މޯލްޑިވްސް ބިޒްނަސް އެވޯޑްސްއަށް ވާދަކުރާ ފައިނަލިސްޓުންގެ ތެރެއިން އިންޑިވިޖުއަލް ކެޓަގަރީތަކުގައި ހިމެނޭ މީހުންނަށް ވޯޓް ލުމުގެ ފުރުސަތު މިއަދު ހުޅުވާލައިފި އެވެ.
ރާއްޖޭގައި ފުރަތަމަ ފަހަރަށް، ވިޔަފާރި ކުންފުނިތަކަށް ޚާއްސަކޮށްގެން ދޭ އެވޯޑަށް 100އަށް ވުރެ ގިނަ ފަރާތްތަކުން ކުރިމަތިލާފައި ވެއެވެ.
"ސަން" އިން މީޑިއާ ޕާޓްނަރުކަން ނަގާފައިވާ މޯލްޑިވްސް ބިޒްނަސް އެވޯޑްސްގެ ދަށުން ހަތަރު ދާއިރާއަކުން ޖުމްލަ 28 އެވޯޑު ދޭން ވަނީ ނިންމައިފައެވެ. މި ދާއިރާތަކަކީ އިންޑަސްޓްރީ އެކްސެލެންސް، އެންޓަޕްރައިޒް އެކްސެލެންސް، އިންޑިވިޖުއަލް އެކްސެލެންސް އަދި އެލައިޓް އެވޯޑްސްއެވެ.
މިއަދު ވޯޓަށް ހުޅުވާލި އިންޑިވިޖުއަލް އެކްސެލެންސްގައި ހިމެނެނީ އަހަރުގެ ޒުވާން ވިޔަފާރިވެރިޔާއާއި އަހަރުގެ އަންހެން ވިޔަފާރިވެރިޔާ އަދި އިންސްޕިރޭޝަނަލް ލީޑަރުގެ އިތުރުން އަހަރުގެ ވިޔަފާރިވެރިޔާ ހޮވާނެއެވެ.
އޭގެ ތެރެއިން އަހަރުގެ ޒުވާން ވިޔަފާރިވެރިޔާގެ އެވޯޑަށް ވާދަ ކުރަނީ އަލީ ހާރިސްއާއި ފާތުމަތު ނަދާ އަދި ރާއިދާ ޝަފީގެވެ. އަހަރުގެ އަންހެން ވިޔަފާރިވެރިޔާގެ އެވޯޑަށް ވާދަކުރަނީ ފާތުމަތު ނަހުލާއާއި ފާތުމަތު ނަދާ އަދި ރާއިދާ ޝަފީގެވެ.
އިންސްޕިރޭޝަނަލް ލީޑަރުގެ އެވޯޑަށް ވާދަކުރަނީ އަބްދުލް މަޖީދާއި އެސްޓީއޯގެ މެނޭޖިން ޑިރެކްޓަރު އަހުމަދު ޝަހީރު އަދި އެމްޕީއެލްގެ ސީއީއޯ އިބްރާހިމް އަބްދުލްރައްޒާގު ހަލީމެވެ. އަހަރުގެ ވިޔަފާރިވެރިޔާގެ އެވޯޑަށް ވާދަ ކުރަނީ ޖާދުﷲ އިސްމާއިލްއާއި ސައުދުﷲ އަހުމަދުގެ އިތުރުން ހޮޓަލް އެންޑް ރިސޯޓް ކޮންސްޓްރަކްޝަންގެ ޗެއާމަން މުހައްމަދު އަލީ ޖަނާހުއެވެ.
އެ މީހުންގެ ތެރެއިން އެވޯޑް ލިބޭނެ މީހުން ހޮވުމަށް ވޯޓް ލުމުގެ ފުރުސަތު މިއަދުން ފެށިގެން މި މަހުގެ 14 ވަނަ ދުވަހުގެ ނިޔަލަށް އޮންނާނެ އެވެ. ވޯޓް ލެވޭނީ MBA ޖެހުމަށް ފަހ،ު ހުސްތަންކޮޅެއް ދޫކޮށްލައި އެ މީހެއްގެ ޝޯޓް ކޯޑް ޖެހުމަށް ފަހު 266 އަކަށް މެސެޖު ކުރުމުންނެވެ. އަދި ކޮންމެ ނެޓްވޯކެއްގެ ނަންބަރަކުން ވެސް، 50 އެސްއެމްއެސް ކުރެވޭނެއެވެ.
