އަވަށްޓެރި ސްރީލަންކާގައި ދިރިއުޅޭ ދިވެހީން އީދު ފާހަގަ ކުރަން އެގައުމުގެ ސޯސަންވިލާގައި ހުންނަ ރާއްޖޭގެ ސަގާފީ މަރުކަޒު، މޯލްޑިވިއަން އެޑިއުކޭޝަނަލް އެންޑް ކަލްޗަރަލް ސެންޓަރ، (އެމްއީސީސީ)ގައި ވަރުގަދަ ހަރަކާތްތަކެއް ކުރިއަށް ގެންދާގޮތަށް ހަމަޖައްސައިފިއެވެ.
ލަންކާގައި ހުންނަ ރާއްޖޭގެެ އެމްބަސީގެ ސެކަންޑް ސެކެޓްރީ ހުސެއިން މާޒިން "ސަން" އަށް ވިދާޅުވީ، އެހެން އަހަރުތަކެކޭ އެއްގޮތަށް މިއަހަރު ވެސް އީދާ ގުޅިގެން ގިނަ ހަރަކާތްތަކެއް ބާއްވަން ހަމަޖެހިފައިވާ ކަމަށެވެ.
"ފުރަތަމަ އީދު ދުވަހު ހެނދުނު ސޯސަންވިލާގައި އޮންނާނެ ބޮޑު ޖަމާއަތުގައި އީދު ނަމާދުކުރުން. ދެން އީދު ނަމާދަށް ފަހު އާދަކާދައިގެ މަތިން ބޮޑު ސައި، ހުރިހާ ދިވެހިންނަށް އޮންނާނެ. އޭގެ ފަހުން އޮންނާނީ ކުޅިވަރުތައް. އޭގެ ތެރޭގައި ވާދެމުމާއި އަންހެނުންގެ ބަށި ކުޅުން އޮންނާނެ،" މާޒިން ވިދާޅުވި އެވެ.
އޭނާ ވިދާޅުވީ އީދު ދުވަހު، ލަންކާގެ ނިގަންބޯގައި ކިޔަވަން އުޅޭ ދިވެހި ޒުވާނުން އިސްނަގައިގެން ފެންކުޅިއާއި ކުލަޖެހުމުގެ ހަރަކާތްތަކެއް ބާއްވަން ހަމަޖެހިފައިވާ ކަމަށެވެ.
މާޒިން ވިދާޅުވީ އީދު ދުވަހު އެންމެ ކުލަގަދަ ހަރަކާތެއްގެ ގޮތުގައި އޮންނާނީ އެރޭ ބާއްވާ މިއުޒިކް ޝޯ ކަމަށެވެ.
"މިއުޒިކް ޝޯ ކުރިއަށް ދާނީ މާލޭގެ މަޝްހޫރު އަދި މޯލްޑިވިއަން އައިޑޮލްގެ ތަރިންގެ ގޮތުގައި ވިދާލައިފައިވާ ޝަލަބީ، ސައިނާ، މައިޝާ އަދި ޒަކިއްޓޭއާ އެކު. ދެން ސުނީތާގެ ފަރި ހަރަކާތްތަކާއި ކޮލަމްބޯގައި ދިރިއުޅޭ ފަންނާނުން ވެސް މި ޝޯގައި ބައިވެރިވާނެ،" މާޒިން ވިދާޅުވި އެވެ.
ރާއްޖޭގެ ތައުލީމާއި ސަގާފަތް ދިރުވައި އާލާކުރުމުގެ ގޮތުން ސްރީ ލަންކާގައި، ރާއްޖޭގެ ކުރީގެ އެމްބަސީ ހިންގި ސޯސަންވިލާގައި އެމްއީސީސީ ހުޅުވީ 2014 ވަނަ އަހަރު އެވެ.
ދިހަ ހާހަށްވުރެއް ގިނަ ދިވެހިން ދިރިއުޅޭ ލަންކާގައި ދިވެހިންނަށް ހާއްސަކޮށްގެން ހުޅުވާފައިވާ އެމްއީސީސީން، ދިވެހި އިސްލާމް އަދި ޤުރުއާންގެ ހާއްސަ ކުލާސްތައް ކިޔަވައިދެއެވެ.
ނާސަރީން ފެށިގެން ގްރޭޑް 10 އަކަށް ކިޔަވައިދޭ އެ ސެންޓަރުގައި އެއް ދަންފަޅިއަކަށް ކުލާސްތައް ކުރިއަށްދާއިރު، ރަޖިސްޓްރީ ވެގެން 800 އަށްވުރެ ގިނަ ދަރިވަރުން މިހާރު ކިޔަވަމުންދެއެވެ.