ރާއްޖޭގެ ގައުމީ ފުޓުބޯޅަ ޓީމާއި ޕާކިސްތާނުގެ ގައުމީ ފުޓުބޯޅަ ޓީމު މިރޭ ކުޅޭ ގޮތަށް ހަމަޖެހުނު އެކުވެރިކަމުގެ މެޗު ކެންސަލްކޮށްފި އެވެ.
އެފްއޭއެމް އިން މިއަދު ވަނީ ޕާކިސްތާނާއެކު ކުޅެން ހަމަޖެހުނު މެޗު ކެންސަލްވިކަން ކަށަވަރުކޮށްފަ އެވެ. އެ އެސޯސިއޭޝަން އިން ބުނެފައި ވަނީ ޕާކިސްތާނު ޓީމަށް ދަތުރުކުރުމުގައި އުނދަގޫތަކެއް ކުރިމަތިވެގެން އުޅޭ ކަމަށެވެ.
މައުލޫމާތު ލިބިފައިވާ ގޮތުގައި މެޗު ކެންސަލް ކުރަން ޖެހުނީ ޕާކިސްޓާނުގެ ޓީމަށް ގަތަރަށް އެތެރެވުމުގައި މައްސަލަތަކެއް ކުރިމަތިވުމުންނެވެ.
ޕާކިސްތާނާ ދެކޮޅަށް ކުޅެން ހަމަޖެހުނު މެޗަކީ ގަތަރުގެ އަލް އަރަބިއާ ސްޕޯޓްސް ކްލަބުގެ ދަނޑުގައި ކުޅުމަށް ހަމެޖެހުނު މެޗެކެވެ. އެ މެޗު ކުޅެން ރޭވީ މިރޭ ރާއްޖެ ގަޑިން 10:00ގަ އެވެ.
ގަތަރުގައި މީގެ ކުރިން ގައުމީ ޓީމު ވަނީ އެކުވެރިކަމުގެ މެޗެއް ކުޅެފަ އެވެ. އެ މެޗުގައި ގައުމުގެ ދެވަނަ ޑިވިޝަނުގެ ކްލަބެއް ކަމަށްވާ އަލް މަރްޚިޔާާ ސްޕޯޓްސް ކްލަބާ ދެކޮޅަށް ކުޅުނު މެޗުން ގައުމީ ޓީމު މޮޅުވީ 4-3 ގެ ނަތީޖާއިންނެވެ. އެ މެޗުގައި ރާއްޖެއަށް ގޯލު ޖަހައިދިނީ ހަމްޒާ މުހައްމަދު، މުހައްމަދު އާރިފް (ބަކާ) އަދި ހަސަން ނާއިޒް (ދާދު)އެވެ. އޭގެ ތެރެއިން ދާދު ވަނީ މެޗުގައި ދެ ގޯލު ކާމިޔާބުކޮށްފަ އެވެ.
މިހާރު ރާއްޖޭގެ ގައުމީ ޓީމު ދަނީ ކުރިއަށް އޮތް ސާފް ޗެމްޕިއަންޝިޕަށް ގަތަރުގައި ތަމްރީނު ހަދަމުންނެވެ. ސާފް ޗެމްޕިއަންޝިޕަށް ރާއްޖެ ބަންގްލަދޭޝްއަށް ދާނީ ވެސް ގަތަރުންނެވެ.
މި އަހަރުގެ ސާފް ޗެމްޕިއަންޝިޕްގައި ހިމެނެނީ ޖުމްލަ ހަތް ޓީމެވެ. ހަތް ޓީމު ދެ ގްރޫޕަކަށް ބަހާލައިގެން މުބާރާތް ގެންދިއުމަށް ހަމަޖެހިފައިވާ އިރު، ރާއްޖެ ހިމެނެނީ ގްރޫޕް ބީގަ އެވެ. ރާއްޖެއާ އެކު ގްރޫޕްގައި ހިމެނެނީ ލަންކާ އަދި އިންޑިއާއެވެ. ގްރޫޕް އޭގައި ހިމެނެނީ މުބާރާތް ބާއްވާ ގައުމު، ބަންގްލަދޭޝާއި ނޭޕާލްގެ އިތުރުން ބޫޓާން އަދި ޕާކިސްތާނެވެ.
ސާފް ޗެމްޕިއަންޝިޕްގައި މިހާތަނަށް އެންމެ ކާމިޔާބު ޓީމަކީ އިންޑިއާ އެވެ. އެ ޓީމު ވަނީ ހަތް ފަހަރެއްގެ މަތިން މުބާރާތުގެ ތަށި އުފުލާލައިފަ އެވެ.