ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު އަދި ޕީޕީއެމްގެ ޕާލަމެންޓްރީ ގްރޫޕްގެ ނައިބު ލީޑަރު ރިޔާޒު ރަޝީދު ޖުމްހޫރީ ޕާޓީއަށް ސޮއިކުރައްވައިފިއެވެ.
ޕީޕީއެމް ޓިކެެޓްގައި މަޖިލީހަށް ހޮވިވަޑައިގެންނެވި ރިޔާޒު ޖޭޕީއާ ގުޅިވަޑައިގަތީ، މިރޭ ޖުމްހޫރީ ޕާޓީ އިދާރާ، މ. ކުނޫޒްގައި ބޭއްވި ހާއްސަ ރަސްމިއްޔާތުގައި އެވެ.
އެ ޕާޓީއަށް ސޮއި ކުރެއްވުމަށް ފަހު ރިޔާޒު ވިދާޅުވީ، އެނާ ޖޭޕީއަށް ސޮއި ކުރަން ނިންމެވީ ރައްޖޭގެ މުސްތަގުބަލަށް ވިސްނުމަށްފަހު، ދާއިރާއާއި ރައްޔިތުންގެ ހައްގުގައި ކަމަށެވެ.
އެ ރަސްމިއްޔާތުގައި ރިޔާޒު ވަނީ އެ ޕާޓިގެ ލީޑަރު ގާސިމް އިބްރާހިމަށް ވަރަށް ބޮޑަަށް ތައުރީފު ކުރައްވާފައެވެ.
އެ ރަސްމިއްޔާތުގައި ވާހަކަފުޅު ދައްކަވަމުން ޖޭޕީގެ ލީޑަރު ގާސިމް ވިދާޅުވީ، ރިޔާޒަކީ ވަރަށް މައްސައްކަތްތެރި ބޭފުޅެއް ކަމަށެވެ. އަދި ރައްޔިތުންގެ މަޖިލީހާއި ޚާއްސަ މަޖިލީހުގައިވެސް ރިޔާޒު ކުރެއްވި މަސައްކަތްތައް ގާސިމް ފާހަގަ ކުރެއްވި އެވެ.
ރިޔާޒު ޖޭޕީއަށް ސޮއި ކުރެއްވުމާއެކު މަޖިލީހުގައި ޖޭޕީގެ މެމްބަރުންގެ އަދަދު 22 އަށް އެރީއެވެ. މެޖޯރިޓީ ޕާޓީ، އިދިކޮޅު ޕީޕީއެމްގެ މެމްބަރުންގެ އަދަދަކީ މިހާރު 28 އެވެ. ވެރިކަންކުރާ ކޯލިޝަންގެ އެންމެ ބޮޑު ޕާޓީ، އެމްޑީޕީ ގެ މެމްބަރުންގެ އަދަދަކީ 19 އެވެ.
މިރޭ ބޭއްވި ޖަލްސާގައި ރިޔާޒުގެ އިތުރުން އެހެން ބައެއް ބޭފުޅުންވެސް އެޕާޓީއާ ގުޅިވަޑައިގަތެވެ.