ވެރިކަމުގެ ފުރަތަމަ ތިން އަހަރު ތެރޭގައި ރާއްޖޭގެ ހުރިހާ ރަށެއްގައި ފެނާއި ނަރުދަމާ ނިޒާމު އެޅުމުގެ މަސައްކަތް ފަށާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އަލިފުޅު ތުއްތު ފައުންޑޭޝަންގެ ފަރާތުން ކ. ދިއްފުށީގައި އެޅި، 61 މިލިއަން ރުފިޔާގެ، ފެނާއި ނަރުދަމާ ނިޒާމު އިފްތިތާހުކޮށްދެއްވުމަށް އެރަށަށް ވަޑައިގެން، ރައީސް ސޯލިހު ވިދާޅުވީ ރާއްޖޭގެ ހުރިހާ ރަށެއްގައި ފެނާއި ނަރުދަމާ ނިޒާމު ގާއިމުކުރުމަކީ އެމަނިކުފާނުގެ ސަރުކާރުގެ އެންމެ ބޮޑު އެއް ވައުދު ކަމަށެވެ. އަދި އަންނަ އަހަރު 72 ރަށެއްގައި ނަރުދަމާ، އަދި 56 ރަށެއްގައި ފެނުގެ ނިޒާމު ގާއިމުކުރަން އަންނަ އަހަރުގެ ބަޖެޓުގައި 102 މިލިޔަން ޑޮލަރު ހިމަނާފައި ވާނެ ކަމަށެވެ.
ރައީސް ސޯލިހު ވިދާޅުވީ އެމަނިކުފާނުގެ އަމާޒަކީ ވެރިކަމުގެ ތިން އަހަރު ނިމޭ އިރު ހުރިހާ ރައްޔިތުންނަށް ބޭނުންވާ ފެނާއި ނަރުދަމާގެ ހިދުމަތް ދިނުމުގެ މަސައްކަތް ފެށުން ކަމަށެވެ.
"އަޅުގަނޑުގެ އަމާޒަކީ ވެރިކަމުގެ ތިން އަހަރު ނިމޭއިރު ހުރިހާ ރައްޔިތުންނަށް ބޭނުންވާ ފެނާއި ނަރުދަމާ ހިދުމަތް ދިނުމުގެ މަސައްކަތް ފެށުން. އިރާދަކުރެއްވިއްޔާ މި ކަންތައްތައް ކުރެވިގެން ދާނެ،"
ރައީސް ސޯލިހު ވިދާޅުވީ މިއަދު ރާއްޖޭގައި ފެނުގެ ނިޒާމު ގާއިމުވެފައި އޮތީ 34 ރަށުގައި، އަދި ނަރުދަމާ ގާއިމުކޮށްފައި އޮތީ 66 ރަށުގައި ކަމަށެވެ. އަދި މިއީ ރާއްޖެއަށް ލިބޭ އާމްދަނީއަށް އަޅާ ބަލާއިރު މަދު އަދަދެއްކަން ރައީސް ފާހަގަކުރެއްވިއެވެ.
"ރާއްޖޭގެ ލިބޭ އާމްދަނީއާ އަޅާ ބަލާއިރު ރައްޔިތުންނަށް ލިބެންޖެހޭ އަސާސީ ހިދުމަތްތައް ލިބޭކަން މަދުކަން ފާހަގަކުރަން. އެކަން ވެގެން ވާނެ ގޮތް ނޫންކަންވެސް އަޅުގަނޑު ފާހަގަކުރަން،" ރައީސް ސޯލިހު ވިދާޅުވިއެވެ.
ރައީސް ވިދާޅުވީ މިކަންކަން ކުރުމުގައި އަމިއްލަ ވިޔަފާރިވެރިންގެ އެހީތެރިކަންވެސް ސަރުކާރަށް ބެނުންވާ ކަމަށެވެ.
"އަދި ވިޔަފާރިވެރިން ތިއްބެވީ މިކަންކަމުގައި އެހީތެރިވުމަށް ތައްޔާރަށްކަންވެސް ގަބޫލުކުރެވޭ،" ރައީސް ވިދާޅުވިއެވެ.