ސިޔާސީ ބޭނުމުގަ އާއި އަދި އެހެނިހެން ވެސް ބޭނުމުގައި ނުހައްގު ގޮތުގައި އިންސާފުން ބޭރުން ހައްޔަރުކޮށްފައިވާ ކަމަށް ބުނާ 500 މީހެއްގެ މައްސަލަ، ގާނޫނީ ވަކީލު ނާޒިމް ސައްތާރު ރައީސް އޮފީހަށް މިއަދު ހުށަހަޅައިފި އެވެ.
މިދިޔަ ބުރާސްފަތި ދުވަހު ރައީސް އޮފީހުން ވަނީ 2012 ވަނަ އަހަރު އެއް ވަނަ ދުވަހުގެ ފަހުން، ސިޔާސީ މަގުސަދެއް ހާސިލުކުރުމަށް ބަންދުކުރެވި، ޖިނާއީ އަދުލުގެ ނިޒާމުގެ ތެރެއިން އެކި އެކި ފިޔަފަޅު އާޅާފައިވާ ފަރާތްތަކާއި، އެހުކުމްތައް ތަންފީޒު ކުރަމުންދާ ފަރާތްތަކުގެ ޝަކުވާ އެ އޮފީހަށް ހުށަހެޅުމަށް އިލްތިމާސްކޮށްފަ އެވެ.
ގާނޫނީ ވަކީލު ނާޒިމް ސައްތާރު "ސަން" އަށް ވިދާޅުވީ، ވަކީލުންގެ ޓީމުގެ މަސައްކަތާ އެކު މިއަދު އެފަދަ 500 ހައްޔަރީންގެ މައްސަލަ ރައީސް އޮފީހަށް ހުށަހަޅާފައިވާ ކަމަށެވެ.
delivered these2 PO.Although they are mostly hayyaru slips they prove that; (1)Fataas barieh hen mayday ga court amuruthah nerunukan.(2)Veythuve dhiya 3 aharu high court ah istunaf kuri hurihaa mudhathu amuregga dpg nihaayath thaeedhu koffa vanee bandhu dhamhattan kan pic.twitter.com/hqSKGsBIds
— Nazim Sattar (@nazimsat) December 10, 2018
އޭނާ ވިދާޅުވީ، އޭގެ ތެރޭގައި ހިމެނެނީ އޭރު އިދިކޮޅުފަރާތްތަކުން ބޭއްވި މޭޑޭ ބޮޑު މުޒާޙަރާގައި ހައްޔަރުވި އަދި ޝަރިއަތް ކުރެވި، ނުވަތަ ދައުވާ އުފުލާފައިވާ 212 ސިޔާސީ ހައްޔަރީންނާއި މިދިޔަ ފެބުރުއަރީ އެއް ވަނަ ދުވަހު ސުޕުރީމް ކޯޓުން ނެރުނު އަމުރާ ގުޅިގެން ކުއްލި ނުރައްކަލުގެ ހާލަތު އިއުލާންކޮށް ހައްޔަރުވި 100 ވަރަށް މީހުން ކަމަށެވެ.
އޭގެ އިތުރުން، ހަތެއް ފެބުރުއަރީގައި ތިނަދޫގައި ހިނގި ހާދިސާއާ ގުޅޭ 94 މިހަކާއި އިސްލާމީ މަރުކަޒުގައި ދުއާ ކޮސްގެން ހައްޔަރުވި މީހުން އަދި ބުރިޖް ސަރަހައްދުގައި ރާޅާ އެރުމުން ހައްޔަރުކުރި ޒުވާނުން ވެސް ހިމެނޭ ކަމަށް އެނާ ވިދާޅުވި އެވެ.
އޭނާ ވިދާޅުވީ އެ ހުރިހާ އެންމެންނަކީ މިހާރު މިވަގުތު ހައްޔަރުގައި ތިބި ބައެއް ނޫން ކަމަށާއި ނަމަވެސް ބަޔެއް މީހުންނަށް ޝަރީއަތް ކުރެވި ދައުވާ ވެސް އުފުލާފައިވާ ކަމަށެވެ.
ރައީސް އިބްރާޙިމް މުހައްމަދު ސޯލިހް ސިޔާސީ ހައްޔަރީންގެ މައްސަލަތައް ބެލުމަށް "ސިޔާސީ ހައްޔަރީން މިނިވަންކުރުމާ ބެހޭ ކޮމިޓީ"ގެ ނަމުގައި ސަރުކާރުގެ ފުރަތަމަ ދުވަހު ކޮމިޓީ އެއް އުފައްދަވައިފަ އެވެ. ސިޔާސީ ހައްޔަރީންގެ މައްސަލަތައް ބަލައި، ނުޙައްގުން ބަންދުކޮށްފައިވާ ފަރާތްތައް މިނިވަންކުރުމަކީ އެމަނިކުފާނުގެ ރިޔާސީ ވައުދެކެވެ.