އެގައުމުގެ އަމާޒަކީ 2025 ވަނަ އަހަރާ ހަމައަށްދާއިރު އެގައުމަށް ބޭނުންވާ ހުރިހާ ބާވަތެއްގެ ހަތިޔާރު އަމިއްލަ ޓެކްނޮލޮޖީގައި ތަރައްގީކުރުމެވެ. މީގެއިތުރުން ދުނިޔޭގައި ޒަމާނީ ހަތިޔާރު ވިއްކާ ގައުމުތަކުގެ ލިސްޓުގެ ކުރިކޮޅުން ޖާގަހޯދައި ހަތިޔާރުގެ ވިޔަފާރިއަކީ ތުރުކީއަށް ބޮޑު އާމްދަނީއެއް ލިބޭ ވިޔަފާރިއެއް ކަމުގައި ހެދުންވެސް ތުރުކީގެ ދުރުރާސްތާގެ ޕްލޭންގައި ވެއެވެ.
މިދިޔައަހަރު ހަތިޔާރު ވިއްކައިގެން ތުރުކީއަށް 1.4 ބިލިޔަން ޑޮލަރުގެ އާމްދަނީ އެއްލިބިފައިވާއިރު މިއީ 2016 އަހަރު ހަތިޔާރު ވިއްކައިގެން އެގައުމަށް ލިބުނު އާމްދަނީއަށްވުރެ 19 އިންސައްތަ ބޮޑު އަދަދެކެވެ. ތުރުކީން އުފައްދާ ހަތިޔާރުގެ ތެރޭގައި އަސްކަރީ މަނަވަރުތަކާއި ހެލިކޮޕްޓަރާއި ބޮޑުބަޑިއާއި ޓޭންކާއި މިސައިލް އާއި އިލެކްޓްރޯނިކްގެ ބާވަތްތައް ހިމެނޭއިރު އެގައުމުން ގެންދަނީ ފައިޓަރ ޖެޓާއި އަސްކަރީ ސަބްމެރިން އުފެއްދުމަށް ބޭނުންވާ ރީސާޗްތައްވެސް ކުރަމުންނެވެ. (ނޫސްއެޖެންސީތައް)