ރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު މުހައްމަދު ހުސެއިން ޝަރީފް (މުންދު) އިސްތިއުފާ ދެއްވައިފިއެވެ.
މުންދު އިސްތިއުފާ ދެއްވިކަން "ސަން"އަށް އޭނާ ވަނީ ކަށަވަރުކޮށްދެއްވައިފައެވެ. އަދި އޭނާއަށް އަރުވައިފައިވާ ސަފީރުކަމުގެ ކާޑުވެސް މިހާރު ލަންކާއާ ހަވާލުކޮށްފައިވާ ކަމަށްވެސް މުންދު ވިދާޅުވިއެވެ.
މުންދު އިސްތިއުފާ ދެއްވިއިރު، މިދިޔަ މަހު ޕީޕީއެމްގެ ސެކެޓްރީ ޖެނެރަލްކަމަށް މުންދު ވަނީ ހަމަޖައްސައިފައެވެ.
ކުރިން ރައީސް މައުމޫންގެ ސަރުކާރުގައި ވަރަށް އިސްކޮށް އުޅުއްވި މުންދު ދާދި ފަހުން ވަނީ މައުމޫން ޕީޕީއެމް ހޯދުމަށް ކުރަމުންގެންދާ މަސައްކަތްތައް ހުއްޓާލުމަށްވެސް ގޮވާލައްވައިފައެވެ.
ލަންކާގައި ހުންނަވާ ދިވެހި ސަފީރު ކަމަށް މުންދު އައްޔަން ކުރީ މިދިޔަ އަހަރު އޮކްޓޯބަރު މަހުއެވެ. އޭގެ ކުރިން އޭނާ ހުންނެވީ ދިވެހިރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފީރުގެ ގޮތުގަ އެވެ.
މުހައްމަދު ހުސައިން ޝަރީފް ދިވެހި ސަރުކާރަށް 17 އަހަރު ހިދުމަތް ކުރައްވާފައިވާއިރު އޭނާ ވަނީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ރައީސް އޮފީހުގައި އިސް މަގާމުތަކެއް ފުރުއްވާފަ އެވެ. އެގޮތުން ރައީސް އޮފީހުގެ ތެރެއިން ކުރައްވަންޖެހޭ ހާރިޖީ ދާއިރާގެ މަސައްކަތްތައް މުންދު ކުރައްވާފައިވެ އެވެ. މީގެ އިތުރުން ރައީސް މައުމޫންގެ ސަރުކާރުގައި، ސަރުކާރުގެ ތަރުޖަމާން ކަންވެސް ކުރައްވާފައިވެ އެވެ.