އެސްއެމްއެސް ކުރަން ބޭނުންކުރާ ޝޯޓް ކޯޑް:
އަހަރުގެ ޒުވާން ވިޔަފާރިވެރިޔާގެ އެވޯޑް:
- އަލީ ހާރިސް 1801
- ފާތުމަތު ނަދާ 1802
- ރާއިދާ ޝަފީގު 1803
އަހަރުގެ އަންހެން ވިޔަފާރިވެރިޔާގެ އެވޯޑް:
- ފާތުމަތު ނަހުލާ 1804
- ފާތުމަތު ނަދާ 1805
- ރާއިދާ ޝަފީގު 1806
އިންސްޕިރޭޝަނަލް ލީޑަރުގެ އެވޯޑް:
- އަހްމަދު ޝަހީރު 1807
- އަބްދުލް މަޖީދު 1808
- އިބްރާހިމް އަބްދުލް ރައްޒާގު ހަލީމް 1809
އަހަރުގެ ވިޔަފާރިވެރިޔާގެ އެވޯޑް:
- މުހައްމަދު އަލީ ޖަނާހު 1810
- ޖާދުﷲ އިސްމާއިލް 1811
- ސައުދުﷲ އަހުމަދު 1812
އިންޑިވިޖުއަލް ކެޓަގަރީތައް ފިޔަވާ ދެން ހުރި ކެޓަގަރީތަކުގެ ފައިނަލިސްޓުންގެ ތެރެއިން އެވޯޑް ލިބޭ ފަރާތްތައް ހޮވާނީ ޖަޖުންގެ ޕެނަލަށް އެ ފަރާތްތަކުން ހުށަހަޅައިދޭ ޕްރެޒެންޓޭޝަންތަކާއި އިންޓަވިއުތަކުގެ އިތުރުން އެސްއެމްއެސް މެދުވެރިކޮށް އާންމުން ދޭ ވޯޓުންނެވެ. ޖުމްލަ މާކްސްގެ 50 ޕަސެންޓް ލިބޭނީ، އާންމުންގެ ވޯޓުންކަމަށް އެވޯޑް އިންތިޒާމްކުރާ ބްލޭޒަން އިން ބުނެއެވެ.
ބްލޭޒަން އިން ބުނީ، އިންޑިވިޖުއަލް ކެޓަގަރީތައް ފިޔަވައި ދެން ހުރި ކެޓަގަރީތަކުގެ ފައިނަލިސްޓުންގެ ތެރެއިން އެވޯޑް ލިބޭ ފަރާތްތަކުން ޕްރެޒެންޓޭޝަންތައް ހުށަހަޅައިދީ ނިމިފައިވާ ކަމަށެވެ. އެގޮތުން އެ ކެޓަގަރީތަކުގެ ޖަޖިން މިހާރު ގާތްގަނޑަކަށް ނިމިފައިވާ ކަމަށް އެ ކުންފުނިން ބުނެއެވެ.
ބިޒްނަސް އެވޯޑްސްގެ ޖަޖިން ޕެނަލްގައި ހިމެނެނީ ހަމްދޫން އަބްދުﷲ ހަމީދު (ހެޑް އޮފް ޖަޖެސް ޕެނަލް)، ޑރ. އާއިޝަތު މުނީޒާ، ޑރ. މަރިޔަމް ވަސީމާ، ޑރ. އަޒްމިރަލްޑާ ޒާހިރު އަދި އަހްމަދު މާޒިންގެ އިތުރުން އަލްއުސްތާޒް އަޝްރަފް ރަޝީދު، އަބްދުﷲ ގިޔާސް ރިޔާޒް، ފާތިމަތު ޝާނާ ފާރޫގު އަދި އިބްރާހިމް އާތިފް ޝަކޫރެވެ.
ވިޔަފާރިތައް ކުރިއެރުވުމަށް ހިތްވަރު ދިނުމުގެ ގޮތުން ދޭ މޯލްޑިވްސް ބިޒްނަސް އެވޯޑްސްގެ ގާލާ އޮންނާނީ މި މަހުގެ ތެރޭގައެވެ.