ޗައިނާއާއި ރާއްޖެއާ ދެމެދު އެކުލަވާލާފައިވާ މިނިވަން ވިޔަފާރީގެ އެއްބަސްވުން އުވާލަން ނިންމާފައި ނުވާ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
މިހާރު ކުރިޔަށްދާ ނޫސްވެރިންގެ ބައްދަލުވުމެއްގައި ފޮރިން މިނިސްޓަރު ޝާހިދު ވިދާޅުވީ ޗައިނާއާ ރާއްޖެއާ ދެމެދު މިނިވަން ވިޔަފާރީގެ އެއްބަސްވުމެއްގައި ސޮއިކޮށްފައިވާ ކަމަށާއި އެ އެއްބަސްވުން އުވާލަން ނިންމާފައިވާ ކަމަށް ފެތުރޭ ޚަބަރަކީ ދޮގު ޚަބަރެއް ކަމަށެވެ.
އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ރޮއިޓާސްއަށް ދެއްވި އިންޓަވިއުއެއްގައި ވިދާޅުވީ ޗައިނާއާ އެކު ހަދާފައިވާ މިނިވަން ވިޔަފާރީގެ އެއްބަސްވުމަކީ ރާއްޖެއަށް އޮތް ނުރައްކަލެއް ކަމަށާއި މި ސަރުކާރުން އެ އެއްބަސްވުން އުވާލަން ނިންމާފައިވާ ކަމަށެވެ.
އެއްބަސްވުން އުވާލަނީ ރާއްޖެއަކީ ޗައިނާ އާ އަޅާބަލާއިރު ކުޑަ އިގްތިސާދަކަށްވެފައި ދުނިޔޭގެ އެންމެ ބޮޑެތި އިގްތިސާދުތަކުގެ ތެރޭގައި ހިމެނޭ ގައުމަކާ އެކު މިނިވަން ވިޔަފާރިއެއް ކުރުމަކީ ރާއްޖެއަށް އެއްވެސް ފައިދާއެއް ވާނެކަމެއް ކަމަށް ގަބޫލު ނުކުރެވޭތީ ކަމަށް ނަޝީދު ވިދާޅުވިއެވެ.
މިއަދު އޮތް ނޫސްވެރިންގެ ބައްދަލުވުމުގައި، ފޮރިން މިނިސްޓަރު ޝާހިދު ވިދާޅުވީ ޗައިނާއާ ރާއްޖެއާ ދެމެދު ސޮއިކުރި މިނިވަން ވިޔަފާރީގެ އެއްބަސްވުން ދިރާސާކުރުމަށް ރައްޔިތުންގެ މަޖިލީހުން ނެގީ އެންމެ 15 ވަރަކަށް މިނިޓު ކަމަށެވެ.
"އެއްހާސް ސޮފްހާއަށް ވުރެ ބޮޑު ޑޮކިއުމެންޓެއް ކޮމިޓީން ދިރާސާކުރަން ނެގީ 15 މިނިޓު. އަޅުގަނޑު ބުއްދި ނުކުރޭ އޭގައި އޮތް އެއޗެއް ރަނގަޅަށް ބަލާފައި ކުރި ކަމެއް ކަމަކަށް [އެއީ]،"
މީގެ އިތުރުން އެ އެއްބަސްވުމުގައި ރާއްޖެ ބައިވެރިވުމަށް މަޖިލީހުން ފާސްކުރި އިރު އެ މަޖިލީހުގެ މެމްބަރެއްގެ ގޮތުގައި ހުންނެވި ޝާހިދު ވިދާޅުވީ، އެކަން ފާސްކުރި ޖަލްސާއަށް އޭނާއަށް ނުވެސް އަންގާ ކަމަށެވެ.
"ޖަލްސާ އޮތްކަންވެސް އަންގާ ނުލާ ބޭއްވި ޖަލްސާއަކުން އެ ފާސްކުރީ،"
ޝާހިދު ވިދާޅުވީ ފޮރިން މިނިސްޓްރީން ދެން އެ އެއްބަސްވުމަ ގުޅިގެން ކުރިއަށް ދާނީ ކަމާ ބެހޭ މާހިރުން އެ ދިރާސާކުރުމަށްފަހު ދެއްވާ ލަފާތަކެއްގެ މައްޗަށް ކަމަށެވެ.
މިއީ އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ދައްކަވާ ވާހަކަފުޅުތަކަށް ފާޅުކަން ބޮޑު ގޮތެއްގައި ސަރުކާރުން ދެކޮޅު ހެދި ފުރަތަމަ ފަހަރެވެ.
ޝާހިދު ވިދާޅުވީ ރާއްޖެއާ ގާތް ގުޅުމެއް ބާއްވައި، ބޮޑެތި އެހީތަކެއް ވަމުން އަންނަ ގައުމަކާ އޮތް ގުޅުމަށް ބުރޫ އަރާނެފަދަ އެއްޗެއް އެއްވެސް މީހަކު ބުނެގެން ނުވާނެ ކަމަށެވެ.
"އަޅުގަނޑުމެންނާ ނުލާހިކު ގާތް ގުޅުމެއް ބާއްވާ، ދީލަތި އެހީ ވަމުން އަންނަ ގައުމަކާ އަޅުގަނޑުމެންނާ އޮތް ގުޅުމަށް ބުރޫ އަރާނެ ފަދަ އެއްޗެއް ބުނުމަށް އެއްވެސް މީހަކު ބޭނުމެއް ނުވާނެ. [އެކަން] ކޮށްގެން ނުވާނެ. އަޅުގަނޑުމެންނާ ޗައިނާއާ ދެމެދު އޮތީ ގާތް، ރަހުމަތްތެރި ގުޅުމެއް. އަޅުގަނޑުމެން ދިރާސާ މި ކުރަނީ އެ ގުޅުން އިތުރަށް ބަދަހިކުރެވޭނެ ގޮތަކަށް،" ޝާހިދު ވިދާޅުވިއެވެ.